ស្វាយរៀង​អែ​ហ្វ​ស៊ី នាំ​យក​កីឡាករ​ជប៉ុន​ម្នាក់​ ប្រកប​អាជីព​នៅ​សិង្ហបុរី​មក​ធ្វើតេស្ត​

បាល់ទាត់ ៖ ក្លិប​បាល់ទាត់​ស្វាយរៀង​អែ​ហ្វ​ស៊ី កំពុងតែ​ធ្វើ​តេស្ដ​កីឡាករ​បរទេស​ជនជាតិ​ជប៉ុន​១​នាក់ ដើម្បី​ត្រៀម​រដូវ​កាល​ថ្មី ​ក្នុង​ពានរង្វាន់​មិត្ត​ហ្វូ​ន​ខេ​ម​បូ​ឌា​ន​លី​ក ២០១៦ (Metfone Cambodian League 2016) ដែល​នឹង​ចាប់ផ្ដើម​នៅ​ខែ​កុម្ភៈ ដើម​ឆ្នាំ​ក្រោយ។

យោង​តាម​ប្រភព​មកពី​ក្លិប​ជើងឯក​ពានរង្វាន់​សម្ដេច​តេ​ជោ Hun Sen Cup 2015 កន្លងទៅ​បាន​ឲ្យ​ដឹង​ថា ​កីឡាករ​ម្នាក់​នោះ​ឈ្មោះ Hikuro Mizuno ជា​ខ្សែបម្រើ​មកពី​ក្លិប​Albirex Niigata Singapore FC របស់​សិង្ហបុរី។ កន្លងមក ​មាន​កីឡាករ​បរទេស​ទាំង​៣​នាក់ ​សុទ្ធ​សឹង​ជា​ខ្សែប្រយុទ្ធ​ទាំងអស់ ហើយ​នាំ​យក​មកពី​ប្រទេស​កំណើត​ពួកគេ​មក​ធ្វើតេស្ត​ដូចគ្នា​ ដោយមាន​កីឡាករ​ជនជាតិ អ៊ុយ​ក្រែ​ន ម្នាក់ កីឡាករ​ជនជាតិ អ៊ូ​ហ្គា​ន់​ដា ម្នាក់ ​និង​កីឡាករ​ជនជាតិ​ឆែក​ម្នាក់។

ប្រភព​បាន​អះអាង​ថា​ កីឡាករ​បរទេស​ទាំងអស់​នេះ ​ក្លិប​មិនទាន់​ចុះ​កិច្ច​សន្យា​ជាមួយ​នៅ​ឡើយ​នោះ​ទេ ព្រោះ​ពួកគេ​ស្ថិត​ក្នុង​ដំណាក់កាល​ធ្វើតេស្ត។

ស្វាយរៀង​អែ​ហ្វ​ស៊ី មាន​គម្រោង ​ត.​កិច្ចសន្យា​ជាមួយ​កីឡាករ​បរទេស​របស់​ខ្លួន​តែ​ម្នាក់​ប៉ុណ្ណោះ​ គឺ​កីឡាករ Kipson ខណៈ​កីឡាករ​ផ្សេងៗ​ទៀត​បាន​បញ្ចប់​កិច្ចសន្យា​អស់ហើយ។

លោក សំ វ៉ាន់​ដេ​ត គ្រូ​បង្វឹក​ប្រចាំ​ក្រុម​កំពុង​ពង្រឹង​ក្រុម​បន្ថែម​ទាំង​ហ្វឹកហាត់ និង​ប្រកួត​មិត្តភាព​ដើម្បី​ចូលរួម​ទាំង​ក្នុង​ពានរង្វាន់ Hun Sen Cup 2016 ក៏ដូចជា​ពានរង្វាន់​មិត្ត​ហ្វូ​ន​ខេ​ម​បូ​ឌា​ន​លី​ក ២០១៦​ផង​ដែរ។

សម្រាប់​ស្វាយរៀង​អែ​ហ្វ​ស៊ី បាន​បញ្ចប់​យុទ្ធនាការ​ពានរង្វាន់​មិត្ត​ហ្វូ​ន​ខេ​ម​បូ​ឌា​ន​លី​ក ២០១៥ របស់​ខ្លួន​ដោយ​ឈរ​ចំណាត់ថ្នាក់​លេខ​៦ ក្រោយ​ប្រកួត​នៅ​វគ្គ​សន្សំ​ពិន្ទុ​២២ លើក​ឈ្នះ​បាន​១០​លើក ស្មើ​៥​លើក​ និង​ចាញ់​៧​លើក ​មាន៣៥ពិន្ទុ ខណៈ​ក្រុម​ក្រសួងការពារជាតិ​ឈរ​ចំណាត់ថ្នាក់​លេខ​៥ បន្ទាប់ពី​ប្រកួត​បាន​២២​លើក​ ឈ្នះ​បាន​១២​លើក ស្មើ​២​លើក ​និង​ចាញ់​៨​លើក​ មាន​៣៨​ពិន្ទុ៕

 

​

ស្វាយរៀង​អែ​ហ្វ​ស៊ី នាំ​យក​កីឡាករ​ជប៉ុន​ម្នាក់​ ប្រកប​អាជីព​នៅ​សិង្ហបុរី​មក​ធ្វើតេស្ត​