ក្រុមអ្នកស្រុករស់នៅតំបន់សហគមន៍ Porter Ranch ស្ថិតនៅតំបន់ភាគខាងជើងទីក្រុងឡូសអាន់ជឺឡេស សហរដ្ឋអាមេរិក កំពុងគិតគូរលើវិធានការបន្ទាប់របស់ខ្លួន បន្ទាប់ពីអភិបាលក្រុង គឺ លោក ជឺរី ប្រោន បានប្រកាសអាសន្ន កាលពីថ្ងៃពុធ ជុំវិញការលេចធ្លាយឧស្ម័ន ដែលបានធ្វើឲ្យពួកគេធ្លាក់ខ្លួនឈឺអស់រយៈពេលជាង ២ ខែមកហើយ។ បច្ចុប្បន្ន លោក ប្រោន បានអំពាវនាវឲ្យមានជម្រើសមួយផ្សេងទៀត ដើម្បីបញ្ឈប់ការលេចឧស្ម័ន នៅក្រោមដី ប្រសិនបើកិច្ចខិតខំបច្ចុប្បន្នមិនទទួលបានជោគជ័យទេនោះ។
សូមបញ្ជាក់ថា ក្រុមហ៊ុន Southern California Gas Co ដែលជាម្ចាស់គ្រប់គ្រងអណ្តូងប្រេងជាកន្លែង ដែលជួបបញ្ហាលេចធ្លាយឧស្ម័ននេះ បានព្យាយាមខួងចូលទៅក្នុងអណ្តូងប្រេងដើម្បី ឲ្យដល់កន្លែងដែលបានលេច។
ដោយឡែក អ្នកស្រុក ដែលរងផលប៉ះពាល់ដោយការលេចឧស្ម័ន ត្រូវបានជម្លៀសចេញពីផ្ទះសម្បែងរបស់ពួកគេ តែយូរៗម្តងពួកគេបានឆៀងចូលមកផ្ទះរបស់ខ្លួន។
លោក ម៉ាត់ ផាគូកូ ម្ចាស់មុខជំនួញតូចមួយ នៅក្នុងតំបន់រងគ្រោះ បានអះអាងថា វាប្រៀបបាននឹងការរស់នៅក្នុងឋាននរក លោកមិនអាចដឹងបានឡើយថា នឹងកើតមានរឿងអ្វីខ្លះ ហើយលោកជឿជាក់ថា លោកនឹងរស់មិនយូរទេ ប្រសិនបើនៅតែបន្តស្រូបក្លិនឧស្ម័នពុលបែបនេះរហូត។
តាមការបញ្ជាក់របស់ លោក ផាគូកូ បានឲ្យដឹងថា អ្នកស្រុកច្រើនណាស់ ដែលបានធ្លាក់ខ្លួនឈឺ ដោយសារតែស្រូបក្លិនពុលរបស់ឧស្ម័នទាំងនេះ ដោយអ្នកខ្លះឈឺក្បាល ស្ទះច្រមុះ និងមានបញ្ហាផ្លូវដង្ហើម៕
ក្រុមអ្នកស្រុក កំពុងចាត់វិធានការ ក្រោយលេចធ្លាយឧស្ម័ននៅទីក្រុងឡូសអាន់ជឺឡេស សហរដ្ឋអាមេរិក
0 Comments