បន្ទាយមានជ័យ ៖ នៅព្រឹកថ្ងៃទី១ ខែធ្នូ ឆ្នាំ២០១៥ កម្ពុជា-ថៃបានសហការគ្នាបានប្រារព្ធទិវាពិភពលោកប្រយុទ្ធប្រឆាំងនឹងជំងឺអេដស៍ ដែលមានប្រជាពលរដ្ឋចូលរួមចំនួន៦០០នាក់។ ពិធីនេះត្រូវបានប្រារព្ធធ្វើឡើងនៅផ្សារណងព្រឺ ស្ថិតក្នុងភូមិណងព្រឺ ឃុំណងព្រឺ ស្រុកអារ័ញ្ញ ខេត្តស្រះកែវ។ ពិធីនេះដោយមានការចូលរួមភាគីខ្មែរ លោក គោស៊ុំ សារឿត អភិបាលខេត្តបន្ទាយមានជ័យ និងមន្ត្រីអមដំណើរជាច្រើននាក់ភាគីខាងថៃ លោក ថាំម៉ាក់ស៊ុក រ៉ាត់ថាក់ណាថាន់យ៉ា អភិបាលរងខេត្តស្រះកែវ និងមន្ត្រីអមដំណើរជាច្រើននាក់ទៀត។
លោក ថាំម៉ាក់ ស៊ុករ៉ាក់ថាក់ ណាថាន់យ៉ា បានមានប្រសាសន៍ថា ទិវាពិភពលោកប្រយុទ្ធនឹងជំងឺអេដស៍ឆ្នាំ២០១៥នេះ ត្រូវបានរួមគ្នារវាងថៃ-កម្ពុជា ដែលត្រូវបានចូលរួមទាំងអស់គ្នាការពារការរីករាលដាល និងកាត់បន្ថយមេរោគអេដស៍។ តាមរយៈវិធានការអប់រំបង្ការការលើកកម្ពស់ ការប្រើប្រាស់ស្រោមអនាម័យឲ្យបានមួយរយភាគរយ។ ការគ្រប់គ្រងជំងឺកាមរោគ ការផ្តល់ប្រឹក្សា និងធ្វើតេស្តឈាមរកមេរោគអេដស៍ឲ្យបានជាប្រចាំ ការប្រើប្រាស់ម្ជុល សឺរ៉ាំង ដែលស្អាតគ្មានមេរោគជាដើមឲ្យបានខ្ជាប់ខ្ជួន។
លោក គោស៊ុំ សារឿត អភិបាលខេត្តបន្ទាយមានជ័យបានមានប្រសាសន៍ថា នេះជាលើកទី១៧ហើយ ដែលភាគីកម្ពុជា-ថៃធ្វើរួមគ្នាទិវាពិភពលោកប្រយុទ្ធនឹងជំងឺអេដស៍ ដែលត្រូវបានធ្វើឡើងចាប់ពីឆ្នាំ១៩៨៨ ធ្វើជារៀងរាល់ឆ្នាំរហូតដល់ឆ្នាំ២០១៥នេះគឺ ធ្វើនៅផ្សារណងព្រឺ ស្រុកអារញ្ញ ខេត្តស្រះកែវ ជាប់ព្រំដែនស្រុកម៉ាឡៃ ខេត្តបន្ទាយមានជ័យ ដែលមានប្រជាពលរដ្ឋកម្ពុជា-ថៃចូលរួម៦០០នាក់។
លោកបានមានប្រសាសន៍បន្តថា ទិវាពិភពលោកប្រយុទ្ធនឹងជំងឺអេដស៍១ធ្នូនេះ ដើម្បីធានាអនុវត្តន៍ឲ្យសម្រេចបានជោគជ័យនូវគោលដៅសូន្យបីនាឆ្នាំ២០២០។ លោក គោស៊ុំ សារឿត បានបញ្ជាក់ទៀតថា កន្លងមកជំងឺអេដស៍មានការរីករាលដាល ដោយការយកចិត្តទុកពីរាជរដ្ឋាភិបាលអប់រំណែនាំនោះ ជំងឺអេដស៍នេះបានថយចុះ តែរាល់ថ្ងៃប្រឈមគ្រោះថ្នាក់ចរាចរណ៍កើនឡើងច្រើនជាងជាការព្រួយបារម្ភយ៉ាងខ្លាំងនៅកម្ពុជាយើងនេះ៕
កម្ពុជា-ថៃ រួមគ្នាប្រារព្ធទិវាពិភពលោកប្រយុទ្ធនឹងជំងឺអេដស៍
0 Comments