បាត់ដំបង ៖ មានការភ្ញាក់ផ្អើលមួយបានកើតឡើងពីសំណាក់ប្រជាពលរដ្ឋ និងកម្មករដកដំឡូងជាច្រើននាក់ ដោយសារតែពួកគេបានប្រទះឃើញមនុស្សដេកស្លាប់នៅក្នុងមុងដោយមិនដឹងមូលហេតុ ហើយម្យ៉ាងទៀតសពនេះមានសភាពចង់រឹងទៅហើយ ទើបត្រូវបានរាយការណ៍ទៅកម្លាំងសមត្ថកិច្ចដើម្បីចុះត្រួតពិនិត្យ។
ការភ្ញាក់ផ្អើលនេះ គឺនៅថ្ងៃទី៧ ខែមករា ឆ្នាំ២០១៦ វេលាម៉ោង៦និង៣០នាទីព្រឹក នៅចំណុចខាងកើតសាយឡូសុកាន់យ៉ា ស្ថិតក្នុងភូមិភ្នំតូច ឃុំពេជ្រចិន្តា ស្រុកភ្នំព្រឹក ដោយសារតែគេបានប្រទះឃើញមានមនុស្សដេកស្លាប់ ដោយជនរងគ្រោះឈ្មោះ កុក បឺ ភេទប្រុស អាយុ៤៥ឆ្នាំ មានមុខរបរកម្មករដកដំឡូងនៅតាមចម្ការក្បែរទីតាំងសាយឡូខាងលើនេះ ហើយជនរងគ្រោះរស់នៅភូមិសណ្តាន់ ឃុំពាក់ស្បែក ស្រុកអង្គរធំ ខេត្តសៀមរាប បានមកស្នាក់នៅភូមិ-ឃុំកើតហេតុខាងលើ ដើម្បីធ្វើជាកម្មករ។
លោក សារ៉េត វិសេដ្ឋ អធិការរងស្រុកភ្នំព្រឹកបានបញ្ជាក់ថា គឺកាលពីល្ងាចជនរងគ្រោះអាចមានផឹកស៊ីបន្តិចបន្តួចមុននឹងចូលទៅសម្រាក លុះព្រឹកឡើងដោយសារតែមិនឃើញងើបទៅធ្វើការដូចរាល់ដង ទើបអ្នករួមការងារបានដើរទៅដាស់ឲ្យក្រោក ក៏មានការភ្ញាក់ផ្អើលតែម្តង ដោយសារតែឃើញជនរងគ្រោះដេកស្លាប់មិនដឹងពីពេលណាមក។
តាមការត្រួតពិនិត្យធ្វើឲ្យសមត្ថកិច្ចអាចសន្និដ្ឋានបានថា ជនរងគ្រោះអាចស្លាប់ដោយសារតែខ្យល់គរ ហើយការស្លាប់នេះគឺប្រហែលតាំងពីម៉ោង២និង៣០នាទីរំលងអធ្រាត្រមកម្ល៉េះ ដោយគ្មានអ្នកណាដឹងឡើយ។ ក្រោយពីសមត្ថកិច្ចយើងពិនិត្យសពរួច ក៏បានធ្វើការប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណី៕
ប្រទះឃើញមនុស្សស្លាប់ក្បែរសាយឡូ ផ្អើលទាំងព្រឹក
0 Comments