កំពង់ឆ្នាំង ៖ « បងប្អូនប្រជាពលរដ្ឋដែលនៅតាមមូលដ្ឋាន បើមានទុក្ខលំបាក ខ្វះខាតអ្វីមួយត្រូវទាក់ ទងរដ្ឋអំណាចមូលដ្ឋាន ដើម្បីធ្វើការទំនាក់ទំនងជាមួយអនុសាខាកាកបាទក្រហមស្រុក និងសាខាកាកបាទក្រហមខេត្តនឹងចុះមកជួយដោះស្រាយបន្ទាន់ភ្លាមៗ ដោយកុំខ្លាច កុំទុកយូរ ព្រោះបើបងប្អូនមិនជួយផ្តល់ព័ត៌មាននោះទេ កាកបាទក្រហមស្រុក-ខេត្ត លោកមិនបានដឹងឡើយ។ កន្លងមកក៏មានបណ្ដាញសង្គម បានជួយផុសរូប និងផ្តល់ព័ត៌មានទើបបានដឹងដល់សាខាកាកបាទក្រហមនឹងបានមកដល់ភ្លាមៗជួយដោះស្រាយជូនបងប្អូន »។
លោកជំទាវ ម៉ែន នារីសោភ័គ អគ្គលេខាធិការទី១ កាកបាទក្រហមកម្ពុជាជាតំណាងដ៏ខ្ពង់ខ្ពស់ របស់សម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុន សែន ប្រធានកាកបាទក្រហមកម្ពុជាបានថ្លែងបែបនេះ នៅព្រឹកថ្ងៃទី៧ ខែមករា ឆ្នាំ២០១៦ ក្នុងពេលដឹកនាំក្រុមការងារចុះចែកអំណោយមនុស្សធម៌របស់កាកបាទក្រហមកម្ពុជា ជូនដល់ប្រជាពលរដ្ឋទីទាល់ក្រ ស្ត្រីមេម៉ាយ កុមារកំព្រា និងជនពិការចំនួន៣១គ្រួសារ នៅក្នុងស្រុករលាប្អៀរ និងស្រុកទឹកផុស ដោយមានការចូលរួមពី លោក អ៊ុន សំអុល ប្រធានគណៈកម្មាធិការសាខាកាកបាទក្រហមខេត្តកំពង់ឆ្នាំង និងមន្ត្រីកាកបាទក្រហមជាច្រើនរូបទៀត។
លោក ប្រាក់ សោភ័ណ្ឌ នាយកសាខាកាកបាទក្រហមខេត្តបានឲ្យដឹងថា ប្រជាពលរដ្ឋទាំង៣១គ្រួសារ ដែលជាជនទីទាល់ក្រ ចាស់ជរាគ្មានទីពឹង ស្ត្រីមេម៉ាយ ជនពិការ និងកុមារកំព្រា ស្ថិតនៅក្នុង
ស្រុកទឹកផុសមាន១៩គ្រួសារ និងស្រុករលាប្អៀរមាន១២គ្រួសារ ដោយបានកំណត់ទីតាំង៦កន្លែងសម្រាប់ធ្វើការចែកអំណោយ នៅជិតលំនៅដ្ឋាន ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋ។
អំណោយដែលបានចែកជូន ក្នុងមួយគ្រួសារៗ ទទួលបាន អង្ករ៥០គីឡូក្រាម, មី១កេះ, ត្រីខ២យួរមាន២០កំប៉ុង , ឃីត១កញ្ចប់ មានសារុង១ មុង១ ភួយ១ និងក្រមា ១ , ប្រេងកូឡា២ដុំ ទឹកបរិសុទ្ធ នំ ទឹកផ្លែឈើ និងថវិកាចំនួន១០ម៉ឺនរៀល។ ដោយឡែកគ្រួសាររបស់ក្មួយស្រី ឈ្មោះ សេន ជះ អាយុ១៨ឆ្នាំ ជាក្មេងកំព្រារស់នៅភូមិស្រែអ៊ុក ឃុំតាំងក្រសាំង ស្រុកទឹកផុស រៀនថ្នាក់ទី១១ វិទ្យាល័យព្រះបាទសុរាម្រិត ក្នុងក្រុងកំពង់ឆ្នាំង ជាសិស្សពូកែដែលកំពុងជួបការលំបាក លោកជំទាវ អគ្គលេខាធិការទី១ កាកបាទក្រហមកម្ពុជា បានផ្តល់ជូនថវិកាចំនួន៧០ម៉ឺនរៀល បន្ថែមទៀត។
ក្នុងឱកាសនោះ លោកជំទាវ ម៉ែន នារីសោភ័គ បានមានប្រសាសន៍ពាំនាំនូវការផ្តាំផ្ញើ សាកសួរសុខទុក្ខ ពីសម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុន សែន ប្រធានកាកបាទក្រហមកម្ពុជា ដែលសម្ដេចជានិច្ចជាកាល តែងគិតគូរ និងផ្ដល់អំណោយដល់បងប្អូនប្រជាពលរដ្ឋនៅតាមមូលដ្ឋានដែលកំពុងជួបការលំបាកជាបន្តបន្ទាប់។ ចំពោះអំណោយដែលបាននាំមកក្នុងថ្ងៃនេះ គឺជាអំណោយមនុស្សធម៌របស់កាកបាទក្រហមកម្ពុជា សម្រាប់ចែកជូនបងប្អូនទាំង៣១គ្រួសារ មានចាស់ជរា កុមារកំព្រា ស្ត្រីមេម៉ាយគ្មានទីពឹង និងជនពិការជាដើម ដោយមិនប្រកាន់និន្នាការនយោបាយអ្វីឡើយ ទីណាមានទុក្ខលំបាក គឺមានកាកបាទក្រហមកម្ពុជា មានសាខាកាកបាទក្រហមខេត្ត តែងជួយដោះស្រាយជូនបងប្អូនជានិច្ច។
ជាចុងក្រោយលោកជំទាវ បានសំណូមពរសូមឲ្យបងប្អូនប្រជាពលរដ្ឋនៅគ្រប់មូលដ្ឋានរស់នៅហូបចុក ត្រូវមានអនាម័យល្អ ជៀសវាងការកើតមានជំងឺដង្កាត់ផ្សេងៗ យាយីនៅក្នុងគ្រួសារ ដែលធ្វើឲ្យខាតបង់ថវិកានៅក្នុងគ្រួសារ ដែលកំពុងតែជួបការខ្វះខាត៕
ប្រជាពលរដ្ឋ ក្រីក្រ ស្ត្រីមេម៉ាយ កុមារកំព្រា និងជនពិការ៣១គ្រួសារ បានទទួលអំណោយពីកាកបាទក្រហមកម្ពុជា
0 Comments