បាត់ដំបង ៖ ជនសង្ស័យម្នាក់ ដែលកន្លងមកសមត្ថកិច្ចតែងតែតាមប្រមាញ់ដើម្បីឃាត់ខ្លួន ដោយសារតែរូបគេគឺជាមុខសញ្ញាចែកចាយគ្រឿងញៀនយ៉ាងសកម្មនោះ គឺត្រូវបានឃាត់ខ្លួនហើយ ខណៈដែលជនរូបនេះកំពុងធ្វើសកម្មភាពជាក់ស្ដែង។
ការឃាត់ខ្លួននេះគឺធ្វើឡើងកាលពីវេលាម៉ោង៣រសៀល ថ្ងៃទី៧ ខែមករា ឆ្នាំ២០១៦ ត្រង់ចំណុចភូមិព្រែកតាតន់ សង្កាត់ព្រែកព្រះស្ដេច ក្រុងបាត់ដំបង ដោយជនសង្ស័យម្នាក់នេះមានឈ្មោះ ឈួន វណ្ណៈ ភេទប្រុស អាយុ៣៦ឆ្នាំ រស់នៅត្រង់ចំណុចខាងលើ ដែលពាក់ព័ន្ធនឹងករណីលក់ ចែកចាយគ្រឿងញៀនខុសច្បាប់។
ក្នុងកិច្ចប្រតិបត្តិការនេះដែរ សមត្ថកិច្ចជំនាញបានធ្វើការដកហូតនូវថ្នាំញៀនប្រភេទម៉ាទឹកកកចំនួន១កូនថង់ ដែលមានទម្ងន់១,៤ក្រាម ទូរស័ព្ទដៃមួយគ្រឿង និងម៉ូតូមួយគ្រឿងម៉ាកវីវ៉ា ពណ៌ក្រហម ពាក់ស្លាកលេខ បាត់ដំបង 1M-7846 ព្រមទាំងបាននាំមកកាន់ស្នងការដ្ឋាននគរបាលខេត្ត ដើម្បីសាកសួរ។
នៅចំពោះមុខសមត្ថកិច្ចជំនាញ ក្រោយពីបានទទួលនូវចម្លើយសារភាពរួចមក កម្លាំងការិយាល័យនគរបាលប្រឆាំងគ្រឿងញៀនកំពុងរៀបចំសំណុំរឿងដើម្បីបញ្ជូនខ្លួន រួមទាំងវត្ថុតាងទៅកាន់សាលាដំបូងខេត្តហើយ ក្នុងការចាត់ការទៅតាមផ្លូវច្បាប់៕
ជនសង្ស័យចែកចាយគ្រឿងញៀនដ៏សកម្មម្នាក់ ត្រូវបានឃាត់ខ្លួន
0 Comments