ភ្នំពេញ ៖ តារាសម្តែងធ្លាប់ទទួលបានការគាំទ្រនិង មានប្រជាប្រិយភាពបង្គួរក្នុងជីវិតជាអ្នកសិល្បៈកញ្ញា មាស សម្ផស្ស បន្ទាប់សាងកេរ្ដិ៍ឈ្មោះល្បីក្នុងទីផ្សារសម្តែងតាមរយៈការបង្ហាញសមត្ថភាព និងទេពកោសល្យអស់រយៈពេលយូរឆ្នាំមកនេះ បច្ចុប្បន្នត្រូវបានមហាជនអ្នកគាំទ្រសង្កេត ឃើញថា ទីផ្សារសិល្បៈរបស់នាងសព្វថ្ងៃនេះហាក់កំពុងតែមានភាពធ្លាក់ចុះទៅវិញចាប់តាំងបែកធ្លាយដំណឹងត្រៀមរៀបអាពាហ៍ពិពាហ៍ជាមួយគូរស្នេហ៍។
ស្របពេលជាមួយគ្នា នៃការស្ងប់ស្ងាត់បាត់មុខពីសិល្បៈនេះដែរថ្មីៗនេះក៏ស្រាប់តែបានលេចឭដំណឹងមកថា មាស សម្ផស្ស ពេលនេះកំពុងតែសម្ងំបន្ទំសាច់ដើម្បីត្រៀមរៀបអាពាហ៍ពិពាហ៍ឆាប់បានចេញទៅរស់នៅសាងសម្ព័ន្ធភាពស្នេហាផ្អែមល្ហែមជាមួយគូរស្នេហ៍អាណិកជន ទើបធ្វើឲ្យទីផ្សារសម្តែងរបស់នាងមានការស្រុតចុះក្នុងរយៈពេលប៉ុន្មានឆ្នាំចុងក្រោយនេះ ព្រោះតែការបោះបង់មិនទទួលយកការហៅថតសម្តែងដូចពេលមុនៗឡើយ។
ប្រភពពីអ្នកសិល្បៈសិទ្ធស្នាលជាមួយតារាស្រីរូបនេះបានបង្ហើបឲ្យដឹងថា មាសសម្ផស្សពេល នេះបានសម្រេចចិត្តលាឈប់ពីសិល្បៈ ដោយមូលហេតុនាងត្រូវត្រៀមគម្រោងរៀបការឆាប់ៗនេះដូច្នេះចង់តម្រូវតាមចិត្តរបស់អនាគតស្វាមី ខណៈដែលឥឡូវនេះពួកគេទាំងពីរកំពុងតែរួមរស់ក្រោមដំបូលផ្ទះជាមួយគ្នាយ៉ាងមានសេចក្តីសុខបំផុតនោះ។
ទំនាក់ទំនងស្នេហារវាងកញ្ញាមាស សម្ផស្ស ជាមួយបុរសគូស្នេហ៍អាណិកជនក្រៅប្រទេសម្នាក់នេះ គឺបានចាប់ផ្តើមឡើងមានរយៈពេលជិត៣ឆ្នាំមកហើយ។ ប៉ុន្តែដំបូងឡើងពួកគេទាំងពីរតែងបានព្យាយាមបិទបាំងពីក្រសែភ្នែកមហាជនអ្នកគាំទ្រ និង មិត្តភក្តិរួមអាជីពសិល្បៈជាមួយគ្នា។
ដោយឡែកសម្រាប់ការបែកធ្លាយនៃការសាងសម្ព័ន្ធភាពស្នេហ៍រវាងកញ្ញា មាស សម្ផស្ស ត្រូវបានប្រភពបញ្ជាក់ថា ស្នេហានេះផ្តើមលេចជាសញ្ញាឡើងកាលពីអំឡុងដើមឆ្នាំ២០១៤កន្លងមកខណៈដែលគេឧស្សាហ៍បានឃើញ មាស សម្ផស្ស បណ្តើរដឹកដៃគ្នាជាមួយគូស្នេហ៍ទៅចូលរួមកម្មវិធីរបស់អ្នកសិល្បៈរួមអាជីពហើយចាប់តាំងពីពេលនោះគឺនាងក៏បានប្រកាសបើកចំហជាសាធារណៈប្រាប់ដល់មហាជននិងបានរួមរស់ជាមួយគ្នារហូតដល់ពេលបច្ចុប្បន្ន៕
មាស សម្ផស្ស ឈប់ពីសិល្បៈតម្រូវចិត្តគូស្នេហ៍
0 Comments