ព្រឹក​ថ្ងៃ​សុក្រ​ ក្លិប Muangthong United របស់​ថៃ​ធ្វើ Football Clinic នៅ​ទីលាន​របស់​ភ្នំពេញ​ក្រោ​ន

ក្លិប​បាល់ទាត់ SCG Muangthong United ជើងឯក​រង​ក្នុង​ពានរង្វាន់​លី​ក​បាល់ទាត់​កំពូល​របស់​ប្រទេស​ថៃ បានធ្វើ​ដំណើរ​មកដល់​ប្រទេស​កម្ពុជា នៅវេលា​ម៉ោង​៤ ល្ងាច​ក្នុង​ព្រហស្បតិ៍ ទី ១៤ ខែ មករា កន្លងទៅ ដើម្បី​ត្រៀម​ប្រកួត​មិត្តភាព​មនុស្សធម៌​មួយ​ជាមួយ​ក្រុម Cambodian All Stars នៅ​ថ្ងៃ​សៅរ៍ ចុង​សប្ដាហ៍​នេះ។

យោង​តាម​ប្រភព​មកពី​អ្នក​រៀប​ចំ​ការ​វិធី​បាន​ឲ្យ​ដឹង​ថា ក្លិប SCG Muangthong United ដែល​សំបូរ​ទៅ​ដោយ​កីឡាករ​ឆ្នើមៗ​ក្នុង​ប្រទេស​ថៃ​នឹង​ធ្វើ​កម្មវិធី Football Clinic មួយ​នៅ​ព្រឹក​ថ្ងៃ​សុក្រ ទី១៥ ខែ មករា ឆ្នាំ ២០១៦ លើ​ទីលាន​កីឡដ្ឋាន RSN Stadium របស់​ក្លិប​ភ្នំពេញ​ក្រោ​ន ដែល​មាន​ទីតាំងនៅ​ទឹកដី​ខណ្ឌទួលគោក​។ Football Clinic គឺជា​កម្មវិធី​មួយ​ដែល​អ្នកមាន​ជំនាញ​បាល់ទាត់​ចែករំលែក​បទពិសោធន៍​របស់​ខ្លួន​ជាមួយ​កុមារ​ដែល​មាន​ចំណង់​ចំណូលចិត្ត​លេង​បាល់ទាត់។

ប្រភព​បន្ថែម​ថា យ៉ាងហោចណាស់​មាន​ក្មេងៗ​ប្រហែល​ជាជាង ១០០នាក់​នឹង​ធ្វើ​ដំណើរ​ទៅកាន់​កីឡដ្ឋាន RSN ដើម្បី​ចូលរួម​ក្នុង​ព្រឹត្តិការណ៍​នេះ ដែល​ត្រូវ​ចាប់ពី​វេលា​ម៉ោង ២និង៣០ នាទី​តទៅ​។ ក្រោយ​រៀបចំ​កម្មវិធី Football Clinic រួចរាល់​កីឡាករ​របស់​ក្លិប SCG Muangthong United នឹង​ធ្វើ​ការ​ហ្វឹកហាត់​នៅ​ទីលាន​នោះ​តែម្ដង​ពោល​គឺ​ចាប់ពី​ម៉ោង ៤និង៣០ នាទី​ល្ងាច​រហូតដល់​ម៉ោង ៦ ល្ងាច។

ក្រុម Cambodian All Stars ដែល​បង្កើត​ឡើង​ដោយ​សហព័ន្ធ​កីឡាបាល់ទាត់​កម្ពុជា នឹង​បើកទ្វារ​ទីលាន​ពហុ​កីឡដ្ឋាន​ជាតិ​ក្នុង​រាជធានី​ភ្នំពេញ របស់​ខ្លួន​ទទួល​ស្វាគមន៍​ក្រុម SCG Muang Thong United FC នៅ​ថ្ងៃទី ១៦ ខែ មករា ឆ្នាំ ២០១៦ វេលា​ម៉ោង ៦ ល្ងាច​។ ការ​នេះ​នឹង​មាន​ការផ្សាយ​ផ្ទាល់​នៅ​ប៉ុស្ដិ៍​ទូរទស្សន៍​បាយ័ន​ព័ត៌មាន (BTV News) ផងដែរ​។ ប្រិយមិត្ត​អាច​ចូល​តាមដាន​ទស្សនាការ​ប្រកួត​នេះ​នៅ​ទីលាន​ផ្ទាល់​បាន​ដោយ​ត្រូវ​ជាវ​សំបុត្រ​ក្នុង​តម្លៃ ១ ដុល្លារ និង ២ ដុល្លារ​។ ប្រាក់​បាន​ពី​ការ​លក់​សំបុត្រ​នេះ​នឹង​ផ្ដល់​ជូន​ទៅកាន់​មន្ទីរពេទ្យ​គន្ធ​បុ​ប្ផា​៕

ព្រឹក​ថ្ងៃ​សុក្រ​ ក្លិប Muangthong United របស់​ថៃ​ធ្វើ Football Clinic នៅ​ទីលាន​របស់​ភ្នំពេញ​ក្រោ​ន