បន្ទាយមានជ័យ ៖ ក្រុមជនពិការចំនួន២៣០គ្រួសារ នាំគ្នាសំណូមពរដល់ថ្នាក់លើជួយចេញលិខិតដីធ្លីស្របច្បាប់ជូនដល់ពួកគាត់ផង ពីព្រោះមានជនខិលខូចបាននាំគ្នាយកឈ្មោះថ្នាក់លើទៅលួចយកដីរបស់គាត់អស់មួយចំនួនធំទៅលក់ឲ្យជនអាធិបតេយ្យ រួចយកលុយទៅចែកគ្នាជាមួយនឹងបក្សពួករបស់ខ្លួនទៀតផង។
សូមបញ្ជក់ថា នៅព្រឹកថ្ងៃទី២២ ខែធ្នូ ឆ្នាំ២០១៥នេះ គេបានសង្កេតឃើញតំណាងរបស់ជនពិការចំនួន១០០នាក់ ក្នុងចំណោមជនពិការចំនួន២៣០នាក់ សព្វថ្ងៃពួកគាត់ទាំងនោះរស់នៅក្នុងភូមិបឹងជង្រុក ឃុំទួលពង្រ ស្រុកម៉ាឡៃ ខេត្តបន្ទាយមានជ័យ។
លោក កែវ យ៉យ តំណាងឲ្យជនពិការបានឲ្យដឹងថា នៅក្នុងឆ្នាំ១៩៩៧ សម្ដេច ហ៊ុន សែនបានប្រកាសប្រគល់ដីសរុបចំនួន១.៩២៩ហិកតា ជូនដល់យោធាកាត់រំសាយទាហានពិការ ប៉ុន្តែក្រោយមកក៏មានការលួចយកដីរបស់ជនរងគ្រោះទៅលក់ជាបន្តបន្ទាប់ រហូតធ្វើឲ្យពួកគាត់ដាក់ពាក្យបណ្ដឹងទៅសាលាខេត្តទៅរដ្ឋសភាជាតិ ទៅក្រសួងការពារជាតិ ដើម្បីសុំការជួយអន្តរាគមន៍។ លោក កែវ យ៉យ បានបន្តថា ខាងសាលាខេត្តខាងលើបានកោះហៅភាគីទាំងសង្ខាងទៅសម្រួលគ្នាច្រើនលើកច្រើនសារួចមកហើយ ឯលទ្ធផលចុងក្រោយ គឺលោកអភិបាលខេត្តបានសម្រេចឲ្យជនរងគ្រោះនាំគ្នាធ្វើការបង្កបង្កើនផលលើដីមានបញ្ហាជាបណ្ដោះអាសន្នសិន រង់ចាំមានការសម្រេចពីថ្នាក់លើ ថាតើគួរសម្រួលប័ណ្ណកម្មសិទ្ធិជូនដល់បងប្អូននាពេលខាងមុខយ៉ាងណានោះ។
តំណាងដដែលបានបន្តទៀតថា មានឈ្មោះ យីន ថុល ភេទស្រី និងប្តីរបស់គាត់បានលួចយកដីរបបរបស់ជនពិការទៅលក់ឲ្យជនអាធិបតេយ្យ ដោយប្រើឈ្មោះលោកធំនៅពីក្រោយខ្នងទៀតផង ជាហេតុមួយធ្វើឲ្យពួកគាត់បាត់បង់អស់ដីរបបជនពិការមួយចំនួនទៀតនោះ ដូច្នេះហើយទើបគាត់មានគម្រងក្រោកឡើងទៅដល់ផ្ទះសម្ដេច ហ៊ុន សែន នាពេលដ៏ខ្លីខាងមុខនេះ ក្នុងគោលបំណងសំណូមពរដល់សម្តេចជួយធ្វើអន្តរាគមន៍ចេញប័ណ្ណកម្មសិទ្ធិស្របច្បាប់ជូនដល់ពួកគាត់៕
ជនពិការ២៣០គ្រួសារ សំណូមពរថ្នាក់លើចេញប័ណ្ណកម្មសិទ្ធិដីធ្លីសម្រាប់ពួកគាត់ផង
0 Comments