ទូរទស្សន៍រដ្ឋរបស់ប្រទេសអារ៉ាប៊ីសាអ៊ូឌីតបានប្រកាសថា “សម្ព័ន្ធភាពយោធាឥស្លាម” ដែលមានមូលដ្ឋាននៅទីក្រុង Riyadh បានបង្កើតបេសកកម្មមួយ ដើម្បីប្រយុទ្ធប្រឆាំងនឹងអំពើភេរវកម្ម។
ក្រុមចម្រុះនេះមាន៣៤ប្រទេសដោយរួមទាំងរដ្ឋឈូងសមុទ្រពែក បណ្ដាប្រទេសអាហ្វ្រិកមួយចំនួន ប្រទេសទួរគី អេហ្ស៊ីប ម៉ាឡេស៊ី និងប្រទេសប៉ាគីស្ថានផងដែរ។
បណ្ដាប្រទេសដែលបានចូលរួមនៅក្នុងក្រុមចម្រុះនេះក្រៅពីអារ៉ាប៊ីសាអ៊ូឌីតគឺមាន ហ្សកដានី អារ៉ាប់រួម ប៉ាគីស្ថាន បារ៉ែន បង់ក្លាដេស បេណាំង ទួរគី ឆាដ តូហ្គោ ទុយណេស៊ី ជីប៊ូទី សេណេហ្គាល់ ស៊ូដង់ សេរ៉ាឡេអូន សូម៉ាលី ហ្គាបុង ហ្គីណេ ប៉ាឡេស្ទីន កូម៉ូរ៉ូស កាតា កូតឌីវ័រគុយវ៉ែត លីបង់ លីប៊ី ម៉ាល់ឌីវ ម៉ាលី ម៉ាឡេស៊ី អេហ្ស៊ីប ម៉ារ៉ុក ម៉ូរីតានី នីហ្សេរ នីហ្សេរីយ៉ា យេមែន។
ភ្នាក់ងារសារព័ត៌មានរដ្ឋ SPA បានដកស្រង់សេចក្ដីថ្លែងការណ៍មួយ ដែលបានលើកឡើងថា “បណ្ដាប្រទេសនៅទីនេះបានសម្រេចចិត្តលើការបង្កើតសម្ព័ន្ធភាពយោធាមួយ ដែលដឹកនាំដោយអារ៉ាប៊ីសាអ៊ូឌីត ដើម្បីប្រយុទ្ធប្រឆាំងនឹងក្រុមភេរវកម្ម ខណៈដែលមជ្ឈមណ្ឌលសហប្រតិបត្តិរួមមួយគឺមានមូលដ្ឋាននៅទីក្រុង Riyadh ដើម្បីសម្របសម្រួល និងគាំទ្រដល់ប្រតិបត្តិការយោធានេះ”។
ទីស្នាក់ការកណ្ដាលរបស់ក្រុមចម្រុះនេះនឹងមានមូលដ្ឋាននៅទីក្រុង Riyadh ដែលជារដ្ឋធានីរបស់ប្រទេសអារ៉ាប៊ីសាអ៊ូឌីត។
បច្ចុប្បន្ននេះ មានក្រុមចម្រុះមួយចំនួនដែលកំពុងប្រយុទ្ធយ៉ាងសកម្មជាមួយក្រុមភេរវកម្មនានាដូចជាក្រុមរដ្ឋឥស្លាម (IS ឬ ISIS) នៅក្នុងប្រទេសស៊ីរី និងអ៊ីរ៉ាក់។
ក្រុមចម្រុះដែលដឹកនាំដោយអាមេរិកបានប្រមូលការគាំទ្រពីប្រទេសយ៉ាងហោចណាស់៦៥។
ទោះយ៉ាងណាក៏ដោយ របាយការណ៍របស់ប្រព័ន្ធផ្សព្វផ្សាយនានាបានអះអាងថា តាមការពិតមានប្រទេសតិចតួចណាស់ ដែលបានចូលរួមចំណែក ខណៈដែលយន្តហោះរបស់អាមេរិកកំពុងបើកការវាយប្រហារយ៉ាងច្រើនបំផុត។ លើសពីនេះទៅទៀត ក្រុមចម្រុះនេះបានទទួលការរិះគន់ជាអន្តរជាតិដោយសារតែការវាយប្រហារគ្មានប្រសិទ្ធភាព។
ការវាយប្រហារតាមអាកាសរបស់ក្រុមចម្រុះដឹកនាំដោយអាមេរិកនៅក្នុងប្រទេសស៊ីរីមិនដែលទទួលបានការអនុញ្ញាតពីលោកប្រធានាធិបតីស៊ីរី បាសា អាល់អាសាដ ឲ្យចូលទៅក្នុងដែនអាកាសរបស់ប្រទេសនេះនោះទេ។
ទន្ទឹមនឹងនេះដែរ ប្រទេសរុស្ស៊ីបានធ្វើការវាយប្រហារតាមអាកាសរបស់ខ្លួនដោយផ្ទាល់ ដែលផ្ដោតសំខាន់លើក្រុម IS និងក្រុមភេរវកម្មដទៃទៀតនៅក្នុងប្រទេសស៊ីរីចាប់តាំងពីថ្ងៃទី៣០ ខែកញ្ញាមក។
ការវាយប្រហារនេះបានចាប់ផ្តើមតាមសំណើជាផ្លូវការរបស់ក្រុងដាម៉ាស។ យន្តហោះរបស់រុស្ស៊ីបានចេញវាយឆ្មក់អាកាសពីបន្ទាយអាកាស Hmeimim របស់ក្រុងមូស្គូក្នុងតំបន់ Latakia។
ប្រតិបត្តិការដឹកនាំដោយរុស្ស៊ីក៏បានចូលរួមសហការផងដែរជាមួយរដ្ឋាភិបាលក្នុងតំបន់រួមមានស៊ីរី អ៊ីរ៉ង់ និងអ៊ីរ៉ាក់ដែលគេស្គាល់ថា ជាក្រុមចម្រុះ RSII ។
ប្រទេសរុស្ស៊ីបានអំពាវនាវឲ្យមានក្រុមចម្រុះជាសកលមួយ ដើម្បីប្រយុទ្ធប្រឆាំងនឹងក្រុម IS។ លោកប្រធានាធិបតីរុស្ស៊ី វ្លាឌីមៀរ ពូទីន បាននិយាយកាលពីខែវិច្ឆិកាថា លោកចង់បានកិច្ចសហប្រតិបត្តិការជាសកល ដើម្បីប្រយុទ្ធប្រឆាំងនឹងអំពើភេរវកម្ម៕
RT
អារ៉ាប៊ីសាអ៊ូឌីតបង្កើតក្រុមចម្រុះ៣៤ប្រទេស ដើម្បីប្រយុទ្ធជាមួយក្រុមភេរវកម្ម
0 Comments