ព្រះសីហនុ ៖ ម៉ូតូSTRប្រដេញ និងល្បាត មានកម្លាំង២៣០សេសេ១គ្រឿង ត្រូវបានសប្បុរសជនជាម្ចាស់ក្លិបកម្សាន្ត The Skyline Club ដែលមានទីតាំងនៅក្នុងក្រុងព្រះសីហនុបានផ្តល់ជាអំណោយ និងយកទៅប្រគល់ជូនកងរាជអាវុធហត្ថខេត្តព្រះសីហនុទុកប្រើប្រាស់ កាលពីរសៀលថ្ងៃទី០៦ ខែមករា នៅទីបញ្ជាការកងរាជអាវុធហត្ថខេត្តព្រះសីហនុ។
លោកវរសេនីយ៍ឯក អ៊ុក អឿន មេបញ្ជាការរងកងរាជអាវុធហត្ថខេត្តព្រះសីហនុ និងជាតំណាងរបស់លោកឧត្ដមសេនីយ៍ ហេង ប៊ុនទី មេបញ្ជាការកងអាវុធហត្ថខេត្តព្រះសីហនុ បានមានប្រសាសន៍ថ្លែងអំណរគុណចំពោះសប្បុរសជន លោក គ្រុយ ផាន់ណា ហៅភឿក ម្ចាស់ក្លិបកម្សាន្ត Thy Skyline Ckub ដែលមានសន្ដានចិត្តផ្តល់ម៉ូតូមួយគ្រឿងនេះដល់កងរាជអាវុធហត្ថខេត្តព្រះសីហនុ ដើម្បីបម្រើឲ្យការងារល្បាត និងចេញប្រតិបត្តិការការពារសន្តិសុខ សុវត្ថិភាព ជូនប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិមកលេងកម្សាន្តនៅខេត្តឆ្នេរសមុទ្រនាទិសនិរតីផងដែរ។
លោកមេបញ្ជាការរងកងរាជអាវុធហត្ថបានបញ្ជាក់ថា ម៉ូតូនេះ នឹងយកមកបម្រើការងារនៅក្នុងអង្គភាពក្នុងការចុះល្បាត បង្ការ ទប់ស្កាត់ នូវរាល់បទល្មើសនានាក្នុងក្រុងព្រះសីហនុ និងខេត្តព្រះសីហនុ។
លោក អ៊ុក អឿន បានបន្តទៀតថា កន្លងមកលោកមេបញ្ជាការបានចំណាយថវិកាផ្ទាល់ខ្លួនក្នុងការទិញម៉ូតូត្រៃបានជាច្រើនគ្រឿងដាក់ក្នុងអង្គភាព ព្រមទាំងបានចែកជូនទៅដល់បណ្ដាអង្គភាពអាវុធហត្ថក្រុង/ស្រុក និងស្នាក់ការ ដើម្បីបម្រើការងារចេញល្បាត ទប់ស្កាត់បទល្មើសនានា បានទាន់ពេលវេលា។
ក្រៅពីម៉ូតូល្បាត កងរាជអាវុធហត្ថខេត្តក៏បានកៀរគររកថវិកាទិញឡានទឹកបានមួយគ្រឿង គួបផ្សំនឹងការផ្តល់នូវឡានទឹកមួយគ្រឿងទៀតពីមេបញ្ជាការកងរាជអាវុធហត្ថលើផ្ទៃប្រទេសផងដែរដើម្បីប្រើប្រាស់ក្នុងការជួយអន្តរាគមន៍ពន្លត់អគ្គិភ័យក្នុងខេត្តព្រះសីហនុ៕
ម្ចាស់ក្លិបកម្សាន្តស្កាយឡាញ ផ្តល់ម៉ូតូ១គ្រឿងដល់កងរាជអាវុធហត្ថខេត្តព្រះសីហនុ
0 Comments