កំពង់ឆ្នាំង ៖ ការកាប់បំផ្លាញព្រៃឈើតូច និងធំ អង្កន់ធ្វើជាអុសលក់យ៉ាងអានាធិបតេយ្យនៅក្នុងតំបន់ក្តុល ឃុំក្រាំងស្គារ ស្រុកទឹកផុស បានកើតជារៀងរាល់ថ្ងៃរាប់រយគោយន្ត និងរថយន្តត្រូវបានគេរិះគន់ថា ជាភាពអសកម្មរបស់មន្ត្រីជំនាញ និងអាជ្ញាធរមូលដ្ឋានបានបិទភ្នែក និងបើកដៃឲ្យ ដែលករណីនេះប្រជាពលរដ្ឋស្នើសុំលោកអភិបាលខេត្តកំពង់ឆ្នាំង និងជាគណៈបញ្ជាការឯកភាពរដ្ឋបាលខេត្តជួយមានវិធានការណ៍ទប់ស្កាត់ដោយប្រសិទ្ធភាពផង។
ប្រជាពលរដ្ឋរស់នៅក្នុងភូមិក្តុល ឃុំក្រាំងស្គារបានឲ្យដឹងថា ក្នុង១ថ្ងៃៗមានគោយន្តដឹកកូនឈើមិនទាន់គ្រប់អាយុ និងដឹកអុសឆ្លងកាត់ទំនប់ក្តុលរាប់រយគោយន្តយ៉ាងអានាធិបតេយ្យ គ្មានការទប់ស្កាត់ពីអ្នកណាឡើយ គឺអ្នកដឹកជញ្ជូនឈើ និងអុស តាមគោយន្ត ឬរថយន្តត្រូវបង់លុយឲ្យសមត្ថកិច្ចគ្រប់ជាន់ថ្នាក់ជាការស្រេចគឺគ្មានអ្នកណាចាប់ឃាត់ឡើយ។
ប្រភពពីអ្នកដឹកឈើ និងអុសឆ្លងកាត់ឃុំក្រាំងស្គារបានឲ្យដឹងថា ពួកគាត់ត្រូវចំណាយប្រាក់ពី១៥ម៉ឺនទៅ២០ម៉ឺនរៀល បង់ឲ្យសមត្ថកិច្ចគ្រប់ជាន់ថ្នាក់ ទើបឆ្លងកាត់ចេញពីឃុំក្រាំងស្គាររួច ហើយដែលបញ្ហានេះបានកើតមានទៅជាទម្លាប់ជាយូរឆ្នាំមកហើយ។
ដោយឡែកនៅក្នុងនោះក៏មានមេឈ្មួញប្រមូលទិញលក់អុសដ៏សកម្មម្នាក់ប្រចាំឃុំក្រាំងស្គារ ដែលមានខ្នងបង្អែកជាមន្ត្រីជំនាញ និងអាជ្ញាធរមូលដ្ឋានឃុបឃិតនៅពីក្រោយផងដែរ។
ទាក់ទងនឹងករណីខាងលើនេះ មន្ត្រីផ្នែករដ្ឋបាលព្រៃឈើរមាស និងមន្ត្រីរដ្ឋបាលព្រៃឈើសង្កាត់ក្រាំងស្គារបានឲ្យដឹងថា កូនឈើ និងអុសទាំងនេះភាគច្រើនបានដឹកមកពីដីចិនក្នុងខេត្តពោធិ៍សាត់ និងមួយចំនួនទៀតប្រជាពលរដ្ឋបានកាប់ពីតាមក្បាលស្រែ ក្បាលចំការរបស់ពួកគាត់យកមកដុត និងលក់ដូរចិញ្ចឹមឆ្នាំង សមត្ថកិច្ចពិបាកនឹងទប់ស្កាត់ណាស់។ យើងកត់សម្គាល់ថា នៅពេលណាអ្នកកាសែតសួរនាំ មន្ត្រីរដ្ឋបាលព្រៃឈើតែងតែឆ្លើយបែបនេះរហូតជារៀងរាល់ខែ និងរាល់ឆ្នាំ មិនដឹងថាពេលណា ឬឆ្នាំណាប្រជាពលរដ្ឋកាប់ឈើនៅក្បាលស្រែ ឬក្បាលចំការគាត់អស់នោះទេ ជាង២០ឆ្នាំមកនេះឆ្លើយបែបនេះរហូត។
ដោយឡែកលោកអភិបាលស្រុកទឹកផុសកាលពីចុងសប្ដាហ៍មុននេះ លោកបាននិយាយឲ្យក្រុមអ្នកកាសែតដឹងថា លោកនឹងបញ្ជាឲ្យសមត្ថកិច្ចជំនាញទប់ស្កាត់មិនឲ្យកើតមានការកាប់ និងដឹកកូនឈើមិនទាន់គ្រប់អាយុនៅក្នុងឃុំក្រាំងស្គារទៀតឡើយ ចំណែកមេឈ្មួញដឹកអុសនោះ ក៏ត្រូវតែទប់ស្កាត់ដែរ ប៉ុន្តែការសន្យាគ្មានប្រសិទ្ធភាពឡើយ។
ករណីខាងលើនេះប្រជាពលរដ្ឋស្នើសុំលោកអភិបាលខេត្ត និងជាគណៈបញ្ជាការឯកភាពរដ្ឋបាលខេត្តជួយប្រើកណ្ដាប់ដៃសមត្ថកិច្ចចម្រុះខេត្ត ទប់ស្កាត់ដោយប្រសិទ្ធភាពផង ដើម្បីបង្ក្រាបបទល្មើសបំផ្លាញព្រៃឈើយ៉ាងអានាធិបតេយ្យក្នុងទំនប់ខាងលើនេះ៕
ការកាប់បំផ្លាញព្រៃឈើនៅឃុំក្រាំងស្គារ សមត្ថកិច្ចជំនាញ អសកម្ម មិនខ្វាយខ្វល់ មិនទប់ស្កាត់
0 Comments