ភ្នំពេញ ៖ ក្រសួង អប់រំ យុវជននិងកីឡានឹងប្រលងជ្រើសរើសសិស្សពូកែ ទូទាំងប្រទេសចាប់ថ្ងៃ ទី២៥ ខែមេសា ឆ្នាំ២០១៦ និងថ្ងៃបន្តបន្ទាប់នៅមណ្ឌលប្រឡង១០ មករា ១៩៧៩ ខេត្តសៀមរាម ។
ពាក់ព័ន្ធនឹងការប្រលងនេះក្រសួងអប់រំបានចេញនូវសេចក្តីណែនាំ ពីការប្រឡងជ្រើសរើសសិស្សពូកែប្រចាំរាជធានី\ខេត្ត និងទូទាំងប្រទេសនៅគ្រឹះស្ថានមធ្យមសិក្សាដើម្បីពង្រឹងគុណភាពអប់រំ និងអភិវឌ្ឍន៍ធនធានមនុស្សនៅកម្ពុជាឲ្យកាន់ តែមានប្រសិទ្ធភាព។
ក្នុងនោះបានជំរុញឲ្យមន្ទីរអប់រំ យុវជន និង កីឡា ខេត្តសៀមរាប និងសាមីគ្រឹះស្ថាន សិក្សាដែលត្រូវយកធ្វើជាមណ្ឌលប្រឡង មានភារកិច្ចរៀបចំមណ្ឌលប្រឡង និងសម្ភារៈចាំបាច់សម្រាប់ការប្រព្រឹត្តទៅនៃការប្រឡងឲ្យហើយស្រេចមុនបើកសម័យប្រឡង ហើយត្រូវសហការជាមួយនាយកដ្ឋានមធ្យមសិក្សាចំណេះទូទៅក្នុងការរៀបចំពិធីបើក ពិធីបិទ ការចែករង្វាន់ និងដំណើរ ការកម្សាន្តរបស់បេក្ខជន។
នៅក្នុងខ្លឹមសារនៃសេចក្តីណែនាំ ដែលបានចេញផ្សាយ កាលពីពេលថ្មីៗនេះបានណែនាំដល់ មន្ទីរអប់រំយុវជន និងកីឡារាជធានី \ខេត្តត្រូវម្ចាស់ការរៀបចំគារប្រឡងជើរើសរើសសិស្សពូកែប្រចាំរាជធានី\ខេត្តលើផ្នែក អក្សរសិល្ប៍ខ្មែរ គណិតវិទ្យា និងរូបវិទ្យា ថ្នាក់ទី៩និងថ្នាក់ទី១២នៅក្នុងខែមិនាតាមលទ្ធភាព និងគំនិតច្នៃប្រឌិតផ្ទាល់តាមមុខវិជ្ជា និងតាមថ្នាក់នីមួយៗរួចបញ្ជូនបេក្ខភាពមកចូលរួមប្រឡងជ្រើសរើសសិស្សពូកែ នៅទូទាំងប្រទេសតាមចំនួន ដូចកំណត់ក្នុងតារាងបែងចែកជូនភ្ជាប់មកជាមួយ។
សេចក្តីណែនាំនោះក៏បានឲ្យសិស្សពូកែថ្នាក់ទី៩ និងទី១២ នៃគ្រឹះស្ថានមធ្យមសិក្សាចំណេះទូទៅឯកជនអាចចូលរួមក្នុងការប្រឡងជ្រើសរើសសិស្សពូកែប្រចាំរាជធានី\ខេត្តតាមរាជធានីខេត្តរបស់ខ្លួនជាមួយគ្រឹះស្ថានមធ្យមសិក្សា ចំណេះទូទៅសាធារណៈដែរ។ ដោយឡែកវិទ្យាល័យអនុវត្តត្រូវចូលរួមប្រឡងជ្រើសរើសសិស្សពូកែថ្នាក់រាជធានីជាមួយគ្រឹះស្ថាន មធ្យមសិក្សានានាក្រោម ឱវាទមន្ទីរអប់រំ យុវជន និងកីឡារាជធានី ភ្នំពេញ។ ប្រធានវិញ្ញាសាប្រឡងជ្រើសរើសសិស្សពូកែប្រចាំរាជធានី ខេត្តជា សមត្ថកិច្ចរបស់មន្ទីរអប់រំ យុវជន និងកីឡា រាជធានី-ខេត្តសាមី។
សេចក្តីណែនាំដដែលនោះបានបញ្ជាក់ទៀតថា មន្ទីរអប់រំយុវជន និងកីឡាខេត្ត សៀមរាបមានភារកិច្ចអញ្ជើញអភិបាលនៃគណៈអភិបាលខេត្ត ដើម្បីថ្លែងសន្ទរកថា បើក និងចូលរួមជាកិត្តិយសអមដោយ កម្លាំងសមត្ថកិច្ច និងមន្ទីរពាក់ព័ន្ធក្នុងខេត្ត ទាំងកម្មវិធីបើក ពិធីបិទនិងចែករង្វាន់ដល់ ជ័យលាភី និងរៀបចំកម្មវិធីដំណើរកម្សាន្តរបស់បេក្ខជន ដោយធ្វើលិខិតស្នើសុំទៅអាជ្ញាធរ ដើម្បីស្នើសុំកម្លាំងមានសមត្ថកិច្ច និងអាជ្ញាធរមូលដ្ឋានជូនដំណើររក្សាសន្តិសុខ សុវត្ថិភាព ក៏ដូចជាជួយសម្របសម្រួលលើការងារផ្សេងៗសំដៅ ធ្វើឲ្យដំណើរកម្សាន្តនេះប្រកបដោយជោគជ័យ៕
ក្រសួងអប់រំ នឹងប្រឡងជ្រើសរើសសិស្សពូកែ ប្រចាំរាជធានី-ខេត្ត នៅចុងខែមេសា
0 Comments