បន្ទាយមានជ័យ ៖ នៅយប់ថ្ងៃទី២២ ខែធ្នូ ឆ្នាំ២០១៥នេះ នគរបាលខេត្តបន្ទាយមានជ័យបានពង្រឹងសន្តិសុខយ៉ាងម៉ឺងម៉ាត់ជាពិសេសដាក់កម្លាំងពង្រាយតាមគោលដៅសំខាន់ៗនៅក្នុងទីផ្សារដែលមានអាជីវករលក់មាស ដូរប្រាក់ និងវេរប្រាក់ ដែលជាចំណុចប្រឈមសម្រាប់ក្រុមចោរប្លន់ធ្វើសកម្មភាព។
ការរឹតបន្តឹងសន្តិសុខពីសំណាក់កងកម្លាំងនគរបាលខេត្តបន្ទាយមានជ័យនេះក្រោយពីសម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជាបានដាស់តឿនឲ្យកងកម្លាំងនគរបាលទាំងអស់ត្រូវការពារសន្តិសុខជូនប្រជាពលរដ្ឋឲ្យបានម៉ឺងម៉ាត់ក្រោយពីមានអំពើប្លន់ប្រដាប់អាវុធយ៉ាងកក្រើកមួយរយៈចុងក្រោយនៅក្នុងរាជធានីភ្នំពេញ និងតាមបណ្ដាខេត្តក្រុងមួយចំនួននៅក្នុងប្រទេសកម្ពុជា។ បញ្ហាអំពើប្លន់នោះដែរសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃថ្មីៗនេះក៏ធ្លាប់មានប្រសាសន៍ព្រមានបកស័ក្ដិ និងដកតំណែងលោកស្នងនគរបាល៣ខេត្តបើសិនបង្ក្រាបចោរប្លន់មិនបានទេនោះ។ តាមរយៈនៃការអនុវត្តបទបញ្ជាលោកឧត្តមសេនីយ៍ស្នងការនគរបាលខេត្តបន្ទាយមានជ័យកងកម្លាំងនគរបាលបានការពារយ៉ាងប្រុងប្រយ័ត្នប្រកបដោយស្មារតីទទួលខុសត្រូវខ្ពស់ប្រដាប់ដោយអាវុធវែងខ្លីជាប់ដៃ ដោយប្រើប្រាស់កម្លាំងល្បាតតាមរថយន្ត ម៉ូតូ និងដាក់យាមតាមគោលដៅគ្រប់ច្រក។ ការដាក់ការពារពង្រឹងសន្តិសុខសមត្ថកិច្ចធ្វើឡើងនៅក្នុងទីប្រជុំជនសំខាន់ៗនៅក្រុងប៉ោយប៉ែត និងក្រុងសិរីសោភ័ណ ដែលមានមនុស្សកកកុញ ហើយនៅតាមបណ្តាស្រុកមួយចំនួនទៀតក៏អនុវត្តការងារពង្រឹងសន្តិសុខដូចគ្នាផងដែរ។
សូមបញ្ជាក់ថា នៅខេត្តបន្ទាយមានជ័យក្រោយពីមានការរឹតបន្តឹងសន្តិសុខពីសំណាក់កងកម្លាំងនគរបាលគេសង្កេតឃើញថាប្រជាពលរដ្ឋមានភាពកក់ក្តៅ និងមានអារម្មណ៍សប្បាយរីករាយនូវការយកចិត្តទុកដាក់នៃការរក្សាសន្តិសុខបង្ការទប់ស្កាត់បទល្មើសលួចឆក់ប្លន់។នៅពេលនេះ ខេត្តបន្ទាយមានជ័យទោះបីមិនទាន់កើតមានអំពើប្លន់ប្រដាប់អាវុធក៏ដោយក៏ប៉ុន្តែវិធានការបង្ការទប់ស្កាត់ត្រូវបានរឹតបន្តឹង និងធ្វើឡើងជាប្រចាំផងដែរ៕
ខេត្តផ្សេងប្លន់ខ្លាំងពេក នគរបាលខេត្តបន្ទាយមានជ័យចុះពង្រឹងសន្តិសុខ
0 Comments