កណ្តាល ៖ កម្លាំងគរបាលស្រុកកោះធំ កាលពីវេលាម៉ោង ២១និង៣០នាទី យប់ថ្ងៃទី១៣ ខែធ្នូ ឆ្នាំ២០១៥ បានធ្វើការបង្ក្រាប និងឃាត់ខ្លួនមុខសញ្ញាចែកចាយគ្រឿងញៀនចំនួន២នាក់ ដកហូតបានថ្នាំញៀនបានមួយកញ្ចប់តូច នៅចំណុចភូមិសំប៉ាន ឃុំកោះធំ(ខ) ស្រុកកោះធំខេត្តកណ្ដាល។
លោកវរសេនីយ៍ត្រី ឈឿន ប៊ុនឈន អធិការប៉ូលិសស្រុកកោះធំបានឱ្យដឹងថា ជនសង្ស័យទាំងពីរនាក់ដែលត្រូវបានឃាត់ខ្លួន ទី១ ឈ្មោះ ប៊ូ ចាបអ៊ិត ភេទ ប្រុស អាយុ ២៧ ឆ្នាំ ជនជាតិខ្មែរ មានទីលំនៅភូមិសំប៉ានក្រោម ឃុំព្រែកអំបិល ស្រុកស្អាង និងទី២ ឈ្មោះ អូន ប៊ុនថន ភេទ ប្រុស អាយុ ៣០ ឆ្នាំ ជនជាតិខ្មែរ មានទីលំនៅជាមួយគ្នា។ ក្នុងប្រតិបត្តិការបង្ក្រាប សមត្ថកិច្ចដកហូតបាន ម្សៅក្រាមពណ៌សថ្លាសង្ស័យជាសារធាតុញៀន (ម៉ាទឹកកកIce)០១កញ្ចប់តូច ម៉ូតូ ០១គ្រឿងម៉ាក ហុងដា SL ពណ៌ ទឹកប្រាក់ ពាក់ផ្លាកលេខ កណ្ដាល.1I 9771 និងទូរសព្ទដៃម៉ាកណូគាមួយគ្រឿង។
លោកអធិការបានឱ្យដឹងទៀតថា នៅវេលាម៉ោង ជាង៩យប់ ថ្ងៃកើតហេតុខាងលើ កម្លាំងអន្តរាគមន៍ ក្រុមទី១ នៃអធិការដ្ឋាននគរបាលស្រុកកោះធំ បានចុះល្បាតតាមភូមិសាស្ត្រ មកដល់ចំណុច ភូមិសំប៉ាន ឃុំកោះធំ(ខ) ស្រុកកោះធំ បានប្រទះឃើញជនសង្ស័យទាំង០២នាក់ កំពុងជិះម៉ូតូគ្រឿងឌុបគ្នា ក្នុងទិសដៅពីត្បូងទៅជើង ដោយមានការសង្ស័យ ពេលនោះកម្លាំងបានឃាត់ម៉ូតូឲ្យឈប់ ដើម្បីធ្វើការត្រួតពិនិត្យ ហើយឆែកឆេររកឃើញថ្នាំញៀន០១ កញ្ចប់តូចនៅជាប់ និងខ្លួនឈ្មោះ អូន ប៊ុនថន ភ្លាមនោះកម្លាំងបាននាំខ្លួនជនសង្ស័យទាំង០២ នាក់ខាងលើ មកកាន់អធិការនគរបាលស្រុកកោះធំ ដើម្បីធ្វើការសាកសួរ។
នៅចំពោះមុខសមត្ថកិច្ច ជនសង្ស័យទាំង ២នាក់នេះ បានសារភាពថា ថ្នាំញៀន០១ កញ្ចប់តូចខាងលើនេះ ខ្លួនបានទិញពីអ្នកលក់ថ្នាំញៀនម្នាក់ ភេទប្រុសមិនស្គាល់ឈ្មោះ តែ ស្គាល់មុខ តាមរយៈលេខទូរស័ព្ទ មានទីលំនៅចំណុច ខាងត្បូងស្ពានព្រែកយាយហាយ ក្នុងភូមិព្រែកយាយហាយ ឃុំព្រែកថ្មី ស្រុកកោះធំ។
បច្ចុប្បន្ន ជនសង្ស័យទាំងពីរនាក់ រួមនឹងវត្ថុតាង ត្រូវបានសមត្ថកិច្ចកសាងសំណុំរឿងចាត់ការតាមនិតវិធីច្បាប់៕
ប៉ូលិសស្រុកកោះធំឃាត់ខ្លួនមុខសញ្ញាចែកចាយគ្រឿងញៀន២នាក់ ដកហូតបានថ្នាំញៀន១កញ្ចប់តូច
0 Comments