ភ្នំពេញ ៖ អគ្គស្នងការនគរបាលជាតិ កាលពីព្រឹកថ្ងៃទី០៨ ខែមករា ឆ្នាំ២០១៦ បានធ្វើសន្និសីទព័ត៌មានមួយ ស្តីពីលទ្ធផលប្រតិបត្តិការ អនុវត្តច្បាប់ចរាចរណ៍ផ្លូវគោករយៈពេល៧ ថ្ងៃកន្លងមក និងលទ្ធផល នៃកិច្ចប្រជុំរបស់គណៈកម្មការជាតិសុវត្ថិភាពចរាចរផ្លូវគោកកាលពីរសៀលថ្ងៃទី០៧ ខែមករា កន្លងទៅ។
សន្និសីទសារព័ត៌មាននេះប្រព្រឹត្តិទៅនៅអគ្គស្នងការដ្ឋាននគរបាលជាតិ ក្រោមអធិបតីភាពលោកឧត្តមសេនីយ៍ឯក គៀត ច័ន្ទថារិទ្ធ អគ្គស្នងការរង និងជាអ្នកនាំពាក្យអគ្គស្នងការនគរបាលជាតិ ដោយមានអ្នកសារព័ត៌មានជាតិ និងអន្តរជាតិចូលរួមយ៉ាងច្រើនផងដែរ។
លោក គៀត ច័ន្ទថារិទ្ធ បានមានប្រសាសន៍ថា ក្នុងរយៈពេល៧ ថ្ងៃក្នុងការអនុវត្តនេះ បានរកឃើញមធ្យោបាយល្មើសចំនួន៤៥ ២៨០ គ្រឿង ហើយក្នុងចំនួននេះមានម៉ូតូចំនួន៥៣, ៥៩ ភាគរយ ហើយចំនួនមធ្យោបាយល្មើសទាំងនោះ នគរបាលមិនបានធ្វើការពិន័យទាំង៤៥២៨០ គ្រឿងទេ គឺបានធ្វើការអប់រំមួយចំនួន២៤ ១២១ គ្រឿង ដែលស្មើ៥៣,២៧ ភាគរយ ហើយក្នុងចំនួនខាងលើនេះ ពិន័យ២១ ១៥៩ គ្រឿង។ ក្នុងចំណោមយានយន្តដែលបានពិន័យចំនួន២១ ១៥៩ គ្រឿងនេះ បង់ប្រាក់រួចបានចំនួន៧៨,៩៨ ភាគរយ។ លោក គៀត ច័ន្ទថារិទ្ធ អះអាងថា ក្នុងរយៈពេលនេះដែរ សមត្ថកិច្ចនគរបាលបានឃាត់ទុកនូវយានយន្តគ្មានផ្លាកលេខ ហើយបើកបរលើទ្រូងផ្លូវចំនួន៨០០ គ្រឿង ហើយក្នុងនោះមានឡានចំនួន១៣ គ្រឿង និងម៉ូតូ៧៨៧ គ្រឿងនៅតាមបណ្តាខេត្តចំនួន១៤។ រីឯប្រាក់ពិន័យសរុបមានចំនួន៤០០ លានរៀល។
លោក គៀត ច័ន្ទថារិទ្ធ បានអះអាងថា ឆ្លងតាមការអនុវត្តមួយរយៈខ្លីនេះ យើងសង្កេតឃើញថា មានប្រជាពលរដ្ឋច្រើនលើសលប់ បានចូលរួមគាំទ្រ និងសហការក្នុងអនុវត្តច្បាប់ចរាចរណ័ផ្លូវគោក ដោយសារតែពួកគាត់យល់ពីសារសំខាន់នៃការអនុវត្តច្បាប់នេះ ហើយជាក់ស្តែងប្រជាពលរដ្ឋបានបង្កលក្ខណៈងាយស្រួលដល់នគរបាលចរាចរ ដែលបានធ្វើប្រតិបត្តិការតាមដងផ្លូវ និងបង្កលក្ខណៈឲ្យមន្ត្រីចរាចរបានត្រួតពិនិត្យតាមការស្នើសុំ ដោយមិនមានការគេចវេសឡើយ នៅពេលជិៈជួបជាមួយក្រុមប្រតិបត្តិការ គឺឲ្យនគរបាលបានត្រួតពិនិត្យ ហើយក្នុងរយៈពេលនេះ ការអនុវត្តច្បាប់ ក៍មិនមានការរិះគន់ណាមួយ ដូចជាការប្រើពាក្យសម្តីមិនសមរម្យនោះទេ។ ជាមួយគ្នានោះ ប្រជាពលរដ្ឋបាននាំគ្នាកុះករសម្រុកទៅបំពេញបែបបទផ្សេងៗតាមច្បាប់កមណត់ ដូចជាធ្វើស្លាកលេខ ធ្វើប័ណ្ណបើកបរ ទៅពិនិត្យលក្ខណៈបច្ចេកទេស (ឆៀក) និងទៅបង់ពន្ធយានយន្តជាដើម។
មន្ត្រីអ្នកនាំពាក្យអគ្គស្នងការនគរបាលជាតិបានអះអាងថា នេះគឺជាការបង្ហាញពីការយកចិត្តទុកដាក់ និងចូលរួមអនុវត្តច្បាប់ចរាចរណ៍របស់ប្រជាពលរដ្ឋ ដូច្នេះក្នុងនាមគណៈកម្មការសុវត្ថិភាពចរាចរណ៍ផ្លូវគោក លោកក៏សូមថ្លែងអំណរគុណទៅដល់ប្រជាពលរដ្ឋទូទៅដែលបានចូលរួមអនុវត្តច្បាប់ចរាចរណ៍ ពីព្រោះជាទូទៅគណៈកម្មការមិននឹកស្មានប្រជាពលរដ្ឋបានទៅបង់ប្រាក់ពិន័យមានកម្រិតខ្ពស់បែបនេះនោះទេ ពីព្រោះតាមការកំណត់មិនអនុញ្ញាតឲ្យនគរបាលទទួលការពិន័យនៅនឹងកន្លែងទេ គឺត្រូវ ឲ្យយកទៅបង់នៅការិយាល័យចរាចរណ៍នៅតាមបណ្តារាជធានីខេត្ត ឬនៅតាមអធិការនគរបាលក្រុងស្រុកនីមួយៗ។ លោកបន្តថា លើបញ្ហានេះគណៈកម្មការសុវត្ថិភាពចរាចរណ៍មិនបានចងពួកគាត់ដោយលក្ខខណ្ឌ ណាមួយនោះទេ ដូច្នេះយើងមិននឹកស្មានថា ប្រជាពលរដ្ឋបានទៅបង់លុយពិន័យច្រើននោះទេ ដូច្នេះ ហើយធ្វើឲ្យយើងមានការព្រួយបារម្ភលើការចូលទៅបង់លុយពិន័យនេះ ប៉ុន្តែជាលទ្ធផលនៅតាមការិយាល័យទទួលប្រាក់ពិន័យឃើញប្រជាពលរដ្ឋបានយកលុយទៅបង់ជាបន្តបន្ទាប់។
ជាមួយនឹងការលើកឡើងខាងលើនេះ លោក គៀត ច័ន្ទថារិទ្ធ បានឲ្យដឹងទៀតថា ក្រោយពីការធ្វើការតាមដានក្នុងមួយរយៈពេលនេះ គណៈកម្មការ យើងមិនទទួលបានព័ត៌មានណាមួយទាក់ទងទៅដល់ការប្រើអំពើហិង្សា វាយដំ ពីសំណាក់សមត្ថកិច្ចអនុវត្តច្បាប់ ឬប្រើពាក្យគំរោះគំរើយនោះទេ ហើយអ្វីក៏បានធ្វើជាក់ស្តែងការអនុវត្តន៍ច្បាប់ចរាចរណ៍នា ពេលនេះ គឺមិនបានរឹតបន្តឹង១០០ភាគរយនោះទេ គឺក្នុងនោះមានជាង៥៣ភាគរយ យើងគ្រាន់តែធ្វើការអប់រំប៉ុណ្ណោះ។ ដោយឡែកការចាប់ផ្តើមអនុវត្តន៍នេះ ក្រោយពីការសង្កេតទៅលើគ្រោះថ្នាក់ចរាចរណ៍ប្រៀបធៀបទៅនឹងរយៈពេល៧ថ្ងៃដូចគ្នា មុនចាប់ផ្តើមអនុវត្តន៍ គឺបញ្ហាគ្រោះថ្នាក់ចរាចរណ៍បានថយចុះចំនួន១៩លើក ស្មើនឹង២១ភាគរយ ដូច្នេះជាចំនួនមួយគួរឲ្យចាប់អារម្មណ៍។ បើសង្កេតទៅមើលអ្នកស្លាប់ដោយសារគ្រោះថ្នាក់ចរាចរណ៍ក្នុងរយៈពេល៧ថ្ងៃនេះ គឺបានថយចុះចំនួន១២នាក់ ស្មើនឹង២៦ភាគរយ ប៉ុន្តែបើគិតជាថ្ងៃវិញក្នុងមួយថ្ងៃថយចុះម្នាក់កន្លះ ដូច្នេះបើការអនុវត្តន៍ច្បាប់ចរាចរណ៍ជាបន្តបន្ទាប់ ទៅនឹងធ្វើឲ្យបញ្ហាគ្រោះថ្នាក់ចរាចរណ៍ថយចុះគួរឲ្យចាប់ អារម្មណ៍។
ទាក់ទងនឹងបញ្ហានេះដែរ លោកគៀត ច័ន្ទថារិទ្ធ បានឲ្យដឹងថា បន្ទាប់ពីប្រតិបត្តិការរយៈពេល៧ ថ្ងៃគណៈកម្មការសុវត្ថិភាពចរាចរណ៍ផ្លូវគោក ដែលដឹកនាំដោយសម្តេចក្រឡាហោម ស ខេង បានបើកកិច្ចប្រជុំកាលពីរសៀលថ្ងៃទី០៧ ខែមករា ឆ្នាំ២០១៦ ដើម្បីពិនិត្យមើលទៅលើលទ្ធផល ដែលបានអនុវត្តន៍កន្លងមក ហើយក្នុងនោះគណៈកម្មការបានស្តាប់នូវសំណូមពរមួយចំនួនរបស់ប្រជាពលរដ្ឋ ដើម្បីដោះស្រាយបន្ត គឺក្រោយពីតាមដានបណ្តាញព័ត៌មាន ដែលមានដូចជាវិទ្យុ ទូរទស្សន៍ សារព័ត៌មាន វេបសាយ ហ្វេកប៊ុកជាដើម បានសង្កេតឃើញ៣ ចំណុចសំខាន់ គឺទី១- បញ្ហាដាក់ប័ណ្ណសំគាល់យានយន្តតាមខ្លួន ដែលបញ្ហានេះ សម្តេចអគ្គមហាសេនាបតីតេជោ ហ៊ុន សែន ក៏ដូចជាគណៈកម្មការសុវត្ថិភាពចរាចរណ៍បានសម្រេចដោះស្រាយហើយ ដូចជាបញ្ចប់ការធ្វើប័ណ្ណបើកបរសម្រាប់ម៉ូតូ ចាប់ពី១២៥ សេសេ ជាដើម ហើយបានដោះស្រាយ ដោយឲ្យប្រជាពលរដ្ឋទៅបញ្ជាក់នៅអាជ្ញាធរ ដោយបង់លុយត្រឹមតែ១០០០រៀលប៉ុណ្ណោះ។
ទី២-ទាក់ទងនឹងប័ណ្ណបើកបរ គឺអ្នកបើកបរត្រូវតែមានប័ណ្ណបើកបរជាប់នៅនឹងខ្លួន ពីព្រោះប័ណ្ណបើកបរនេះបញ្ជាក់ពីការរៀនចេះដឹងអំពីច្បាប់ចរាចរណ៍ ហើយសម្តេចក៏បានអំពាវនាវឲ្យប្រជាពលរដ្ឋរៀនច្បាប់ចរាចរណ៍ឲ្យចេះគ្រប់ៗគ្នា ដើម្បីបញ្ចៀសបាននូវគ្រោះថ្នាក់ចរាចរណ៍ដោយឡែកចំណុចទី៣- មានការស្នើឲ្យផ្អាកការអនុវត្តន៍ច្បាប់ចរាចរណ៍ជាបណ្តោះអាសន្នសិន ប៉ុន្តែសម្តេចតេជោ ហ៊ុន សែន ក៏ដូចជាប្រធានគណៈកម្មការសុវត្ថិភាពចរាចរណ៍បានបញ្ជាក់ថា មិនអាចផ្អាកបានទេ គឺត្រូវតែបន្ត ប៉ុន្តែនៅក្នុងដំណាក់កាលនេះ ការអនុវត្តន៍ ក៍មិនតឹងរឹង១០០ភាគរយនោះទេ គឺមានការអប់រំ មានការពន្យល់ ឲ្យពួកគាត់បានយល់ពីបញ្ហាច្បាប់ចរាចរណ៍។
ដោយឡែកទាក់ទងបញ្ហាទី៣នេះ ក៏មានការពិភាក្សាទៅលើករណីដែលព្រះសង្ឃជិះម៉ូតូ ថាតើគួរត្រូវពាក់មួកដែរ ឬយ៉ាងណា? ប៉ុន្តែចំណុចនេះសម្តេចក្រឡាហោមបានស្នើឲ្យពិភាក្សាជាមួយក្រសួងធម្មការជាមុនសិន ថាតើព្រះសង្ឃ ពាក់មួកសុវត្ថិភាពទៅមានប៉ះពាល់ទៅដល់វិន័យរបស់ព្រះពុទ្ធដែរឫទេ ប៉ុន្តែប្រសិនបើមិនប៉ះពាល់ទេ គួរតែពាក់មួកសុវត្ថិភាព ពីព្រោះព្រះសង្ឃក៏ជាប្រជាពលរដ្ឋ ហើយក៏ដើម្បីសុវត្ថិភាពតែប៉ុណ្ណោះ។
ថ្លែងទាក់ទងទៅនឹងការអនុវត្តច្បាប់នេះដែរ មន្ត្រីអ្នកនាំពាក្យអគ្គស្នងការនគរបាលជាតិបានបញ្ជាក់ថា សម្រាប់ម៉ូតូ និងរថយន្ត ដែលបានឃាត់ទុកចំនួន៨០០ គ្រឿងនៅក្នុងពេលអនុវត្តច្បាប់នេះដែរ សម្តេចក្រឡាហោមស ខេង បានតម្រូវឲ្យគណៈកម្មការសុវត្ថិភាពចរាចរណ៍រាជធានីខេត្តប្រាប់ទៅម្ចាស់យាន្តយន្តទាំងនោះ ឲ្យមកយកទៅវិញ ដោយមិនមានការពិន័យអ្វីទេ ប៉ុន្តែទន្ទឹមនឹងនេះ ក៏មានភ្ជាប់លក្ខខណ្ឌមួយចំនួនផងដែរ គឺនៅពេលក្រោយប្រសិនបើចាប់បានម៉ូតូ ដែលគ្មានស្លាកលេខដដែល គឺត្រូវពិន័យ៣ ម៉ឺនរៀល។ ជាមួយគ្នានោះ សម្តេចក្រឡាហោមបានជំរុញឲ្យស្ថាប័នពាក់ព័ន្ធ ដែលមានគយជាដើម ធ្វើយ៉ាងណាខិតខំសំរួលឲ្យប្រជាពលរដ្ឋបានចូលទៅបង់ពន្ធ និងធ្វើផ្លាកលេខ ព្រមទាំងបំពេញឯកសារផ្សេងៗទៀតឲ្យបានលឿន ដើម្បីចូលរួមអនុវត្តច្បាប់ទាំងអស់គ្នា។
លោកឧត្តមសេនីយ៍ឯក គៀត ច័ន្ទថារិទ្ធ អគ្គស្នងការរង និងជាអ្នកនាំពាក្យអគ្គស្នងការនគរបាលជាតិ បានបញ្ជាក់ថា នៅក្នុងកិច្ចប្រជុំនោះដែរ សម្តេចក្រឡាហោម ស ខេង បានណែនាំឲ្យបង្កើតអន្តរក្រសួង ដែលមានក្រសួងសាធារណការ ក្រសួងយុត្តិធម៌ និងក្រសួងសេដ្ឋកិច្ច ជាដើម រៀបចំធ្វើវិសោធនកម្មច្បាប់ស្តីពីចរាចរណ៍ផ្លូវគោកលើមាត្រាមួយចំនួន ឲ្យស្របតាមគោលនយោបាយរបស់រាជរដ្ឋាភិបាល ដែលសម្តេចតេជោ ហ៊ុន សែន បានសម្រេចកន្លងមក និងរៀបចំតុមូល ដើម្បីផ្សព្វផ្សាយច្បាប់ស្តីពីចរាចរណ៍ផ្លូវគោកឲ្យបានទូលំទូលាយដល់ប្រជាពលរដ្ឋ និងបើកឲ្យប្រជាពលរដ្ឋបានសាកសួរនូវអ្វីដែលពួកគាត់ឆ្ងល់។
ជាមួយគ្នានោះ ក្នុងនាមគណៈកម្មការជាតិសុវត្ថិភាពចរាចរណ៍ផ្លូវគោក សម្តេចក្រឡាហោម ស ខេង បានរិះរកធ្យោបាយណាមួយ ដើម្បីគ្រប់គ្រងរថយន្តចង្កូតស្តាំឲ្យបានល្អ ចៀសវាងកុំឲ្យមានការនាំចូលមកទៀត ដូចជាត្រូវធ្វើប័ណ្ណសំគាល់ជាដើម ហើយត្រូវលើកទឹកចិត្តយានដ្ឋានឲ្យខិតខំកែច្នៃឲ្យមានគុណភាព តែមិនត្រូវលុបចោលទេ ពីព្រោះរថយន្តល្អៗ ក៏កើតចេញពីការកែច្នៃនេះដែរ៕
ពាក់ព័ន្ធនឹងករណី ថាតើព្រះសង្ឃពាក់មួកសុវត្ថិភាពបានដែរឬទេ? កំពុងស្ថិតក្នុងការពិភាក្សា
0 Comments