បន្ទាយមានជ័យ ៖ បុរសម្នាក់ ត្រូវបានជនសង្ស័យជិះម៉ូតូដេញកាប់ត្រូវមួយពូថៅចំខ្នងបណ្ដាលឲ្យរងរបួសធ្ងន់នៅវេលាម៉ោង៧យប់ថ្ងៃទី៧ ខែមករា ឆ្នាំ២០១៦ នៅចំណុចខាងមុខផ្សារធំមានជ័យ ស្ថិតក្នុងភូមិតារាងបាល់ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។
លោកវរសេនីយ៍ត្រី ស៊ីវ សុជាតិ អធិការនគរបាលក្រុងសិរីសោភ័ណបានឲ្យដឹងថា ជនរងគ្រោះមានឈ្មោះ ប្រុស សំអុល ភេទប្រុស អាយុ៣៨ឆ្នាំ រស់នៅក្នុងភូមិ១ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។
លោក សុជាតិ បានបញ្ជាក់ទៀតថា មុនពេលកើតហេតុជនសង្ស័យបានជិះម៉ូតូ១គ្រឿងមានគ្នា២នាក់ មិនស្គាល់អត្តសញ្ញាណ បានយកពូថៅកាប់ទៅលើជនរងគ្រោះ ដែលកំពុងជិះម៉ូតូដូចគ្នាចំមួយពូថៅក្រោមបោះដៃផុតខាងឆ្វេងបណ្ដាលឲ្យជនរងគ្រោះរងរបួសធ្ងន់ត្រូវបានក្រុមគ្រួសារដឹកយកទៅមន្ទីរពេទ្យគ្លីនិកចំរើនសុខ ដើម្បីសង្គ្រោះជីវិត។ ហើយប៉ូលិសសន្និដ្ឋានថា ប្រហែលជារឿងគំនុំ
ជនសង្ស័យក្រោយពីធ្វើសកម្មភាពរួច បានជិះម៉ូតូគេចខ្លួនបាត់។ សមត្ថកិច្ចអាវុធហត្ថកំពុងធ្វើការស្រាវជ្រាវ ដើម្បីស្វែងរកចាប់យកមកដាក់ទោសទៅតាមផ្លូវច្បាប់៕
បុរសម្នាក់ ត្រូវបានជនមិនស្គាល់មុខ កាប់មួយពូថៅរងរបួសធ្ងន់
0 Comments