ភ្នំពេញ ៖ បុរសម្នាក់បានរងរបួសបាក់ជើងទាំង២ បន្ទាប់ពីត្រូវរថយន្ត ម៉ាកឡិចស៊ីស RX 330មួយគ្រឿង ពាក់ស្លាកលេខភ្នំពេញ2AH 0757 បើកវ៉ារថយន្តមួយគ្រឿងទៀត ដែលនៅខាងមុខខ្លួនហើយជ្រុលចូលទៅចំណែកផ្លូវខាងម៉ូតូបណ្ដាលឲ្យបុកទាំងកម្រោល ខណៈដែលកំពុងបើកបរបញ្ច្រាសទិសគ្នា។ ករណីនេះកើតហេតុនៅវេលាម៉ោង១៩និង៣០នាទីយប់ថ្ងៃទី៣១ ខែធ្នូ ឆ្នាំ២០១៥ នៅតាមបណ្តោយផ្លូវជាតិលេខ៤ មុខភូមិព្រៃបឹង សង្កាត់កន្ទោក ខណ្ឌពោធិសែនជ័យ។
ជនរងគ្រោះមាន ឈ្មោះ ស៊ុម ពិសិទ្ធ ភេទប្រុស អាយុ២៩ឆ្នាំ ស្នាក់នៅស្រុកកណ្ដាលស្ទឹង ខេត្តកណ្ដាល និងមានស្រុកកំណើតនៅភូមិតាអិន សង្កាត់ស្នោ ខណ្ឌពោធិ៍សែនជ័យ ដោយរងរបួសបាក់ជើងទាំងពីរ ជិះម៉ូតូមួយគ្រឿង ម៉ាកហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០១៤ ពាក់ស្លាកលេខភ្នំពេញ1CK 4194 រងការខូចខាតយ៉ាងដំណំ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញបុរសរងគ្រោះជិះម៉ូតូមួយគ្រឿងតាមបណ្តោយផ្លូវជាតិលេខ៤ ក្នុងទិសដៅពីលិចទៅកើត ខណៈជិះជិតមកដល់កន្លែងកើតហេតុ ក៏មានរថយន្តម៉ាក RX330 ពណ៌ស ពាក់ស្លាកលេខភ្នំពេញ2AH 0757បើកបរដោយបុរសម្នាក់ក្នុងល្បឿនលឿន នៅពេលមកដល់ចំណុចកើតហេតុរថយន្តនេះបានបន្ថែមល្បឿនវ៉ារថយន្តមួយគ្រឿងទៀត ដែលនៅខាងមុខរថយន្តខ្លួន ហើយបានវ៉ាឆ្វេងជ្រុលចង្កូតចូលទៅចំណែកផ្លូវរបស់ម៉ូតូ បណ្ដាលឲ្យបុកម៉ូតូជនរងគ្រោះ ដែលជិះបញ្ច្រាសទិសគ្នាពេញទំហឹង ធ្វើឲ្យជនរងគ្រោះបាក់ជើងទាំង២ ចំណែកម៉ូតូ និងរថយន្តខូចខាតយ៉ាងដំណំ។ អ្នកបើកបររថយន្តបង្កដោយឃើញសភាពជនរងគ្រោះរបួសធ្ងន់ធ្ងរពេក អ្នកបើកបររថយន្តបង្កបានរត់ចោលរថយន្តនៅកន្លែងកើតហេតុ។
ក្រោយពេលកើតហេតុ ជនរងគ្រោះត្រូវបានបងប្អូនដឹកតាមរថយន្តទៅមន្ទីរពេទ្យដោយខ្លួនឯង ចំណែករថយន្តបង្ក និងម៉ូតូជនរងគ្រោះត្រូវបានប៉ូលិសជំនាញមកវាស់វែងយកទៅរក្សាទុកនៅផ្នែកសណ្ដាប់ធ្នាប់ខណ្ឌ ដើម្បីរង់ចាំធ្វើការដោះស្រាយគ្នានៅពេលក្រោយ៕
បើកឡាន ឡិចស៊ីស វ៉ាគេ ជ្រុលទៅបុកអ្នកជិះម៉ូតូបាក់ជើងទាំងពីរ
0 Comments