ភ្នំពេញ ៖ ក្មេងប្រុសអាយុ១៣ឆ្នាំម្នាក់ ដែលរស់នៅសមាគមចលនាវប្បធម៌ជាដើម្បីកុមារកំព្រារនិងក្រីក្រ បានអះអាងថា យាយចុងភៅបានយកបន្ទះរនាបវាយធ្វើបាបរូបគេទាំងបំពានបណ្តាលឲ្យមានរបួសស្នាមច្រើនកន្លែង ព្រោះតែរឿងប្រើឲ្យបោះសំរាមចោល និង ជូតផ្ទះតែប៉ុណ្ណោះ។
ហេតុការណ៍នេះបានកើតឡើងកាលពីវេលាម៉ោង២១យប់ ថ្ងៃទី០៧ ខែមករា ឆ្នាំ២០១៦នៅចំណុចក្នុងសមាគមចលនាវប្បធម៌ជាដើម្បីកុមារកំព្រានិងក្រីក្រ ដែលមានទីតាំងនៅភូមិ២៣ផ្លូវលេខ៨០ស្ថិតខាងក្រោយពេទ្យកាលើម៉ែត្រក្នុងសង្កាត់ស្រះចកខណ្ឌដូនពេញ ដែលមានប្រធានសហគមឈ្មោះប៉ុយ ស៊ោរ។
ក្មេងប្រុសដែលរងនូវការវាយធ្វើបាបទាំងបំពាននោះ ឈ្មោះរុំ នាត ភេទប្រុស អាយុ១៣ឆ្នាំជាក្មេងកំព្រាមកពីភូមិវត្តថ្មី ឃុំព្រែកដំបង ស្រុកមុខកំពូល ខេត្តកណ្តាល សព្វថ្ងៃស្នាក់នៅសមាគមនោះ។ បានរងរបួសច្រើនកន្លែងស្ទើរពេញខ្លួនប្រាណ។
ស្ត្រីឈ្មោះវ៉ាន់ ឌី អាយុជាង៣០ឆ្នាំបានឲ្យដឹងថា ខណៈដែលគាត់មកធ្វើសក់នៅកន្លែងម៉ូយរបស់គាត់នៅខាងក្រោយស្ថានទូតបារាំងកាលពីរសៀលថ្ងៃទី០៨ ខែមករា ឆ្នាំ២០១៦ ស្រាប់តែប្រទះឃើញក្មេងប្រុសរូបនោះគាត់ដើរឃ្ញោចៗ របៀបឈឺជើងនោះគាត់ក៏សួរនាំក្មេងប្រុសរូបនោះគេក៏ប្រាប់ថា មូលហេតុដែលរូបគេឈឺដើរសឹងមិនរួចនេះ ព្រោះតែត្រូវអ៊ំចុងភៅឈ្មោះព្រុំ នៅសមាគមដែលរូបគេស្នាក់នៅ បានវាយធ្វើបាបរូបគេទាំងបំពាន ខណៈដែលគាត់ប្រើឲ្យជូតផ្ទះ និង បន្ទប់ទឹកហើយនោះ។
ដោយស្រីអ៊ំចុងភៅរូបនោះបានយកបន្ទះរនាបមកវាយរូបគេបណ្តាលឲ្យរបួសច្រើនកន្លែងដូច្នេះតែម្តង។
ស្ត្រីឈ្មោះវ៉ាន់ ឌី រូបនោះបានបន្តទៀតថា បន្ទាប់ពីឃើញក្មេងប្រុសរូបនោះគាត់រងនូវការវាយធ្វើបាបកុមារដូច្នេះគាត់ ក៏ហៅក្មេងប្រុសរូបនោះ ហៅមកសុំថតរូបនៃមុខរបួសរបស់ក្មេងប្រុសរូបនោះបង្ហោះតាមប្រព័ន្ធ(Facebook )ដើម្បីជួយរកយុត្តិធម៌ជូនក្មេងប្រុសនៅសមាគមនោះក្រែងមានអាជ្ញាធរជួយរកយុត្តិធម៌ឲ្យគ្នា។
លោកកាន់ វណ្ណះ មេប៉ុស្តិ៍ស្រះបានឲ្យដឹងថា កាលពីល្ងាចថ្ងៃទី០៨ ខែមករា ឆ្នាំ២០១៦នេះថា លោកមិនបានដឹង ឬ ទទួលបានព័ត៌មាន នៃការវាយធ្វើបាបកុមារនៅសមាគមចលនាវប្បធម៌ជាដើម្បីកុមារកំព្រានិងក្រីក្រ នោះឡើយ ពីព្រោះគ្មានអ្នកមកប្តឹង តែទន្ទឹងនិងដឹងពីរឿងហេតុនោះដែរលោកនឹងចាត់កម្លាំងរបស់លោកឲ្យទៅសួរនាំនៅសមាគមនោះ។
លោកស៊ូ សាវ៉ាងហៅលោកតា ហ្វុយ ស្សូ អាយុ៧៤ឆ្នាំបានបំភ្លឺថា រឿងហេតុនោះពិតជាមានមែននៅក្នុងសមាគមន៍របស់លោក ហើយម្យ៉ាងវិញទៀតយាយចុងភៅ ដែលបានប្រើអំពើហិង្សាលើក្មេងនោះ គឺគាត់មានតួនាទីជាចុងភៅផង និងអ្នកមើលថែក្មេង។ ប៉ុន្តែបន្ទាប់ពីមានបញ្ហាដូច្នេះគាត់ក្នុងនាមជាប្រធានសមាគម គាត់បានអប់រំណែនាំស្ត្រីដៃដល់រូបនោះកុំឲ្យធ្វើដូច្នេះតទៅទៀត ហើយម្យ៉ាងវិញទៀតគាត់បានដកយាយចុងភៅរូបនោះឲ្យឈប់មើលថែក្មេងទៀតហើយគឺឲ្យគាត់នៅតែចុងភៅដាច់តែប៉ុណ្ណោះ។
លោកប្រធានសមាគមបញ្ជាក់ទៀតថា នេះជាការប្រដៅទូន្មានក្មេងតែប៉ុណ្ណោះតែការប្រដៅរបស់យាយចុងភៅរូបនោះវាជ្រុលពេកហើយនោះ ដូច្នេះហើយមានតែដកតួនាទីយាយចុងភៅរូបនោះតែម្តងមិនឲ្យមើលថៃក្មេងទៀតទេ។ លោកបញ្ជាក់ថា ក្មេងកុមារកំព្រានៅសមាគមលោកមានតែ១៨នាក់ប៉ុណ្ណោះ៕
យាយចុងភៅនៅសមាគមចលនាវប្បធម៌ជាដើម្បីកុមារកំព្រារនិងក្រីក្រ ប្រើអំពើហិង្សាវាយធ្វើបាបក្មេងប្រុសម្នាក់ឲ្យរបួសស្នាម
0 Comments