កំពង់ចាម ៖ ជនសង្ស័យចំនួន៨នាក់(ស្រី២នាក់) ត្រូវបានកម្លាំងអធិការដ្ឋាននគរបាលស្រុកចំការលើនិងជំនាញការិយាល័យប្រឆាំងគ្រឿងញៀនខេត្តកំពង់ចាម ធ្វើការស្រាវជ្រាវចាប់ខ្លួនពីបទរក្សាទុកដឹកជញ្ជូនជួញដូរដោយខុសច្បាប់នូវសារធាតុញៀន រួមជាមួយវត្ថុតាងល្មើសច្បាប់ថ្នាំញៀន៩កញ្ចប់បង្កឲ្យមានភាពភ្ញាក់ផ្អើលនៅយប់ថ្ងៃទី០៦ ខែមករា ឆ្នាំ២០១៦ រំលងអធ្រាត្រនៅផ្ទះជួល«ស្រែម្អម»ស្ថិតក្នុងភូមិថ្នល់បែកកើត ឃុំស្វាយទៀប ស្រុកចំការលើ ខេត្តកំពង់ចាម។
លោកវរសេនីយ៍ឯក សោម រស់ នាយការិយាល័យនគរបាលប្រឆាំងគ្រឿងញៀនខេត្តកំពង់ចាមបានឲ្យដឹងថា នៅយប់ថ្ងៃទី០៥ ខែមករា ឆ្នាំ២០១៦ សមត្ថកិច្ចបានល្បាត និងត្រួតពិនិត្យរដ្ឋបាលចំហរហូតដល់ពាក់កណ្ដាលអធ្រាត្របានរកឃើញជនសង្ស័យចំនួន៣នាក់ ឃាត់មុខសញ្ញាប្រើប្រាស់ និងចែកចាយគ្រឿងញៀនក្នុងបន្ទប់ជួលខាងលើរួមមាន ៖ ១-ឈ្មោះ ម៉ន សំអាត ភេទប្រុស អាយុ៣២ឆ្នាំ រស់នៅភូមិថ្នល់បែកកើត ឃុំស្វាយទៀប ស្រុកចំការលើ ខេត្តកំពង់ចាម។
២-ឈ្មោះ ពេជ្រ សីហា ភេទស្រី អាយុ៣២ឆ្នាំ រស់នៅភូមិផ្ទះព្រៃ ឃុំព្រៃញាកខ ស្រុកសំពៅមាស ខេត្តពោធិ៍សាត់។ ៣-ឈ្មោះ ញ៉ ស្រីអូន ភេទស្រី អាយុ២០ឆ្នាំ រស់នៅភូមិត្រពាំងវែក ឃុំត្រពាំងវែក ស្រុកគីរីវង្ស ខេត្តតាកែវ។
តាមចម្លើយសារភាពរបស់ជនសង្ស័យទាំង៣នាក់នេះ បានសុំគោលការណ៍ពីព្រះរាជអាជ្ញាឲ្យជនសង្ស័យខាងលើទាក់ទងទិញថ្នាំញៀនពីមុខសញ្ញានៅភ្នំពេញ ដោយណាត់ទទួលនៅស្រុកចំការលើ។
នៅវេលាម៉ោង១ជាងរំលងអធ្រាត្រ ថ្ងៃទី០៦ ខែមករា ឆ្នាំ២០១៦ មុខសញ្ញាក៏បានជិះរថយន្តឈ្នួលយកថ្នាំញៀនឲ្យគ្នាវានៅជិតបន្ទប់ជួល។ ពេលនោះ សមត្ថកិច្ចឆែកឆេររកឃើញថ្នាំញៀន១កញ្ចប់ជាប់នៅខ្លួនជនសង្ស័យ។
លោក សោម រស់ បន្តថា ពេលនោះសមត្ថកិច្ចបានឃាត់ខ្លួនជនសង្ស័យ២នាក់ ដោយទី១-ឈ្មោះ វិត សុខា ភេទប្រុស អាយុ២១ឆ្នាំ រស់នៅភូមិអំពិល ឃុំរំចេក ស្រុកព្រះស្ដេច ខេត្តកំពង់ចាម។២-ឈ្មោះ មាស មិនា ហៅម៉ៅ ភេទប្រុស អាយុ២៩ឆ្នាំ រស់នៅភូមិត្រពាំងឫស្សី ឃុំជយោ ស្រុកចំការលើ ខេត្តកំពង់ចាម។ រហូតដល់ព្រឹកឡើង សមត្ថកិច្ចបានរកឃើញថ្នាំញៀន៧កញ្ចប់ទៀត បន្ទាប់មកមានជនសង្ស័យចំនួន៣នាក់ បានមកទិញថ្នាំញៀនពីមុខសញ្ញាខាងលើ សមត្ថកិច្ចក៏បានឃាត់ខ្លួនមាន១-ឈ្មោះ ញឹម វិចិត្រ ភេទប្រុស អាយុ៣០ឆ្នាំ រស់នៅភូមិថ្នល់បែកលិច ឃុំស្វាយទាប ស្រុកចំការលើ ខេត្តកំពង់ចាម។ ២-ឈ្មោះ ហាក់ ចាន់ឌិត ភេទប្រុស អាយុ២០ឆ្នាំ រស់នៅភូមិថ្នល់បែកកើត ឃុំស្វាយទាប ស្រុកចំការលើ ខេត្តកំពង់ចាម។ ៣-ឈ្មោះ ស្រី សីហា ភេទប្រុស អាយុ២២ឆ្នាំរស់នៅភូមិថ្នល់បែកកើត ឃុំស្វាយទាប ស្រុកចំការលើ ខេត្តកំពង់ចាម។
លោក សោម រស់ បានបញ្ជាក់ថា នៅព្រឹកថ្ងៃទី០៧ ខែមករា ឆ្នាំ២០១៦ សមត្ថកិច្ចបាននាំជនសង្ស័យទាំង៨នាក់មកឃុំខ្លួនបណ្ដោះអាសន្ននៅស្នងការដ្ឋាននគរបាលខេត្តកំពង់ចាម ដើម្បីបំពេញសំណុំឯកសារតាមនីតិវិធីត្រៀមបញ្ជូនទៅព្រះរាជអាជ្ញាចាត់ការតាមផ្លូវច្បាប់៕
បង្ក្រាបករណីជួញដូរថ្នាំញៀន ឃាត់ខ្លួនជនសង្ស័យ៨នាក់
0 Comments