ពានរង្វាន់​៧​មករា​នៅ​ខេត្ត​បន្ទាយមានជ័យ ចាប់ផ្ដើម​ប្រកួត​ថ្ងៃ​ព្រហស្បតិ៍​នេះ​

បាល់ទាត់ ៖ កងរាជអាវុធហត្ថ​ខេត្ត​បន្ទាយមានជ័យ សហការ​ជាមួយ​សហភាព​សហព័ន្ធ​យុវជន​ខេត្ត​បន្ទាយមានជ័យ​បង្កើត​ពានរង្វាន់​បាល់ទាត់​ដើម្បី​អបអរ​ថ្ងៃ​រំដោះ​៧​មករា ឆ្នាំ​២០១៦ ដែល​រៀបចំ​នៅ​ក្នុង​ខេត្ត​របស់​ខ្លួន ចាប់ពី​ថ្ងៃ​ទី​១០ ខែ​ធ្នូ ឆ្នាំ​២០១៥ ដល់​ថ្ងៃ​ទី​៦ ខែ​មករា ឆ្នាំ​២០១៦​ខាងមុខ។

យោង​តាម​លោក សុះ រ៉ូ​ហ្សា​លី តំណាង​គណៈកម្មការ​រៀបចំ​ការ​ប្រកួត​បាន​លើក​ឡើង​ថា នៅ​ឆ្នាំនេះ​ មាន​ក្រុម​ដាក់ពាក្យ​ចូលរួម​ចំនួន​៩​ក្រុម​មកពី​ក្រុង​សិរីសោភ័ណ និង​ក្រុង​ប៉ោយប៉ែត ដោយ​បែង​ចែក​ជា​២​ពូ​ល។ ក្រុម​និមួយៗ ត្រូវ​ប្រកួត​ជម្រុះ​តាម​ពូ​ល​រៀង​ៗ ខ្លួន​មុន​ឡើង​ទៅ​វគ្គ​ពាក់កណ្ដាល​ផ្ដាច់ព្រ័ត្រ និង​បន្ត​ទៅ​វគ្គ​ផ្ដាច់ព្រ័ត្រ លើ​ទីលាន​សកលវិទ្យាល័យ​មានជ័យ។

សម្រាប់​ពូ​ល A មាន​ក្រុម​ភ្នំ​ស្វាយ​អែ​ហ្វ​ស៊ី លី​ហេង​ឆាយ Sport World សកលវិទ្យាល័យ​គ្រប់​គ្រង និង​សេដ្ឋកិច្ច និង​ភូមិ​គាប ស្រប​ពេល​ពូ​ល B មាន​ក្រុម សកលវិទ្យាល័យ​មានជ័យ ខ្លា​កំណាច​និមិត្ត Asia 4 Bet និង Sisophon FC។

សម្រាប់​ប្រកួត​បើកឆាក​នៅ​ថ្ងៃ​ព្រហស្បតិ៍​នេះ​មាន​ក្រុម​ភ្នំ​ស្វាយរៀង​អែ​ហ្វ​ស៊ី ជួប​ក្រុម​លី​ហេង​ឆាយ នៅ​វេលា​ម៉ោង​៩​ព្រឹក ហើយ​ក្រុម​សកល​វិទ្យាល័យ​មានជ័យ ប៉ះ​ក្រុម​ខ្លា​កំណាច​និមិត្ត នៅ​វេលា​ម៉ោង​២​រសៀល ហើយ​ប្រកួត​ចុងក្រោយ​ក្រុម Asia 4 Bet ជួប​ក្រុម Sisophon FC នៅ​វេលា​ម៉ោង​៤ រសៀល។

កន្លង​មក​ពានរង្វាន់​នេះ​មាន​ក្រុម​ចូលរួម​រហូតដល់​ទៅ​ជាង​៦០​ក្រុម។ តាម​គម្រោង​នៅ​ឆ្នាំនេះ​ពានរង្វាន់​នឹង​ចែក​តាម​កម្រិត​អាយុ​ដូចជា​ជើង មាន​ជើងឯក​យុវជន​ក្រោម​អាយុ​១០​ឆ្នាំ (U-10), ជើង​ឯក​ក្រោម​អាយុ​១៣​ឆ្នាំ (U-១៣), ជើងឯក​ក្រោម​អាយុ​១៥ ឆ្នាំ (U-15), ជើងឯក​ក្រោម​អាយុ​១៧​ឆ្នាំ (U-17), ជើងឯក​យុវជន​ក្រោម​អាយុ​១៩​ឆ្នាំ (U-19) និង​ជើងឯក​សម្រាប់​ក្រុម​នារី​ផង​ដែរ។ ប៉ុន្តែ​ដោយមាន​បញ្ហា​មួយ​ចំនួន​ក៏​ពង្រួម​នៅ​សល់​តែ​ការប្រកួត​បែប​មហាជន​តែប៉ុណ្ណោះ៕

 

ពានរង្វាន់​៧​មករា​នៅ​ខេត្ត​បន្ទាយមានជ័យ ចាប់ផ្ដើម​ប្រកួត​ថ្ងៃ​ព្រហស្បតិ៍​នេះ​