ព្រៃវែង ៖ ផ្លូវលំភូមិព្រែកជ្រៃលើ ស្ថាបនាទើបតែបាន៥៥% បែរជាថវិកាត្រូវបានដកប្រគល់ឲ្យអ្នកម៉ៅការអស់១០០% សមាជិកក្រុមប្រឹក្សា ឃុំ/សង្កាត់ឃុំព្រែកជ្រៃ ក្រុមប្រឹក្សាស្រុក ពោធិរៀង ស្ទើរតែទាំងអស់បានតវ៉ាលើករណីស្ថាបនាផ្លូវលំប្រវែង១៦៤៧ម៉ែត្រ ជាគម្រោងជួសជុលផ្លូវលំដី(ស) ចំណាយថវិកាសរុប៧៥លាន៦សែន មួយពាន់ប្រាំរយរៀល ស្ថាបនាទើបបាន៥៥% ប៉ុន្តែម្ចាស់គម្រោងដកយកថវិកា១០០%ប្រគល់ឲ្យអ្នកម៉ៅការ។
មន្ត្រីក្រុមប្រឹក្សាឃុំ ក្រុមប្រឹក្សាស្រុកបានប្រាប់អ្នកយកព័ត៌មានថា ផ្លូវនេះពេលដាក់ដេញថ្លៃ ថវិកា៧៧លានរៀល ហើយក្រុមហ៊ុនលោក យស ស៊ីណាត អភិបាលរងស្រុកពារាំងជាអ្នកដេញថ្លៃបានជាង៧៥លាន ហើយស្ថាបនាជាង១ពាន់ ៦រយម៉ែត្រ ខ្នងលើ៥ម៉ែត្រ ហើយសប្ដាហ៍កន្លងមកនេះ គណៈកម្មការលទ្ធកម្មស្រុកពោធិរៀង ខេត្តព្រៃវែង បានចុះពិនិត្យឃើញថា ផ្លូវនេះធ្វើទើបតែបាន៥៥% ប៉ុន្តែបែរជាលោកអភិបាលស្រុកជាម្ចាស់គម្រោងដកយកលុយនោះ១០០% ឲ្យអ្នកម៉ៅការ ខុសច្បាប់នៃការដេញថ្លៃ ដោយផ្លូវនោះកន្លែងខ្លះ ត្រូវចាក់ដី (ស)កម្ពស់១ម៉ែត្រ តែជាក់ស្ដែងមិនបានចាក់ដល់កម្រិតនោះទេ ហើយខ្នងលើប្រាំម៉ែត្រ តែជាក់ស្ដែងកន្លែងខ្លះទើបតែធ្វើបានទទឹងជាងបីម៉ែត្រប៉ុណ្ណោះ។
ពួកគាត់បន្តថា ផ្លូវនេះធ្វើបណ្ដើរប្រេះបែកបណ្ដើរ ដោយសារមិនមានគ្រឿងចក្រគ្រប់គ្រាន់កិនបង្ហាប់ដីនោះទេ ហើយតាមរយៈការចុះពិនិត្យមើលមិនរំពឹងថា ផ្លូវនេះជាប់បានយូរទេ។
ជុំវិញលើការចោទប្រកាន់ថា ផ្លូវទើបស្ថាបនាបាន៥៥% តែដកលុយគម្រោង១០០% ឲ្យអ្នកម៉ៅការអស់នោះ ម្ចាស់គម្រោងលោក ម៉ៅ គឹមឡុង អភិបាលស្រុកពោធិរៀង ខេត្តព្រៃវែង បានឆ្លើយតបថា គណៈកម្មការលទ្ធកម្មបានចុះពិនិត្យ ហើយវាយតម្លៃថាបានស្ថាបនា៥៥%មែន ប៉ុន្តែជុំវិញការដកលុយ១០០%នោះ លោកមិនបានដឹងទេ។ ចំណែកឯ មន្ត្រីសាលាស្រុកលួចបង្ហើបថា ការដកលុយនោះពិតជាលោកអភិបាលស្រុកដកយកចេញ១០០%មែន មូលហេតុដោយសារគាត់ដើមឆ្នាំនេះចូលនិវត្តន៍ហើយ ទើបគាត់ធ្វើបែបនេះ៕
ផ្លូវលំភូមិព្រែកជ្រៃលើ ធ្វើទើបតែបាន៥៥% តែលុយឲ្យទៅអ្នកម៉ៅការអស់១០០%ទៅហើយ
0 Comments