ភ្នំពេញ ៖ រដ្ឋមន្ត្រីការបរទេស និងពាណិជ្ជកម្មហុងគ្រី លោក Péter Szijjártó នឹងអញ្ជើញមកបំពេញទស្សនកិច្ចរយៈពេល២ ថ្ងៃនៅកម្ពុជា ដើម្បីពង្រឹង និងពង្រីកបន្ថែមទៀតនូវទំនាក់ទំនងជាប្រពៃណី ដែលមានស្រាប់ និងកិច្ចសហប្រតិបត្តិការល្អ លើគ្រប់វិស័យរវាងប្រទេសទាំងពីរ នេះបើតាមសេចក្តីប្រកាសក្រសួងការបរទេស។
តាមសេចក្តីជូនព័ត៌មានរបស់នាយកដ្ឋានព័ត៌មាន និងឯកសារនៃក្រសួងការបរទេសកម្ពុជា ចុះថ្ងៃទី០៨ ខែមករា ឆ្នាំ២០១៦ បានឲ្យដឹងថា តាមការអញ្ជើញរបស់លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិលោកពិទ័រ ហ្ស៊ីហ្សារតូ (Péter Szijjártó) រដ្ឋមន្ត្រីការបរទេសនិងពាណិជ្ជកម្មនៃប្រទេស ហុងគ្រី នឹងដឹកនាំគណៈប្រតិភូអញ្ជើញមកបបំពេញទស្សនកិច្ចផ្លូវការ នៅព្រះរាជាណាចក្រកម្ពុជា រយៈពេលពីរថ្ងៃ គឺចាប់ពីថ្ងៃទី១៣ ដល់ថ្ងៃទី១៤ ខែមករា ឆ្នាំ២០១៦ ដើម្បីពង្រឹង និងពង្រីកបន្ថែមទៀតនូវទំនាក់ទំនអជាប្រពៃណី ដែលមានស្រាប់ និងកិច្ចសហប្រតិបត្តិការល្អលើគ្រប់វិស័យរវាងប្រទេសទាំងពីរ។
សេចក្តីជូនព័ត៌មានរបស់ក្រសួងការបរទេស និងសហប្រតិបត្តិការអន្តរជាតិកម្ពុជា បានឲ្យដឹងដែរថា ក្នុងអំឡុងពេលទស្សនកិច្ចនៅកម្ពុជានេះ លោក ពិទ័រ ហ្ស៊ីហ្សារតូ នឹងជួបសម្តែងការគួរសមជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ហើយលោកពិទ័រ ហ្ស៊ីហ្សារតូ នឹងជួបពិភាក្សាទ្វេភាគីជាមួយលោកឧបនាយករដ្ឋមន្ត្រី ហោ ណាំហុង ជាមួយលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងពាណិជ្ជកម្ម។ ក្រៅពីនេះ លោកពិទ័រ ហ្ស៊ីហ្សារតូ នឹងអញ្ជើញទៅទស្សនាអគារពាណិជ្ជកម្មមេគង្គ-ហុងគ្រី៕
រដ្ឋមន្ត្រីការបរទេស និងពាណិជ្ជកម្មហុងគ្រី នឹងអញ្ជើញមកបំពេញទស្សនកិច្ច នៅកម្ពុជារយៈពេល២ថ្ងៃ
0 Comments