តារាបាល់ទាត់ Lionel Messi របស់ក្លិប Barcelona បានជាប់ពាក់ព័ន្ធនឹងជម្លោះជាមួយអ្នកគាំទ្រម្នាក់របស់ក្លិប River Plate អំឡុងការប៉ះទង្គិចគ្នាមួយ នៅឯអាកាសយានដ្ឋាន បន្ទាប់ពីក្រុមរបស់គាត់ បានលុតក្រុមមួយនេះ មិនឲ្យងើបមុខរួចដោយលទ្ធផលពិន្ទុ ៣-០ នៅការប្រកួត Club World Cup នៅក្នុងប្រទេសជប៉ុន កាលពីថ្ងៃចន្ទ។ នេះបើយោងតាមសេចក្តីរាយការណ៍ពីកាសែតអេស្ប៉ាញ។
កីឡាករ Messi ដែលជាអ្នករកបានគ្រាប់បាល់បើកឆាក នៅការប្រកួតវគ្គផ្តាច់ព្រ័ត្រ កាលពីថ្ងៃអាទិត្យនោះ បានឲ្យកណ្តាប់ដៃទៅកាន់គូទំនាស់របស់ខ្លួន បន្ទាប់ពីរងការប្រមាថមើលងាយពីក្រុមអ្នកគាំទ្ររបស់ក្លិបអាហ្សង់ទីនមួយនេះ ខណៈពេលដែលលោកត្រៀមឡើងយន្តហោះ នៅក្នុងអាកាសយានដ្ឋានណារីតា របស់ក្រុងតូក្យូ ដើម្បីវិលត្រឡប់មកកាន់ប្រទេសអេស្ប៉ាញវិញ។
កាសែតអេស្ប៉ាញ AS បានរាយការណ៍ថា ឧប្បត្តិហេតុដ៏ភ្ញាក់ផ្អើលមួយ បានកើតឡើងនៅក្នុងព្រលានយន្តហោះ ណារីតា។ នៅពេល ដែលក្រុមកីឡាករ Barcelona ត្រៀមឡើងយន្តហោះ ស្រាប់តែក្រុមអ្នកគាំទ្ររបស់ក្លិប Riverបាននិយាយប្រមាថកីឡាករ Messi។
យោងតាមសេចក្តីរាយការណ៍ជាច្រើន បានអះអាងថា កីឡាករ Messi ដែលលែងអាចគ្រប់គ្រងអារម្មណ៍ខ្លួនឯងបានទៀតនោះ បានតបស្នងវិញជាមួយនឹងកណ្តាប់ដៃស្ពាន់របស់គាត់ គឺមុនពេលដែលគ្រូបង្វឹកក្រុម Barcelona លោក Luis Enrique និងមិត្តរួមក្រុម Javier Mascherano និង Luis Suarez ចូលទៅធ្វើអន្តរាគមន៍ ដើម្បីធ្វើឲ្យស្ថានភាពធូរស្រាលឡើងវិញ។
ទោះបីជាយ៉ាងណាក៏ដោយ កាសែត Mundo Deportivo បានរាយការណ៍ថា កីឡាករ Messi មិនបានតបតអ្វីឡើយ ហើយគាត់ថែមទាំងសើចដាក់គូទំនាស់របស់គាត់ទៀត បើទោះជារូបគាត់រងសម្ពាធនៃការប្រមាថដោយពាក្យសម្ដីយ៉ាងណាក្តី។
ដោយឡែក កាសែត Marca ដែលមានមូលដ្ឋាននៅទីក្រុង Madrid បានរាយការណ៍ថា ក្រុមអ្នកគាំទ្រទាំងនោះ ថែមទាំងបានបង្វែរមុខព្រួញរបស់ពួកគេមកលើកីឡាករ Mascherano ដោយបានចោទប្រកាន់ពួកគេថា “ត្រកួនភ្លេចបឹង”៕
កីឡាករ Lionel Messi មានជម្លោះជាមួយក្រុមអ្នកគាំទ្រក្លិប River Plate ក្រោយការប្រកួត Club World Cup
0 Comments