កំពង់ចាម ៖ ជនរងគ្រោះចំនួន២នាក់ បានរងរបួសជាទម្ងន់ បន្ទាប់ពីជួបគ្រោះថ្នាក់ចរាចរណ៍ ក្នុងខណៈអ្នកទាំង២កំពុងជិះម៉ូតូឌុបគ្នាទៅប៉ះជាមួយរថយន្ត ក្នុងទិសដៅផ្ទុយគ្នាបង្កឲ្យមានភាពភ្ញាក់ផ្អើលកាលពីវេលាម៉ោង៩និង២២នាទី ថ្ងៃទី១៤ ខែមករា ឆ្នាំ២០១៦ នៅភូមិពោធិស្ទាង ឃុំសណ្ដែក ស្រុកបាធាយ ខេត្តកំពង់ចាម។
លោក សុខ សូល អធិការរងនគរបាលស្រុកបាធាយបានឲ្យដឹងថា នៅមុនពេលកើតហេតុមានឈ្មោះ ប៉ិច ហាន ភេទប្រុស អាយុ៤២ឆ្នាំ នៅភូមិគោករវាង ឃុំខ្នុរដំបង ស្រុកជើងព្រៃ ខេត្តកំពង់ចាម បានបើកម៉ូតូម៉ាកវ៉េវពណ៌ខ្មៅ គ្មានស្លាកលេខ ឌុបឈ្មោះ លឹម គឹមលី ភេទស្រី អាយុ២៦ឆ្នាំ នៅភូមិទ្រមូង ឃុំព្រៃក្តាំ ស្រុកអង្គរបុរី ខេត្តតាកែវ ក្នុងទិសដៅពីត្បូងទៅជើង។ លុះពេលមកដល់ចំណុចកើតហេតុខាងលើ ម៉ូតូវ៉េវបានបុកជាមួយរថយន្តសាំយ៉ុង ពណ៌.ស ពាក់ស្លាកលេខ ភ្នំពេញ2U7534 បើកបរដោយជនមិនស្គាល់អត្តសញ្ញាណក្នុងទិសដៅច្រាសគ្នា(ពីជើងទៅត្បូង)។
លោក សុខ សូល បានបញ្ជាក់ថា ក្នុងគ្រោះថ្នាក់ចរាចរណ៍នេះបានបណ្ដាលឲ្យអ្នកជិះម៉ូតូធុនវ៉េវទាំង២នាក់ រងរបួសជាទម្ងន់ ហើយត្រូវបានបញ្ជូនទៅសង្គ្រោះនៅមន្ទីរពេទ្យ។
ចំណែកអ្នកបើកបររថយន្តមិនស្គាល់អត្តសញ្ញាណបានរត់គេចខ្លួនបាត់ ដោយទុករថយន្តនៅកន្លែងកើតហេតុ។
បច្ចុប្បន្ន សមត្ថកិច្ចបានយករថយន្ត និងម៉ូតូជួបគ្រោះថ្នាក់ចរាចរណ៍ទាំង២នេះមករក្សាទុកនៅអធិការដ្ឋាននគរបាលស្រុកបាធាយដើម្បីបំពេញសំណុំឯកសារតាមនីតិវិធី៕
រថយន្តសាំយ៉ុងព្រលះជាមួយម៉ូតូវ៉េវ របួសធ្ងន់២នាក់
0 Comments