ពោធិ៍សាត់ ៖ ឪពុកម្ដាយក្មេងប្រុសម្នាក់បានសោកស្ដាយយ៉ាងខ្លាំង ដោយសារឧប្បត្តិហេតុស្មានមិនដល់ កូនប្រុសរបស់គាត់ទើបអាយុបាន៦ឆ្នាំសោះ បានស្លាប់នៅក្នុងទឹកអូរ ខណៈដែលគ្រួសារពួកគាត់នាំគ្នាទៅច្រូតស្រូវ។
ហេតុការណ៍ប្រទះឃើញក្មេងប្រុសស្លាប់ក្នុងទឹកអូរនេះបានកើតឡើង កាលពីវេលាម៉ោង៣និង១៥នាទី ល្ងាចថ្ងៃទី០១ ខែធ្នូ ឆ្នាំ២០១៥ ត្រង់ផ្លូវលំក្រាលគ្រួសក្រហមមួយខ្សែ ដែលជាប់អូរ ក្នុងភូមិដូងជ្រុំ ឃុំបឹងបត់កណ្ដោល ស្រុកបាកាន ខេត្តពោធិ៍សាត់។
បើតាមអាជ្ញាធរភូមិដូងជ្រុំទទួលព័ត៌មានពីក្រុមគ្រួសារក្មេងរងគ្រោះស្លាប់ក្នុងទឹកអូរ ដែលមានឈ្មោះ ជឿន ឧសភា អាយុ០៦ឆ្នាំ ភេទប្រុស រស់នៅភូមិកើតហេតុខាងលើ។ អាជ្ញាធរដដែលបន្តថា កាលពីរសៀលម៉ោងប្រមាណជា១នោះក្រុមគ្រួសារក្មេងប្រុសនេះបាននាំគ្នាចុះ ចេញពីផ្ទះទៅច្រូតស្រូវព្រោះវាដល់ខែប្រមូលផលហើយ ដោយពួកគេចាកចេញពីផ្ទះនោះមិនបានដឹងនិង នឹកគិតថា កូនប្រុសរបស់ខ្លួនលូចទៅតាមក្រោយសោះ។
ស្រាប់តែម៉ោងប្រមាណជាជាង៣ល្ងាច ក៏លឺគេប្រាប់ថា កូនប្រុសគាត់ឈ្មោះ ជឿន ឧសភា អាយុ ០៦ ឆ្នាំ បានត្រូវគេប្រទះឃើញលង់ទឹកក្នុងអូក្បែរផ្លូវស្លាប់បាត់ទៅហើយ ដោយសារតែក្មេងរងគ្រោះម្នាក់នេះរត់តាមឪពុកម្ដាយទៅច្រូតស្រូវពីក្រោយ ទំនងជាក្ដៅខ្លាំងផង ហើយឃើញទឹកក្នុងអូរជាប់និងដងផ្លូវទៀតក៏ចុះងូតលេងលង់ស្លាប់តែម្ដង។
ក្រោយពីក្មេងនេះស្លាប់ក្នុងទឹកអូរចំណុចខាងលើនេះនគរបាល បានមកពិនិត្យសពក្មេងប្រុសនេះ ដោយបានប្រគល់ឲ្យក្រុមគ្រួសារយកសពទៅធ្វើបុណ្យតាមប្រពៃណីខ្មែរ ហើយបានឲ្យដឹងថា ជនរងគ្រោះពិតជាស្លាប់ដោយសារលង់ទឹកពិតប្រាកដហើយ ដោយពុំមានឧប្បត្តិហេតុអ្វីផ្សេង ទៀតទេ។
ជាមួយគ្នានេះដែរ ខាងមន្ត្រីនគរបាលយុត្តិធម៌ ក៏បានផ្ដាំផ្ញើដល់បងប្អូនប្រជាកសិករដែលជាអាណាព្យាបាលក្មេងៗមេត្តាប្រុងប្រយ័ត្នចំពោះពួកគេផង ព្រោះនេះជារដូវច្រូតអាសធាតុក្ដៅ ខ្លាំងណាស់ដូច្នោះក្មេងតូចៗ ប្រឈមមុខនិងគ្រោះថ្នាក់គ្រប់ពេល ប្រសិនជាអាព្យាបាលមិនគិតដិតដល់ពួកគេ៕
ប្រទះឃើញក្មេងប្រុសម្នាក់លង់ទឹកអូរស្លាប់យ៉ាងអាណោចអាធ័ម
0 Comments