ក្រុមចោរ៤នាក់បន្លំចូលទិញសម្ភារៈ ហើយឆ្លៀតឧកាសលួចលុយអស់ជិត១ម៉ឺនដុល្លារ
សៀមរាប ៖ លោកអនុសេនីយ៍ឯក អ៊ុយ ចយ នាយការិយាល័យបទល្មើសព្រហ្មទណ្ឌ នៃកងរាជអាវុធហត្ថខេត្តបានប្រាប់កម្ពុជាថ្មីតាមទូរស័ព្ទដៃរបស់លោកនៅព្រឹកថ្ងៃទី១៥ ខែធ្នូ ឆ្នាំ២០១៥នេះថា ករណីដែលជនសង្ស័យមួយក្រុមបន្លំខ្លួនធ្វើជាចូលទិញមួកសុវត្ថិភាព និងកាតទូរស័ព្ទពីហាងប្តូរប្រាក់មួយកន្លែងនៅចំកណ្ដាលក្រុងសៀមរាប រួចលួចយកលុយពីជនរងគ្រោះអស់ជិត១ម៉ឺនដុល្លារ ហើយរត់គេចខ្លួនបាត់ដោយសុវត្ថិភាពនោះ មកទល់ពេលនេះសមត្ថកិច្ចពុំទាន់បានស្រាវជ្រាវវែកមុខរកឃើញនោះទេ។
គួររំលឹកផងដែរថា ករណីជនសង្ស័យមួយក្រុមបន្លំខ្លួនធ្វើជាចូលទិញមួកសុវត្ថិភាព និងកាត ទូរស័ព្ទពីហាងប្តូរប្រាក់មួយកន្លែងនៅចំកណ្ដាលក្រុងសៀមរាប ហើយលួចយកលុយពីជនរងគ្រោះអស់ជិតមួយម៉ឺនដុល្លាររត់គេចខ្លួនបាត់ដោយសុវត្ថិភាព នេះបានកើតឡើងកាលពីថ្ងៃទី១៤ ខែធ្នូ ឆ្នាំ២០១៥ ស្ថិតនៅចំណុចហាងប្តូរប្រាក់មួយកន្លែងយីហោ”ជីនលី” នៅក្នុងភូមិតាភុល សង្កាត់ស្វាយដង្គំ ក្រុង/ខេត្តសៀមរាប។
បើតាមការឲ្យដឹងពីលោកអនុសេនីយ៍ឯក អ៊ុយ ចយ បានឲ្យដឹងថា ក្រុមជនល្មើសដែលបន្លំខ្លួនចូលលួចទ្រព្យសម្បត្តិអាជីវករប្តូរប្រាក់នោះ មានគ្នា៤នាក់ ក្នុងនោះមានស្រីម្នាក់ផងដែរ ហើយបានធ្វើសកម្មភាពលួចយកប្រាក់ និងកាតទូរស័ព្ទរបស់ជនរងគ្រោះអស់ជិត១០.០០០ដុល្លារអាមេរិក។
បើតាមសម្ដីរបស់បងស្រី មឿង ស្រីផល អាយុ៣៥ឆ្នាំ រស់នៅភូមិកើតហេតុខាងលើបានប្រាប់ឲ្យដឹងថា ទ្រព្យសម្បត្តិដែលជនល្មើសលួចយកអស់ចំនួនលុយដុល្លារ៦.០០០ដុល្លារ លុយខ្មែរចំនួនប្រាំមួយលានរៀល ព្រមទាំងកាតទូរស័ព្ទដៃចំនួន២០០ដុល្លារផងដែរ។ ក្រោយធ្វើសកម្មភាព ជនល្មើសក៏ឡើងជិះម៉ូតូគេចខ្លួនបាត់។
តែទោះបីជាយ៉ាងណាក៏ដោយ ក៏សមត្ថកិច្ចកំពុងតែធ្វើការស្រាវជ្រាវដើម្បីកំណត់នូវមុខសញ្ញាជនល្មើសទាំងនោះហើយដែរ៕
0 Comments