ភ្នំពេញ ៖ បុរសជាអ្នកបើករ៉ឺម៉កដឹកបន្លែ ខណៈពេលកំពុងបើកបរសុខៗបានគេចពីម៉ូតូមួយគ្រឿងប៉ុន្តែបានជ្រុលទៅបុករថយន្តគេចតនៅស្ងៀមតាមចិញ្ចើមផ្លូវបណ្ដាលឲ្យខូចខាតផ្នែកខាងមុខយ៉ាងដំណំ បន្ទាប់ពីបុកហើយ ជនបង្កបានព្យាយាមរត់គេចពីចំណុចកើតហេតុ ប៉ុន្តែដោយសាររថយន្តដែលត្រូវម៉ូតូបុកនោះជារបស់ម្ចាស់ក្លិប ទើបគេប្រើសន្តិសុខយាមក្លិបមីតណាយនោះឲ្យដេញចាប់បានមកវិញ ហើយមានការឈ្លោះប្រកែកប្ដឹងផ្ដល់គ្នា ដោយចោទប្រកាន់គ្នាថាក្រុមសន្តិសុខនោះវាយអ្នកបើករ៉ឺម៉ក។
ករណីនេះកើតហេតុនៅវេលាម៉ោង១៩និង២០នាទីយប់ ថ្ងៃទី១ ខែមករា ឆ្នាំ២០១៦ នៅតាមបណ្ដោយផ្លូវវេងស្រេង ទល់មុខក្លិបមីតណាយ ស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។ រ៉ឺម៉កដឹកបន្លែបង្កបើកបរតាមបណ្ដោយផ្លូវវេងស្រេងពីកើតទៅលិច ហើយរថយន្ដរបស់ម្ចាស់ក្លិបចតនៅស្ងៀមតាមចិញ្ចើមផ្លូវ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់បើករ៉ឺម៉កដឹកបន្លែបើកពីកើតទៅលិច បានបើកគេចម៉ូតូមួយគ្រឿង ហើយបានរេទៅបុករថយន្តបណ្តាលឲ្យខ្ទេចមួយចំហៀងខាងឆ្វេងផ្នែកខាងមុខពេញទំហឹង។ បន្ទាប់មក អ្នកបើករ៉ឺម៉កដឹកបន្លែឃើញហេតុការណ៍ដូច្នេះ ក៏បានចុះពីលើរ៉ឺម៉ករត់គេចខ្លួនចូលក្នុងបុរីភូមិត្រពាំងថ្លឹង ហើយអ្នករស់នៅក្នុងបុរីស្មានថាជាចោរដែលគេចពីណាមកបានចាប់ឃាត់ជនបង្កខាងលើប្រគល់ឲ្យសន្តិសុខក្លិបវិញហើយយកជនបង្កទៅកន្លែងកើតហេតុវិញ។
ប្រភពបន្ដថា នៅពេលមកដល់កន្លែងកើតហេតុ បងប្អូនជនបង្កបានចោទប្រកាន់ថា សន្តិសុខក្លិបបានវាយជនបង្កដោយដំបង ទើបបណ្តាលឲ្យរងរបួសរហូតឈានដល់អ្នកបើករ៉ឺម៉កទៅដាក់ពាក្យបណ្តឹងចោទថា សន្តិសុខក្លិបជាអ្នកវាយពួកគាត់។
ប្រភពបន្តថា ចំពោះករណីនេះភាគីខាងសន្តិសុខក្លិបបានបដិសេធបណ្ដឹងខាងភាគីអ្នកបើករ៉ឺម៉កថាមិនបានវាយឡើយ ហើយខាងសន្តិសុខបានប្រាប់ថា បងប្អូនខាងម្ចាស់រ៉ឺម៉កពេលឃាត់មកដល់មុខក្លិបហើយ ពួកគេជេរប្រមាថទៅលើថៅកែស្រីជាម្ចាស់ក្លឹបទៀតផង និងបាននិយាយអួតអាងថា ឡានខូចបន្តិចប៉ុណ្ណឹងអញលក់ដីតែមួយអារសងមិនអស់លុយអញផង។
ក្រោយពេលកើតហេតុ ភាគីខាងរ៉ឺម៉ក និងខាងរថយន្តមិនបានចរចាជាមួយគ្នានៅទីនោះទេដោយឲ្យសមត្ថកិច្ចយករថយន្ត និងរ៉ឺម៉កទៅរក្សាទុកនៅផ្នែកសណ្ដាប់ធ្នាប់ នៃអធិការដ្ឋាននគរបាលខណ្ឌពោធិ៍សែនជ័យដើម្បីរង់ចាំការដោះស្រាយគ្នានៅពេលក្រោយ៕
បើករ៉ឺម៉កគេចពីម៉ូតូទៅបុកឡានចតស្ងៀម រួចរត់គេចខ្លួន ត្រូវគេចាប់មកវិញ
0 Comments