កណ្ដាល ៖ ជនសង្ស័យម្នាក់ ត្រូវបាននគរបាលស្រុកស្អាងធ្វើការឃាត់ខ្លួន ខណៈដែលជនសង្ស័យរូបនោះបានទិញគ្រឿងញៀនពីម្តុំចាក់អង្រែ រាជធានីភ្នំពេញ មកប្រើប្រាស់ និងចែកចាយបន្តនៅខេត្តកណ្តាល។
ហេតុការណ៍នេះបានកើតឡើងកាលពីវេលាម៉ោង២១និង៥០នាទីយប់ ថ្ងៃទី០៨ ខែមករា ឆ្នាំ២០១៥ នៅចំណុចភូមិព្រែកថី ឃុំរកាខ្ពស់ ស្រុកស្អាង ខេត្តកណ្តាល។
លោកវរសេនីយ៍ សេង សុជាតិ អធិការស្រុកស្អាងបានប្រាប់ឲ្យដឹងថា ជនសង្ស័យដែលត្រូវឃាត់ខ្លួននោះមានឈ្មោះ ឃឿន ង៉ុក ភេទប្រុស អាយុ២០ឆ្នាំ មុខរបរមិនពិតប្រាកដ មានទីលំនៅភូមិពោធិ៍តាប៉ាង ឃុំស្វាយប្រទាល ស្រុកស្អាង ខេត្តកណ្តាល។
ចំណែកឯវត្ថុតាងចាប់យកបានមានម្សៅក្រាមពណ៌.ស សង្ស័យជាគ្រឿងញៀន (ម៉ាទឹកកក) ចំនួន០១កញ្ចប់ ម៉ូតូចំនួន០១គ្រឿង ម៉ាកស្មាស់ ពណ៌ខ្មៅ ពាក់ស្លាកលេខ ភ្នំពេញ 1BN.3285។
លោកអធិការបានប្រាប់ឲ្យដឹងទៀតថា នៅថ្ងៃកើតហេតុ កម្លាំងអន្តរាគមន៍ស្រុកស្អាងបានល្បាតចំណុចផ្លូវជាតិលេខ២១បេ ក៏ប្រទះឃើញជនសង្ស័យកំពុងជិះម៉ូតូ ស្ថិតចំណុចកើតហេតុខាងលើ យើងក៏បានឃាត់ធ្វើការត្រួតពិនិត្យ បានរកឃើញថ្នាំញៀនប្រភេទម៉ាទឹកកកចំនួន០១កញ្ចប់ ហើយក៏បានឃាត់ខ្លួនជនសង្ស័យ រួមទាំងវត្ថុតាងបញ្ជូនមកអធិការដ្ឋាននគរបាលស្រុកដើម្បីបន្តប្រមូលផ្ដុំសំណុំរឿងតាមនីតិវិធី។
បន្ទាប់ពីធ្វើការសាកសួរ ជនសង្ស័យខាងលើបានសារភាពថា ខ្លួនបានទិញថ្នាំញៀន (ម៉ាទឹកកក) ចំនួន០១កញ្ចប់ ពីចំណុចចាក់អង្រែក្រោម រាជធានីភ្នំពេញ តម្លៃ២០០.០០០រៀល ដើម្បីយកមកប្រើប្រាស់ និងចែកចាយបន្ត៕
ទិញគ្រឿងញៀនពីភ្នំពេញ មកលក់នៅខេត្តកណ្ដាល ត្រូវឃាត់ខ្លួន
0 Comments