បន្ទាយមានជ័យ ៖ ដើម្បីធានាបានទឹកសម្រាប់ផ្គត់ផ្គង់ ប្រជាពលរដ្ឋក្រុងសិរីសោភ័ណ និងសម្រាប់ស្រោចស្របស្រែប្រាំង លោក លី សារី អភិបាលរងខេត្តបន្ទាយមានជ័យ បានបន្តចុះពិនិត្យទឹកស្ទឹងសិរីសោភ័ណ និងបឹងបួរ អូរប្រឡាយ ស្រែប្រាំង ក្នុងមូលដ្ឋានរបស់ក្រុងសិរីសោភ័ណ និងស្រុកមង្គលបូរី កាលពីថ្ងៃទី ០៧ មករា ២០១៦។
ក្នុងការចុះត្រួតពិនិត្យ ដែលអមទៅដោយប្រធានមន្ទីរកសិកម្ម ប្រធានមន្ទីរសិប្បកម្ម និងឧស្សាហកម្ម អាជ្ញាធរក្រុងសង្កាត់ បានពិនិត្យយ៉ាងយកចិតត្តទុកដាក់លើគោលដៅជាច្រើនកន្លែង។
លោក លី សារី បានឲ្យដឹងទៀតថា ការចុះត្រួតពិនិត្យនេះគឺយោងទៅតាមការយកចិត្តទុកដាក់គិតគូរខ្ពស់ ពីសំណាក់លោក នាយឧត្តមសេនីយ៍ឧបនាយរដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងារចុះជួយខេត្តបន្ទាយមានជ័យ និងលោក គោស៊ុំ សារឿត អភិបាលខេត្តបន្ទាយមានជ័យ ទើបឆ្លៀតឱកាសថ្ងៃរំលឹកខួបអនុស្សាវរីយ៍លើកទី៣៧ នៃទិវាជ័យជំនះ៧ មករា ១៩៧៩-២០១៦។
ចំពោះការចុះត្រួតពិនិត្យនេះ ឃើញថា ស្ថានភាពទឹកនាពេលបច្ចុប្បន្ន កំពុងតែរីងស្ងួត តាមស្ទឹង បឹងបួរ អូរប្រឡាយ និងតាមការណែនាំរបស់ប្រមុខរដ្ឋាភិបាល ក៏ដូចជាអាជ្ញាធរខេត្ត លើការទប់ទឹក និងហាមឃាត់មិនឲ្យមានការបូម បាច និងការធ្វើស្រែប្រាំង តាមតំបន់ដែលត្រូវការទឹកច្រើន ត្រូវបានប្រជាពលរដ្ឋ អនុវត្តន៍ ដើម្បីរក្សាទុកទឹកសម្រាប់ប្រើប្រាស់ប្រចាំថ្ងៃ។
អ្វីដែលគួរឲ្យកត់សម្គាល់ ប្រជាពលរដ្ឋទីរួមស្រុកមង្គលបូរីកំពុងប្រឈម និងបញ្ហាខ្វះទឹកប្រើប្រាស់ ដែលតម្រូវឲ្យខាង ក្រុមហ៊ុនទឹកស្អាត ជីកអណ្តូង និងស្វែងរកប្រភពទឹកឲ្យបានទាន់ពេលជៀសវាងការប្រឈមមុខគ្មានទឹកប្រើប្រាស់។
ក្នុងនោះដែរ លោកក៏បាន អំពាវនាវ ម្តងហើយម្តងទៀត ដល់ប្រជាកសិករដែលធ្វើស្រែប្រាំង ដែលពិនិត្យឃើញថា មិនអាចទទួលបានផល កុំព្យាយាមប្រើប្រាស់ទឹក យកទៅសង្គ្រោះ ពីទីឆ្ងាយដែលការនាំយកទឹកពីទីឆ្ងាយវាធ្វើអោយបាត់បង់ទឹកជាច្រើនទម្រាំទៅដល់គោលដៅ៕
លោក លី សារី បន្តចុះត្រួតពិនិត្យទឹកទុកប្រើប្រាស់ និងស្រោចស្របស្រែប្រាំង
0 Comments