សៀមរាប ៖ មេឆ្នោតប្រុស/ស្រីចំនួន៤នាក់ ត្រូវបានកម្លាំងការិយាល័យបទល្មើសព្រហ្មទណ្ឌ នៃកងរាជអាវុធហត្ថខេត្តចុះបង្ក្រាបករណីល្បែងឆ្នោតខុសច្បាប់មួយករណី បន្ទាប់ពីខាងមតិមហាជនបានរិះគន់ថា ល្បែងឆ្នោតបើកដោយសេរីនៅខេត្តសៀមរាប។
ហេតុការណ៍ចុះបង្ក្រាបនេះធ្វើឡើងនៅវេលាម៉ោង២និង៣០នាទីរសៀល ថ្ងៃទី២៦ ខែធ្នូ ឆ្នាំ២០១៥ ស្ថិតនៅខាងលិចផ្សារដើមក្រឡាញ់ ស្ថិតក្នុងភូមិទក្សិណត្បូង សង្កាត់គោកចក ក្រុងសៀមរាប។
លោកវរសេនីយ៍ទោ ថា ដាលុច ប្រធានមន្ទីរយុត្តិធម៌ កងរាជអាវុធហត្ថខេត្ត បានប្រាប់ថា ក្នុងការចុះបង្ក្រាបករណីល្បែងស៊ីសងខុសច្បាប់ខាងលើនេះ គឺយោងតាមបទបញ្ជាលោកឧត្ដមសេនីយ៍ត្រី ប៉ោ វណ្ណនិត មេបញ្ជាការកងរាជអាវុធហត្ថខេត្ត បានឲ្យកម្លាំងក្រោមឱវាទចុះប្រតិបត្តិការរហូតឈានដល់ធ្វើការឃាត់ខ្លួនបានជនសង្ស័យញៀនល្បែង និងមេកន្ទុយលេខប្រុស/ស្រី៤នាក់ រួចបញ្ជូនមកកាន់ទីបញ្ជាការកងរាជអាវុធហត្ថខេត្តដើម្បីធ្វើការសួរនាំ។
លោកបន្តថា អ្នកញៀនល្បែង(ឆ្នោត) និងមេឆ្នោតដែលត្រូវសមត្ថកិច្ចឃាត់ខ្លួនមាន ១-ឈ្មោះ ចាន់ ប៊ុនថង ភេទប្រុស អាយុ៣៥ឆ្នាំ (មេឆ្នោត) រស់នៅភូមិទក្សិណត្បូង សង្កាត់គោកចក ក្រុងសៀមរាប, ២-ឈ្មោះ ទៀង ទីណុច ភេទប្រុស អាយុ៣០ឆ្នាំ (អ្នកចាក់) ស្នាក់នៅភូមិទក្សិណត្បូង សង្កាត់គោកចក ក្រុងសៀមរាប, ៣-ឈ្មោះ ក្រូច ស្រីញ្ញា ភេទស្រី អាយុ២១ឆ្នាំ(អ្នកចាក់) រស់នៅភូមិវាល សង្កាត់គោកចក ក្រុងសៀមរាប និង ៤-ឈ្មោះ មាស កុសល ភេទស្រី អាយុ៣១ឆ្នាំ (អ្នកចាក់) មានទីលំនៅភូមិសាលាកន្សែង សង្កាត់ស្វាយដង្គំ ក្រុងសៀមរាប ព្រមទាំងដកហូតបានវត្ថុតាងរួមមាន អាជ្ញាប័ណ្ណបើកឲ្យលក់ឆ្នោតខ្មែរ១សន្លឹក, ទូរស័ព្ទដៃ១គ្រឿង, ទូរស័ព្ទដៃសម្រាប់មើលលេខឆ្នោត១គ្រឿង, ប្រាក់ខ្មែរ១លាន៥៣ម៉ឺនរៀល, ប្រាក់ដុល្លារ១២៨ដុល្លារ និងសម្ភារៈសម្រាប់កត់ឆ្នោតមួយចំនួនផងដែរ។
បច្ចុប្បន្នកម្លាំងជំនាញរបស់ការិយាល័យព្រហ្មទណ្ឌកងរាជអាវុធហត្ថខេត្តកំពុងរៀបចំសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់។ មហាជននៅរង់ចាំមើលថា តើល្បែងឆ្នោតនៅខេត្តសៀមរាបអាចត្រូវបានសមត្ថកិច្ចបង្ក្រាបបានអស់ ឬយ៉ាងណា? ឬមួយក៏ត្រូវទុកដើម្បីចិញ្ចឹមឆ្នាំងតទៅទៀត ព្រោះអីគេសង្កេតឃើញថា រាល់ថ្ងៃគេឃើញមានបើកលេងដោយសេរី៕
មេឆ្នោតប្រុស/ស្រី៤នាក់ ត្រូវបានអាវុធហត្ថក្របួចជាប់
0 Comments