កីឡាករខ្សែការពារឆ្វេង រស់ សំអឿន បានសម្រេចបន្តចុះកិច្ចសន្យាជាមួយក្លិបបឹងកេតអង្គរ សមាជិកក្នុងលីកកំពូលកម្ពុជា រយៈពេល១ឆ្នាំទៀតពោលគឺក្នុងយុទ្ធនាការប្រកួតពានរង្វាន់មិត្តហ្វូនខេមបូឌានលីក និងពានរង្វាន់សម្តេចតេជោ ហ៊ុន សែន (Hun Sen Cup) ឆ្នាំ២០១៦ នេះ។
កិច្ចសន្យាថ្មីនេះបានព្រមព្រៀងគ្នានៅព្រឹកថ្ងៃព្រសហ្បតិ៍ ទី ១៤ ខែ មករា ឆ្នាំ ២០១៦ រវាងកីឡាករ រស់ សំអឿន ជាមួយលោក បែ មករា អ្នកចាត់ការទូទៅរបស់ក្រុម។ ហ្វេសប៊ុកក្លិបបឹងកេតអង្គរ បានសរសេរថា «Mr.26 នៅជាមួយបឹងកេតអង្គរ បន្តទៀត! បន្ទាប់ពីចរចាគ្នាជាច្រើនសប្ដាហ៍រួចមក ខ្សែការពារឆ្វេង រស់ សំអឿន យល់ព្រមស៊ីញេកិច្ចសន្យាថ្មីរយៈពេលមួយឆ្នាំទៀតជាមួយក្លិបបឹងកេតអង្គរ»។
កីឡាករ រស់ សំអឿន ជាកម្លាំងសំខាន់ក្នុងការជួយឲ្យក្រុមបឹងកេតអង្គរ ឈ្នះជើងឯករងពានរង្វាន់លីកកំពូលកម្ពុជា ឆ្នាំ ២០១៣ និង ២០១៤ ខណៈឆ្នាំ ២០១៥ កន្លងទៅជួយក្រុមឲ្យឈរចំណាត់ថ្នាក់លេខ ៣ ព្រមទាំងឈ្នះជើងឯករងក្នុងពានរង្វាន់ Toyota Mekong Club Championship 2015 ផងដែរ។
ក្នុងនាមជាខ្សែការពារមែន ប៉ុន្ដែកីឡាករ រស់ សំអឿន អាចមានឱកាសស្វែងរកគ្រាប់បាល់បានចំនួន ៤ គ្រាប់ឲ្យក្រុមបឹងកេតអង្គរ ក្នុងពានរង្វាន់មិត្តហ្វូនខេមបូឌានលីក២០១៥ ដោយក្នុងនោះគេបានទាត់ចូលទីក្រុមអាស៊ីអឺរ៉ុប ១ គ្រាប់ ស៊ីម៉ាក់ ១ គ្រាប់ និងក្រុមខេមបូឌានថាយហ្គឺរ ២ គ្រាប់នៅវគ្គដណ្ដើមចំណាត់ថ្នាក់លេខ៣។
ងាកទៅមើលកីឡាករ រស់ សំអឿន មានស្រុកកំណើតនៅខេត្តកណ្តាល ហើយគេបានចូលប្រឡូកជាកីឡាករបាល់ទាត់តាំងពីតូចមកម្ល៉េះ។ រហូតដល់ឆ្នាំ២០១១ សំអឿន បានរំកិលខ្លួនមកចូលរួមជាមួយក្របខណ្ឌលីកកំពូលរបស់កម្ពុជា ដោយលេងឲ្យក្រុមជើងទឹក (ឆ្លាមសមុទ្រ)។ នៅរដូវកាល ២០១៣ ខ្សែការពារវ័យ២១ឆ្នាំរូបនេះបានផ្លាស់មកលេងចំការកៅស៊ូបឹងកេត (បឹងកេតអង្គរ)រហូរដល់សព្វថ្ងៃ៕
ខ្សែការពារ រស់ សំអឿន បន្តកិច្ចសន្យាជាមួយបឹងកេតអង្គរ ១ឆ្នាំទៀត
0 Comments