ភ្នំពេញ ៖ វត្តមាននៃការបង្ហាញខ្លួនលើទីផ្សារសិល្បៈ ពីសំណាក់តារាស្រីកញ្ញា គង់ ចាន់រដ្ឋាតាមរយៈការច្រៀង និងសម្ដែងឲ្យបណ្ដាក្រុមហ៊ុនផលិតកម្ម នៅក្នុងស្រុកនានា អស់រយៈកាលជាច្រើនឆ្នាំមកនោះបានធ្វើឲ្យមជ្ឈដ្ឋានមហាជនជាទូទៅ នាំគ្នាដាក់ការចាប់អារម្មណ៍យ៉ាងខ្លាំងលើរូបនាងរហូតមានការគាំទ្រ និងល្បីឈ្មោះមកទល់ពេលសព្វថ្ងៃនេះតែម្តង។
ជាមួយការការបោះជំហានទៅក្នុងអាជីពជាអ្នកសិល្បៈនេះហើយ ទើបធ្វើឲ្យតារាចម្រៀងស្រីសម្បុរស្រអែមស្រស់ មានដើមកំណើតចេញមកពីខេត្តសៀមរាបអង្គរ គង់ ចាន់រដ្ឋា កាន់តែមានហាងឆេងសម្រាប់ទីផ្សារក្នុងស្រុកផងដែរ។ ពិសេសអំឡុងបំណាច់ឆ្នាំ២០១៥នេះតារាចម្រៀងស្រីរូបនេះផ្តើមមានសន្ទុះហក់ឡើងជាថ្មី អាចក្រសោបបានឱកាសតួសម្ដែងភាពយន្តនិង តាមរយៈការឡើងច្រៀងនៅតាមបណ្ដាស្ថានីយប៉ុស្តិ៍ទូរទស្សន៍ ព្រមទាំងគ្រប់បណ្ដាកម្មវិធីប្រគំតន្ត្រីនានារបស់ក្រុមហ៊ុនលក់ផលិតផលទាំងនៅក្នុងរាជធានីភ្នំពេញនិងចេញតាមបណ្តាខេត្តមួយចំនួន។
ជួបជាមួយកម្ពុជាថ្មីតាមទូរស័ព្ទទូរស័ព្ទ កាលពីវេលាម៉ោង០៩ នឹង៥០នាទីព្រឹកថ្ងៃទី១៦ ខែធ្នូ ឆ្នាំ២០១៥នេះតារាចម្រៀង និងសម្ដែងស្រីញញឹមស្រស់កញ្ញា គង់ ចាន់រដ្ឋាបាននិយាយប្រាប់ថា សិល្បៈរបស់នាងសព្វថ្ងៃមានការរវល់ច្រើនគួរសម ដូចជាការឡើងច្រៀងតាមប៉ុស្តិ៍ទូរទស្សន៍នឹងកម្មវិធីប្រគំតន្ត្រីមួយចំនួនរបស់បណ្ដាក្រុមហ៊ុនផ្សព្វផ្សាយ លក់ផលិតផលជាដើម…។ ម្យ៉ាងពេលនេះនាងក៏ជាប់ដៃថតភាពយន្តរឿងភាគឲ្យខាងប៉ុស្តិ៍ទូរទស្សន៍CTN ទៀតផង។
កញ្ញា គង់ ចាន់រដ្ឋា បាននិយាយទៀតថា ខ្ញុំមានការងារច្រើនសម្រាប់បំណាច់ឆ្នាំ២០១៥នេះព្រោះមានគេទាក់ទងហៅច្រើន។ ទន្ទឹមគ្នានោះខ្ញុំក៏ទទួលបានឱកាសហៅថតសម្ដែងរឿងថ្មី ដែលត្រៀមចាក់បញ្ចាំងនៅប៉ុស្តិ៍CTN ដែលមានចំណងជើងថា បុប្ផា៤ទង។ រឿងនេះដំណើរការថតជិតចប់ហើយដែរ ប៉ុន្តែតំណែងសម្រាប់តួអង្គ ដែលខាងផលិតកម្មតម្រូវឲ្យខ្ញុំសម្ដែងនេះសិន។
ជាមួយគ្នានឹងឱកាសសម្តែងភាពយន្តជាលើក៣នៅស្ថានីយទូរទស្សន៍CTNនេះដែរ កញ្ញា គង់ ចាន់រដ្ឋា បានបង្ហាញពីចំណាប់អារម្មណ៍រំភើបសប្បាយ ហើយនាងក៏បានដាក់ក្តីសង្ឃឹមថា នឹងទទួលការគាំទ្រពីសំណាក់មហាជនជនគ្រប់ស្រទាប់វណ្ណៈ ក្រោយពីខ្សែរឿងនេះថតចប់ និងត្រូវបានចាក់
បញ្ចាំងនៅទូរទស្សន៍CTNក្នុងពេលឆាប់ៗខាងមុខនេះ។
ក្នុងអាជីពជាអ្នកសិល្បៈមួយរយៈពេលនេះ គេសង្កេតឃើញថា កញ្ញាគង់ ចាន់រដ្ឋា កំពុងសាងកេរ្តិ៍ឈ្មោះល្បី តាមរយៈការបង្ហាញសមត្ថភាព នៃការច្រៀង បូករួមនឹងបទពិសោធន៍សិល្បៈជាយូរឆ្នាំ។ ជាងនេះទៅ នាពេលបច្ចុប្បន្ននេះ ក៏មានមហាជនជាច្រើន បានសម្បែងការគាំទ្រទៅលើរូបនាងផងដែរ៕
គង់ ចាន់រដ្ឋា ក្រសោបបានទីផ្សារសម្ដែងភាពយន្ត រឿងបុប្ផា៤ទង ចាក់បញ្ចាំងនៅCTN
0 Comments