បន្ទាយមានជ័យ ៖ សិក្ខាកាមជិត៥០នាក់បានចូលរួមសិក្ខាសាលាស្ដីពីសុវត្ថិភាពរមណីយដ្ឋានបេតិកភណ្ឌវប្បធម៌ជាតិអស់រយៈ៥ថ្ងៃកន្លងផុតទៅនៅល្ងាចថ្ងៃទី៨ ខែមករា ឆ្នាំ២០១៦នៅសណ្ឋាគារព្រះច័ន្ទក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ បានធ្វើពិធីបិទសិក្ខាសាលានេះ។ ពិធីនេះមានការចូលរួមពី លោក ប្រាក់ សុវណ្ណារ៉ា អគ្គនាយកបេតិកភណ្ឌនៃក្រសួងវប្បធម៌ និងវិចិត្រសិល្បៈ លោកស្រី ប៉ុក ណាឌី អភិបាលរងខេត្តបន្ទាយមានជ័យ និងមន្ត្រីអមដំណើរជាច្រើននាក់ទៀត។
លោក ប្រាក់ សុវណ្ណរ៉ា បានមានប្រសាសន៍ថា ក្នុងសិក្ខាសាលានោះមានគោលបំណងចង់ឲ្យប្រជាពលរដ្ឋទាំងអស់ចូលរួមថែរក្សាស្ថានីយបុរាណ ដែលមានជាង៤.០០០កន្លែងនៅពាសពេញផ្ទៃប្រទេសកម្ពុជានេះ។
លោក ប្រាក់ សុវណ្ណរ៉ា បានបញ្ជាក់ទៀតថា សិក្ខាសាលានេះវាមានសារសំខាន់ណាស់ ដើម្បីចែករំលែកចំណេះដឹង បទពិសោធន៍ និងកិច្ចសហការល្អទៅវិញទៅមកដល់មន្ត្រី ដែលជាថ្នាក់ដឹកនាំ ក៏ដូចសិក្ខាកាម ដែលជាមន្ត្រីមកពីស្ថាប័នជំនាញ និងស្ថាប័នពាក់ព័ន្ធដទៃទៀត ក្នុងការអភិរក្ស ការពារ ថែរក្សា និងគ្រប់គ្រងរមណីយដ្ឋានបេតិកភណ្ឌជាតិនេះ។
លោក ប្រាក់ សុវណ្ណរ៉ា បានបញ្ជាក់ទៀតថា ស្ថានីយបុរាណមួយចំនួន ត្រូវបានអន្តរជាតិចាប់អារម្មណ៍ពីសំណាក់អ្នកស្រាវជ្រាវ ហើយស្ថានីយបុរាណទាំងអស់នេះកំពុងទាក់ទាញភ្ញៀវទេសចរ ដែលជាប្រយោជន៍ក្នុងការអភិវឌ្ឍសេដ្ឋកិច្ច។ ហើយទន្ទឹមនេះក៏ជាគោលដៅនៃការបំផ្លាញជីករុករកវត្ថុបូរាណនេះ ដើម្បីជួញដូរ និងធ្វើចរាចរផងដែរ ហើយសព្វថ្ងៃនេះបញ្ហាដែលប្រឈមខ្លាំងជាងគេគឺប្រាសាទ និងស្ថានីយបូរាណមួយចំនួន ដែលនៅដាច់ស្រយាលកំពុងតែទទួលការជីកកកាយបំផ្លាញក្នុងពេលមានការធ្វេសប្រហែសពីអាជ្ញាធរមានសមត្ថកិច្ច និងកង្វះកិច្ចសហប្រតិបត្តិការជាមួយអាជ្ញាធរពាក់ព័ន្ធជាដើម។
លោក ប្រាក់ សវណ្ណរ៉ា បានបញ្ជាក់ទៀតថា គួរឲ្យសោកស្ដាយ បើទោះបីជាយើងមានច្បាប់ការពារបេតិកភណ្ឌជាតិនេះយ៉ាងណាក៏ដោយ ក៏ជនខិលខូចមួយចំនួនបានបំផ្លាញសម្បត្តិវប្បធម៌ នៅតែកើតមានឡើងពិបាកនឹងធ្វើការទប់ស្កាត់យ៉ាងខ្លាំង។ ពាក់ព័ន្ធនឹងបញ្ហាខាងលើនេះលោកសង្ឃឹមថាសិក្ខាកាមទាំង៥០នាក់បានចូលមកសិក្ខាសាលានេះ ដើម្បីយល់ឲ្យបានច្បាស់នូវសុវត្ថិភាពរមណីយដ្ឋានបេតិកភណ្ឌវប្បធម៌ជាតិ ដែលកំពុងប្រព្រឹត្តឡើងនេះ ដើម្បីចូលរួមក្នុងជួយរិះរកវិធីសាស្ត្រ ធ្វើការទប់ស្កាត់ និងការបំផ្លាញជីកកកាយសម្បត្តិវប្បធម៌ជាតិនេះបន្តទៀត។
គួរបញ្ជាក់ផងដែរថា សិក្ខាសាលានេះសិក្ខាកាមបានចូលរួមការពិភាក្សា បញ្ចេញមតិយោបល់យ៉ាងផុលផុស ដើម្បីទទួលបានលទ្ធផលល្អ ក្រោយពីបញ្ចប់វគ្គនេះទៅ៕
បិទសិក្ខាសាលាស្ដីពី សុវត្ថិភាពរមណីយដ្ឋានបេតិកភណ្ឌវប្បធម៌ជាតិ
0 Comments