សៀមរាប ៖ សមត្ថកិច្ចចម្រុះនៃស្រុកជីក្រែងបានថ្លែងប្រាប់កម្ពុជាថ្មីនៅរសៀលថ្ងៃទី១៤ ខែធ្នូថា ៖មានមន្ត្រីអង្គការបរិស្ថានចំនួន៤នាក់ត្រូវបានចាប់ខ្លួនទៅតាមពាក្យបណ្តឹងរបស់ពលរដ្ឋករណីជំរិតទារប្រាក់ពីអ្នកនេសាទ។
ប្រតិបត្តិការចុះបង្ក្រាបករណីជនសង្ស័យជាមន្ត្រីអង្គការបរិស្ថាននេះធ្វើឡើងនៅថ្ងៃទី១២ ខែធ្នូឆ្នាំ២០១៥ ស្ថិតនៅភូមិស្ទឹងជ្រៅ ឃុំអន្លង់សំណរ ស្រុកជីក្រែង។
អធិការនគរបាលស្រុកជីក្រែងលោកវរសេនីយ៍ទោ តូច សាកល បានប្រាប់នៅរសៀលថ្ងៃទី១៤ខែធ្នូ ឆ្នាំ២០១៥ថា ការចាប់ខ្លួននេះធ្វើឡើង ដោយមានពាក្យបណ្ដឹងរបស់អ្នកនេសាទម្នាក់ឈ្មោះហម នី ភេទប្រុស អាយុ៤៩ឆ្នាំ មុខរបរជាអ្នកនេសាទរស់នៅ ភូមិស្ទឹងជ្រៅ ឃុំអន្លង់សំណរ ស្រុកជីក្រែងខេត្តសៀមរាបបានប្រាប់ថា មានមនុស្ស៤នាក់ជាអង្គការដើម្បីអភិវឌ្ឍន៍ និងការពារធនធានធម្មជាតិចុះមកដើម្បីបង្ក្រាបបទល្មើសនេសាទនៅតំបន់នេះ។ លោកបន្តថា ក្រោយពីពួកគេបានបង្ក្រាបអ្នកនេសាទរួចហើយពួកគេក៏បានជំរិតទារប្រាក់ចាប់ពី ៣០ ទៅ៤០ម៉ឺនរៀលបើមិនឲ្យទេពួកគេនឹងកាប់បំផ្លាញកម្ទេចចោលនូវឧបករណ៍នេសាទទាំងអស់នេះ។ លោកបន្ថែមទៀតថា ក្រោយទទួលបានពាក្យបណ្តឹងភ្លាមៗ លោកក៏បានដាក់កម្លាំងជំនាញចុះសហការជាមួយប៉េអឹមស្រុកជីក្រែងដល់កន្លែងកើតហេតុ ហើយបានឃាត់ខ្លួនបាន៤នាក់រួចបញ្ជូនទៅតុលាការ។ លោកបាន បន្ថែមថា ជនសង្ស័យទាំង៤នាក់ខាងលើមាន ទី១ឈ្មោះឈឹម ឈឹង ភេទប្រុស អាយុ៣៨ឆ្នាំមុខរបរបុគ្គលិកអង្គការ ទី២/ឈ្មោះ ចាន់ សុខេន ភេទប្រុសអាយុ ៣២ឆ្នាំ មុខរបរបុគ្គលិកអង្គការ ទី៣/ឈ្មោះ លឹម សាវុន ភេទប្រុសអាយុ ៥២ឆ្នាំ មុខរបរបុគ្គលិកអង្គការ និងទី៤/ឈ្មោះ ខាន់ ទូច ភេទប្រុសអាយុ៤៨ឆ្នាំ មុខរបរបុគ្គលិកអង្គការ អ្នកទាំង៤រស់នៅភូមិកើតហេតុខាងលើ។
បច្ចុប្បន្នជនសង្ស័យទាំង៤នាក់ត្រូវបានកម្លាំងជំនាញបញ្ជូនទៅតុលាការនៅរសៀលថ្ងៃទី១៤ខែធ្នូ ឆ្នាំ២០១៥ដើម្បីចាត់ការតាមផ្លូវច្បាប់៕
ចាប់វៃខ្នោះមន្ត្រីអង្គការបរិស្ថានចំនួន៤នាក់ករណីជំរិតទារប្រាក់ពីអ្នកនេសាទ
0 Comments