កំពង់ឆ្នាំង ៖ នៅព្រឹកថ្ងៃទី២៦ ខែធ្នូ ឆ្នាំ២០១៥នេះ សម្ដេចចៅហ្វាវាំង គង់ សំអុល អមដំណើរដោយឯកឧត្ដម ទេសរដ្ឋមន្ត្រី គុយ សុផល រួមនឹងក្រុមការងារបានចុះសំណេះសំណាល និងពិនិត្យម៉ាស៊ីនបូមទឹកសម្ដេចឪ បូមទឹកទន្លេសង្គ្រោះស្រូវប្រាំងប្រជាពលរដ្ឋ ស្ថិតក្នុងឃុំកំពង់ព្រះគគីរ ស្រុកបរិបូណ៌ ខេត្តកំពង់ឆ្នាំង។
ប្រធានមន្ទីរធនធានទឹក និងឧតុនិយមខេត្តកំពង់ឆ្នាំង លោក ដោក ប៊ុនថុន បានឲ្យដឹងថា ម៉ាស៊ីនរបស់សម្ដេចឪចំនួន២គ្រឿងធំៗនេះ បានបូមទឹកទន្លេបញ្ចូលប្រឡាយមេបន្តបូមតាមម៉ាស៊ីនតូចៗជាច្រើនគ្រឿងទៀត ស្រោចស្រពលើផ្ទៃដីស្រែជាង៣០០ហិកតា ស្ថិតជិតបង្គោលតំបន់៣ ឃុំកំពង់ព្រះគគីរ ស្រុកបរិបូណ៌ ខេត្តកំពង់ឆ្នាំង តំបន់នេះប្រជាពលរដ្ឋធ្វើស្រែប្រាំង ដោយបូមទឹកទន្លេជាធម្មតាជារៀងរាល់ឆ្នាំដោយម្ចាស់ការ ប៉ុន្តែនាពេលនេះ ក្រុមការងាររបស់សម្តេចដោយមើលឃើញទុក្ខលំបាករបស់ប្រជាពលរដ្ឋ និងតម្រូវការចាំបាច់មិនអាចខ្វះបាន ក៏បញ្ជូនម៉ាស៊ីនបូមទឹកខាងលើនេះទាន់ពេលវេលា។
សម្តេចចៅហ្វាវាំង គង់ សំអុល បានមានប្រសាសន៍ទៅកាន់ប្រជាកសិករប្រមាណជាង១០០នាក់ ដែលបានចូលរួម ក្រុមការងារសម្តេចឪគឺជាផ្នែកមួយជួយការងាររបស់រដ្ឋាភិបាលក្នុងការជួយសង្គ្រោះប្រជាពលរដ្ឋទូទៅនាឱកាសនោះផងដែរ សម្តេចចៅហ្វាវាំង គង់ សំអុល បានជូនវត្ថុអនុស្សាវរីយដល់ប្រជាពលរដ្ឋចូលរួម ក្នុងម្នាក់ៗសារុងមួយផងដែរ៕
សម្ដេចចៅហ្វាវាំង គង់ សំអុល ចុះពិនិត្យមើលម៉ាស៊ីនបូមទឹកក្រុមសម្តេចឪ
0 Comments