Ad Code

ប្រមុខ UN រិះគន់​ភាគី​សង្គ្រាម​នៅ​ស៊ី​រី​ថា ការប្រើប្រាស់​ភាព​អត់ឃ្លាន​ធ្វើជា​អាវុធ​គឺជា​ឧក្រិដ្ឋកម្ម​សង្គ្រា​ម​

អគ្គលេខាធិការ​អង្គការសហប្រជាជាតិ​ លោក បាន គី​មូ​ន បាន​រិះគន់​ភាគី​ទាំងអស់​នៃ​ជម្លោះ​នៅ​ស៊ី​រី​សម្រាប់​វិបត្តិ​មនុស្សធម៌ ​នៅក្នុង​ទីក្រុង Madaya ដែល​ត្រូវ​ឡោមព័ទ្ធ​ដោយ​ចង្អុល​បង្ហាញថា ​ការ​ប្រើ​ប្រាស់​នៃ​ភាព​អត់​ឃ្លាន​ធ្វើជា​អាវុធ​ស្មើនឹង​ឧក្រិដ្ឋកម្ម​សង្គ្រាម​មួយ​។​



លោក បាន គី​មូ​ន បាន​ថ្លែង​ថា រូបភាព​នៃ​មនុស្ស​ ដែល​ស្គមរីងរៃ ​ដោយសារ​អត់​អាហារ​ នៅក្នុង​ក្រុង Madaya បាន​បង្ហាញ​ពី​កម្រិត​ដ៏​ទាប​ថ្មី​មួយទៀត​ នៅក្នុង​សង្គ្រាមស៊ីវិល​ស៊ី​រី​។​



លោក បាន គី​មូ​ន បាន​លើក​ឡើង​ថា “​មនុស្ស​ចាស់ ​និង​កុមារ ​ព្រមទាំង​បុរស ​និង​ស្ត្រី ​ដែល​នៅ​សល់​តែ​ស្បែក​ និង​ឆ្អឹង កង្វះ​អាហារូបត្ថម្ភ​ធ្ងន់ធ្ងរ​ និង​ខ្សោយ​បំផុត​មិនអាច​ សូម្បីតែ​ដើរ​ ហើយ​អស់សង្ឃឹម​ទាំងស្រុង​សម្រាប់​ចំណីអាហារ​”​។​



បើ​យោង​តាម​លោក​អគ្គលេខាធិការ​បាន​ឲ្យ​ដឹង​ថា មនុស្ស​ប្រមាណ​៤០០​នាក់​នៅក្នុង​ទីក្រុង Madaya គឺ​កំពុង​ស្ថិតនៅ​ក្នុង​ស្ថានភាព​គ្រោះថ្នាក់​ដល់​ជីវិត​ ហើយ​តម្រូវ​ឲ្យ​មានការ​ព្យាបាល​ជាបន្ទាន់​។​



ក្រុង Madaya គឺ​ស្ថិត​នៅ​ក្រោម​ការឡោមព័ទ្ធ​ ដោយ​កងកម្លាំង​គាំទ្រ​រដ្ឋាភិបាល​ ហើយ​ភូមិ​ចំនួន​ពីរ​នៅ​ក្នុង​ខេត្ត Idlib នៅតែ​រាំង​ខ្ទប់​ដោយ​ពួក​ឧទ្ទាម​។​



ពួកគេ​បាន​ទទួល​ជំនួយ​លើកដំបូង​ពី​ក្បួន​រថយន្ត​មួយ​កាលពី​ថ្ងៃ​ចន្ទ​ជាមួយនឹង​ការ​ផ្គត់ផ្គង់​បន្ថែម​ទៀ​ត ​ដែល​មកដល់​នៅក្នុង​តំបន់​ទាំងពីរ​នេះ​កាលពី​ថ្ងៃ​ព្រហស្បតិ៍​។​



លោក​ បាន ​គី​មូ​ន ​បាន​និយាយ​ថា “​ខ្ញុំ​សូម​បញ្ជាក់​ឲ្យ​ច្បាស់​ថា ការប្រើ​ភាព​អត់ឃ្លាន​ធ្វើជា​អាវុធ​នៃ​ស​ង្គ្រាម​គឺជា​បទឧក្រិដ្ឋ​សង្គ្រាម​មួយ​។ ខ្ញុំ​នឹង​និយាយ​ថា ពួកគេ​កំពុង​ត្រូវ​បាន​ចាប់​ជា​ចំណាប់ខ្មាំង​ ប៉ុន្តែ​វា​គឺ​អាក្រក់​ជាង​ហ្នឹង​ទៅទៀត ​ព្រោះ​ចំណាប់ខ្មាំង​យ៉ាងហោចណាស់​ក៏​ទទួល​បាន​ការ​ហូប​ចុក​ដែរ​”​។​



ភ្នាក់ងារ​របស់ RT គឺ​លោក Murad Gadziev ដែល​ជា​ផ្នែក​មួយ​នៃ​អ្នកកាសែត​បរទេស​មួយ​ចំនួន ​ដែល​បាន​មកដល់​ក្រុង Madaya បាន​ឲ្យ​ដឹង​ថា បើ​យោងទៅតាម​អ្នកស្រុក​បាន​លើក​ឡើង​ថា ពួក​សកម្ម​ប្រ​យុទ្ធ​ក្រុម​រដ្ឋ​ឥស្លាម​កំពុង​ប្រយុទ្ធ​ប្រឆាំង ​នៅក្នុង​ទីក្រុង​នេះ​រួម​ជាមួយនឹង​កងកម្លាំង​ក្រុមប្រឆាំង​។​



ពួកគេ​បាន​និយាយ​ថា ពួក​ឧទ្ទាម​ដែល​គ្រប់គ្រង​ទីក្រុង​នេះ​ក៏បាន​លក់​ស្បៀងអាហារ​ក្នុង​តម្លៃ​ខ្ពស់​កប់​ពពក​ផង​ដែរ ​រហូតដល់​ទៅ​២៥០​ដុល្លារ​សម្រាប់​អង្ករ​ត្រឹម​តែមួយ​គីឡូក្រាម​។​



លោក ​បាន ​គី​មូ​ន ​បាន​និយាយ​ថា​ មនុស្ស​ប្រមាណ​៤០០០០០​នាក់​នៅក្នុង​ប្រទេស​ស៊ី​រី​ ត្រូវ​បាន​គេ​ឡោមព័ទ្ធ​ ដោយមាន​ជាង​ពាក់កណ្ដាល​គឺ​ស្ថិត​នៅ​ក្នុង​តំបន់ ​ដែល​បាន​គ្រប់គ្រង​ដោយ​ក្រុម IS។​



ជាមួយគ្នា​នោះ លោក​ បាន ​គី​មូ​ន ​បាន​ជំរុញ​ឲ្យ​មហាអំណាច​ក្នុង​តំបន់​និង​បុគ្គល​អន្តរជាតិ​សំខាន់ៗ​ឲ្យ​ដាក់​សម្ពាធ​ទៅលើ​ភាគី​សង្គ្រាម ​ដើម្បី​ផ្ដល់​នូវ​ការ​ចូល​ដំណើរការ​មនុស្សធម៌​ប្រកបដោយ​ចីរភាព​និង​គ្មានអ្វី​រារាំង​៕


RT



ប្រមុខ UN រិះគន់​ភាគី​សង្គ្រាម​នៅ​ស៊ី​រី​ថា ការប្រើប្រាស់​ភាព​អត់ឃ្លាន​ធ្វើជា​អាវុធ​គឺជា​ឧក្រិដ្ឋកម្ម​សង្គ្រា​ម​

Post a Comment

0 Comments

Close Menu