ភ្នំពេញ ៖ អតីតអធិការកិច្ចក្រសួងយុត្តិធម៌ និងជាជំនួយការរដ្ឋលេខាធិការក្រសួងយុត្តិធម៌ជាប់ទោស២ឆ្នាំដដែល ពាក់ព័ន្ធការប្រព្រឹត្តអំពើពុករលួយ ឆបោកប្រាក់ពាណិជ្ជករម្នាក់ចំនួន មួយម៉ឺនដុល្លារ តាមរូបភាពដោះស្រាយទំនាស់ដីធ្លី។ ក្រោយការសម្រេចនេះ ជនជាប់ចោទ ស្រែកថា ” គ្មានការយោគយល់សោះ”។
ប្រធានក្រុមប្រឹក្សាជំនុំជម្រះសាលាឧទ្ធរណ៍ លោក សំរិទ្ធ សុផល បានសម្រេចកាលពីព្រឹកថ្ងៃទី៩ ខែធ្នូ តម្កល់សាលក្រមសាលាដំបូងរាជធានីភ្នំពេញទុកជាបានការដដែល។ សាលដីកាដែលប្រកាសដោយលោក សំរិទ្ធ សុផល ពុំបានអានសំអាងហេតុឡើយ។
គួររំលឹកថា កាលពីល្ងាចថ្ងៃទី២ ខែមេសា កន្លងទៅ លោក កោ វណ្ឌី អនុប្រធានសាលាដំបូងរាជធានីភ្នំពេញបានប្រកាសសាលក្រមផ្ដន្ទាទោស ឈ្មោះ សំ សារិទ្ធ ដាក់ពន្ធនាគារ២ឆ្នាំ ក្រោមការចោទប្រកាន់ពីបទឆបោកមាន ស្ថានទម្ងន់ទោស។ ប៉ុន្តែជនជាប់ចោទ បានប្ដឹងឧទ្ធរណ៍។
ជនជាប់ចោទឈ្មោះ សំ សារិទ្ធ ត្រូវបានសមត្ថកិច្ចអង្គភាពប្រឆាំងអំពើពុករលួយឃាត់ខ្លួនកាលពីថ្ងៃទី១១ ខែកញ្ញា ឆ្នាំ២០១៤ យោងតាមពាក្យបណ្ដឹងរបស់ឈ្មោះ ហ៊ុន ប៊ុនធឿន ហៅតាលាង។
ពាក់ព័ន្ធសំណុំរឿងនេះ ប្រភពព័ត៌មានបានឲ្យដឹងថា លោកស្រី ឃួន ម៉ាលីន អាយុ៦៥ឆ្នាំ រស់នៅសង្កាត់ ទួលសង្កែ ខណ្ឌឫស្សីកែវបានដាក់ពាក្យបណ្ដឹងទៅក្រសួងយុត្តិធម៌មានកម្មវត្ថុប្ដឹងលោក ហ៊ុន ប៊ុនធឿន ហៅ តាលាង ជាពាណិជ្ជកររកស៊ីទិញលក់ដី។ បណ្ដឹងនេះត្រូវបាន លោក សំ សារិទ្ធ ជាអ្នកចាត់ការព្រមទាំងបានទទួលឯកសារពាក់ព័ន្ធនឹងទំនាស់ដីធ្លី ពីលោកស្រី ឃួន ម៉ាលីន យ៉ាងច្រើន។
ក្រោយពីបានទទួលឯកសារពីភាគី លោកស្រី ឃួន ម៉ាលីន ហើយ ឈ្មោះ សំ សារិទ្ធ បានយកឯកសារទាំងនោះទៅប្រើប្រាស់ និងបង្ហាញភាគី ឈ្មោះហ៊ុន ប៊ុនធឿន និងបានទទួលប្រាក់មួយចំនួនពីឈ្មោះ ហ៊ុន ប៊ុនធឿន។ បន្ទាប់មកទៀត ឈ្មោះ សំ សារិទ្ធ នៅតែប្រើប្រាស់ឯកសារទាំងនោះ ដើម្បីទទួលបានផលចំណេញពី ឈ្មោះ ហ៊ុន ប៊ុនធឿន ជាបន្ដបន្ទាប់ រហូតធ្វើឲ្យមានការធុញទ្រាន់ទើបឈ្មោះហ៊ុន ប៊ុនធឿន ដាក់ពាក្យបណ្ដឹងទៅអង្គភាពប្រឆាំង អំពើពុករលួយ។ រហូតមកដល់ថ្ងៃទី១១ខែកញ្ញា ឆ្នាំ២០១៤ នៅពេលដែល ឈ្មោះ សំ សារិទ្ធ ទៅទទួលយកប្រាក់ម្ដងទៀតពី ឈ្មោះ ហ៊ុន ប៊ុនធឿន ក៏ត្រូវបានសមត្ថកិច្ចអង្គភាពប្រឆាំងអំពើពុករលួយឃាត់ខ្លួនតែម្ដង។
ដោយឡែកនៅក្នុងសវនាការ សាលាឧទ្ធរណ៍ជនជាប់ចោទស្នើឲ្យមានការបន្ធូរបន្ថយទោស តែតំណាង មហាអយ្យការគឺ លោកអ៊ឹម វិជ្ជា បានស្នើឲ្យមានការតម្កល់ទោសជនជាប់ចោទ ទុកជាបានការដដែល៕
អតីតអធិការកិច្ចក្រសួងយុត្តិធម៌ប្រព្រឹត្តអំពើពុករលួយ ត្រូវផ្ដន្ទាទោស២ឆ្នាំដដែល
0 Comments