កំពង់ឆ្នាំង ៖ ជនសង្ស័យ២នាក់ត្រូវសាលាដំបូងខេត្តកំពង់ឆ្នាំង បានសម្រេចឃុំខ្លួន ដាក់ក្នុងពន្ធនាគារខេត្តនៅរសៀលថ្ងៃទី១៤ ខែមករា ឆ្នាំ២០១៦ ដោយចោទប្រកាន់ពីបទលួចទូកម៉ាស៊ីននិងធុងបាសរបស់ប្រជាពលរដ្ឋកាលពីយប់ថ្ងៃទី១២ ខែមករា ឆ្នាំ២០១៦នៅ ភូមិក្បាលកន្លង់ ឃុំពាមឆ្កោក ស្រុកជលគីរី ខណៈដែលជនសង្ស័យទាំង២នាក់ខាងលើទៅស៊ីឈ្នួលធ្វើជាកម្មករឲ្យគេនៅទីនោះបានតែ៤ថ្ងៃប៉ុណ្ណោះ។
សមត្ថកិច្ចបានឲ្យដឹងថា ជនសង្ស័យទាំង២នាក់ ម្នាក់ឈ្មោះ គោក ខុង អាយុ២៣ឆ្នាំ មានទីលំនៅ ភូមិស្វាយរំពារ ឃុំស្វាយរំពារ ស្រុកកំពង់លែង និងម្នាក់ទៀតឈ្មោះគៀន សុជា អាយុ១៨ឆ្នាំ មានទីលំនៅភូមិជើងគ្រួស ឃុំស្វាយរំពារ ស្រុកកំពង់លែង។
ចំណែកជនរងគ្រោះជាម្ចាស់ទូកម៉ាស៊ីនមានឈ្មោះ គូ អៀម អាយុ២៩ឆ្នាំ មានទីលំនៅភូមិក្បាលកន្លង់ ឃុំពាមឆ្កោក ស្រុកជលគីរី។
សមត្ថកិច្ចបានរៀបរាប់ឲ្យដឹងថា កាលពីថ្ងៃទី៨ ខែមករាជនសង្ស័យទាំងពីរ២នាក់បានទៅធ្វើជាកម្មករឲ្យឈ្មោះ គូ អៀម ជាម្ចាស់ទូក ដោយសន្យាក្នុងម្នាក់ៗឲ្យប្រាក់ខែ៦០ម៉ឺនរៀល។ នៅថ្ងៃកើតហេតុថ្ងៃទី១២ ខែមករា ឆ្នាំ២០១៦ ទាំង២នាក់បានទៅផឹកស្រា នៅចុងភូមិ ទោះជាម្ចាស់ផ្ទះឈ្មោះ គូ អៀម ប្រើកូនឲ្យទៅហៅមកហូបបាយក៏មិនមកដែរ រហូតម៉ោង៨យប់ទើប ទាំង២នាក់បានត្រឡប់មកវិញដោយ បានឡើងលើផ្ទះ យកកន្ទេលមុងរួចសុំម្ចាស់ផ្ទះទៅដេកលើផែត្រីមាត់ទន្លេ។
លុះដល់ម៉ោងជាង១០យប់ ម្ចាស់ផ្ទះចុះទៅមើលមាត់ទឹកមិនឃើញជនសង្ស័យទាំង២នាក់នោះទេឃើញតែចងមុងចោលគ្មានមនុស្សដេក ហើយក៏ឃើញបាត់ទូកម៉ាស៊ីន១គ្រឿង និងពេលត្រឡប់ឡើងលើផ្ទះវិញឃើញបាត់ធុងបាស១គ្រឿងទៀត ទើបទូរស័ព្ទប្តឹងសមត្ថកិច្ចនគរបាលមូលដ្ឋានតែម្តង។
ក្រោយពីបានទទួលបណ្តឹងនេះ សមត្ថកិច្ចបានស្រាវជ្រាវចាប់ជនសង្ស័យទាំង២នាក់ នៅថ្ងៃទី១៣ ខែមករា ដោយដកហូតបានទូកបំពាក់ម៉ាស៊ីន១គ្រឿង និងធុងបាស១គ្រឿងជាភស្តុតាង រួចបានកសាងសំណុំរឿងបញ្ជូនមកស្នងការនគរបាលខេត្ត។ ដោយឡែកនៅរសៀលថ្ងៃទី១៤ ខែមករានេះ សាលាដំបូងខេត្តសម្រេចឃុំខ្លួនជនសង្ស័យទាំង២នាក់នេះនៅក្នុងពន្ធនាគារខេត្តតែម្តង៕
លួចទូកម៉ាស៊ីននិងធុងបាសគេត្រូវសមត្ថកិច្ចចាប់ខ្លួនបញ្ជូនទៅតុលាការខេត្តឃុំខ្លួនក្នុងពន្ធនាគារ
0 Comments