ប្រដាល់ ៖ ម៉ន សាម៉េត អ្នកប្រដាល់ក្លិបការិយាល័យទី៥ កងទ័ពជើងគោក ប្រកួតឈ្នះ សេន កុសលក្លិបមោងឫស្សីមរតកគុនខ្មែរដោយពិន្ទុទាំងលំបាក ក្នុងការជួបគ្នានៅលើសង្វៀនSEA-TV នាព្រឹកថ្ងៃសៅរ៍ ទី២៦ ខែធ្នូ ឆ្នាំ២០១៥នេះ។ អ្នកប្រដាល់ទាំង២រូបនេះក៏ប្រកួតគ្នា៥ទឹកពេញដែរ។
សាម៉េត ដែលជាអ្នកឈ្នះក៏ឈឺសាច់មិនស្ទើរដែរទេ។ ស្ថានភាពនៃការប្រកួត សាម៉េត មានប្រៀបភាគច្រើន តែប្រសិនបើកុសលហ៊ានវាយលុកនោះ ឱកាសឈ្នះរបស់ សាម៉េត នឹងលំបាក តែដោយសាតែ កុសល មិនសូវហ៊ានវាយទើបធ្វើឲ្យ សាម៉េត បានចិត្ត ហើយសម្រុកចូលហើយមានប្រៀបរហូតនោះ។
វ៉ែន សុវណ្ណ អ្នកប្រដាល់ជើងចាស់នៃក្លិបកងកេងខេត្តបាត់ដំបង ប្រកួតចាញ់ មាស ភារម្យ អ្នកប្រដាល់ក្លិបកងទ័ពជើងទឹក។ នេះជាជ័យជំនះលើក៤របស់ ភីរម្យ ហើយ ក្នុងការប្រកួតជាមួយវ៉ែន សុវណ្ណ ៥លើកទាំងលើកនេះ ដោយមានមួយលើកបានស្មើនោះ។
នៅក្នុងស្ថានភាពប្រកួតរបស់ វ៉ែន សុវណ្ណ ពេលនេះ បើពិនិត្យទៅ សុវណ្ណ នៅតែមានស្នៀតវាយល្អ តែគេឆាប់អស់ស៊ុហ្វ ពោលគឺគេចាស់ហើយ ម្ល៉ោះហើយកម្លាំងរបស់គេមិនដល់ ភិរម្យ ដែលនៅក្មេងជាងនោះទេ។
ក្នុងការប្រកួតនៅពេលចូលកៀក មាសភីរម្យ តែងតែក្រៀក សុវណ្ណ មិនឲ្យ ធ្វើសកម្មភាពប្រកួតបាន ដូច្នេះនៅពេលវ៉ៃប្រយោល សុវណ្ណ ធ្វើឲ្យភិរម្យលំបាកអញ្ចឹងហើយទើប ភិរម្យ ចូលចិត្តចូលកៀកនោះ។
ពួកគេប្រកួតគ្នាពេញទាំង៥ទឹក ដែលលទ្ធផលចុងក្រោយ មាស ភីរម្យ បានទទួលជ័យជំនះលើ វ៉ែន សុវណ្ណ ដោយពិន្ទុ។
សុខ លាភ អ្នកប្រដាល់ក្លិបមជ្ឈមណ្ឌលកីឡា ខ.ភ.ម ប្រកួតឈ្នះ ប្រាក់ ស៊ីថន អ្នកប្រដាល់ក្លិបតាឯកដំបងដែកមានរិទ្ធដោយពិន្ទុ។ អ្នកប្រដាល់ទាំងពីរនេះប្រកួតគ្នា៥ទឹកពេញដែរ។ ចំណែកសេក ទីណា អ្នកប្រដាល់ក្លិបអង្គរមានជ័យខេត្តសៀមរាប ប្រកួតចាញ់ យ៉ាម ពន្លក អ្នកប្រដាល់ក្លិបរស្មីកុមារកំព្រាក្នុងទឹកទី២។
*ប៊ុន ឌឿន ឈ្នះ សាវឿន ឯសុខ នីម ឈ្នះចំណាន នៅសង្វៀនស្ទឹងមានជ័យ
ប្រដាល់ ៖ អ្នកប្រដាល់ វៀត ប៊ុនឌឿន អ្នកប្រដាល់សមាគមកីឡាក្រសួងការពារជាតិបានប្រកួតស្មើពិន្ទុជាមួយ ឯម សាវឿន អ្នកប្រដាល់ក្លិបឫទ្ធីពោធិសែនជ័យ កាលពីយប់ថ្ងៃទី២៥ធ្នូ នៅលើសង្វៀនបាយ័នស្ទឹងមានជ័យ។
ឯម សាវឿន បានស្មើជាមួយ វៀត ប៊ុនឌឿន នេះ អាចចាត់ទុកថាជាសំណាងហើយ ព្រោះពីរទឹកចុងក្រោយនោះ សាវឿន មានលក្ខណៈទន់ជ្រាយដូចបបរ បន្តិចដួលៗលើរេញ។ បើកុំតែការប្រកួតក្នុងទឹកដំបូងៗ គេមានប្រៀបលើ ប៊ុនឌឿន នោះ ម្ល៉េះចាញ់ វៀត ប៊ុនឌឿន បាត់ទៅហើយ។
ហួន សុខនីម អ្នកប្រដាល់ក្លិបមហិទ្ធិរិទ្ធតាដំបងដែក បានវាយឈ្នះ ផាន ចំណាន អ្នកប្រដាល់ក្លិបរាជសីហ៍ខេត្តរតនគិរីដោយពិន្ទុ បន្ទាប់ពីប្រកួតគ្នាប្រាំទឹកពេញនោះ។
ស្ថានភាពប្រកួតរបស់ពួកគេទាំងពីរ មានលក្ខណៈមិនឈ្នះចាញ់គ្នាដាច់នោះទេ គឺក្នុងស្ថានភាពប្រផឹតប្រផើយប៉ុណ្ណោះ។ ផាន ចំណាន គេវាយចេញបានច្រើនណាស់ដែរ ប៉ុន្តែមិនសូវចំគោលដៅ និងចំណុចសំខាន់ដែលត្រូវបានពិន្ទុនោះ ទើបគេចាញ់ពិន្ទុ ហួន សុខនីម។
យ៉ាម រ៉េត អ្នកប្រដាល់ក្លិបរស្មីកុមារកំព្រា ប្រកួតចាញ់ ទឹម សាន អ្នកប្រដាល់ជើងចាស់នៃក្លិបកុសលកីឡាដោយពិន្ទុ។ ពីរនាក់នេះវាយគ្នា៥ទឹកពេញដែរ។
នៅក្នុងការប្រកួតនេះ យ៉ាម រ៉េត បានព្យាយាមវាយបុកទៅលើ ទឹម សាន្ត ណាស់ដែរ តែវាយមិនចូលដោយ ទឹម សាន្ត គេបានដឹងជាមុន និងចាំវាយត្រងនិងចាប់ យ៉ាមរ៉េត ហើយអុកនឹងជង្គង់ត្រូវពេញៗតែម្តង។
ឯម ស៊ីថុង អ្នកប្រដាល់ក្លិបឫទ្ធីពោធិសែនជ័យ ប្រកួតចាញ់ ផាត់ សូដា អ្នកប្រដាល់ក្លិបអេភូថងកីឡាដោយពិន្ទុ ខណៈដែល សយ សុខ ក្លិបពន្លឺវិបុលរិទ្ធី ឈ្នះ ម៉ន វីវ៉ា ក្លិបការិយាល័យទី៥ កងទ័ពជើងគោកដោយពិន្ទុដែរ៕
ម៉ន សាម៉េត ឈ្នះសេន កុសល ខណៈវ៉ែន សុវណ្ណ ចាញ់មាស ភារម្យ
0 Comments