ធ្វើ​សកម្មភាព​កាច់.ក ម៉ូតូ​អូស​ចេញ​បាន​១០០​ម៉ែត្រ​ ត្រូវ​បាន​ប៉ូលិស​ចាប់វាយ​ខ្នោះ

ភ្នំពេញ​ ៖ បុរស​ម្នាក់​ក្នុងចំណោម​បក្ខពួក​៣​នាក់​ ត្រូវ​បាន​កម្លាំង​នគរបាល ប៉ុស្តិ៍​រដ្ឋបាល​ទឹកល្អក់​ទី​២ នៃ​អធិការដ្ឋាន នគរបាល​ខណ្ឌទួលគោក​ធ្វើការ​ឃាត់ខ្លួន ខណៈ​បុរស​ម្នាក់​នេះ​និង​បក្ខពួក​បាន​និង​កំ​ពុង​ធ្វើ​សកម្មភាព​កាច់.ក ម៉ូតូ​គេ ហើយ​នៅពេល​អូស​ចេញ​បាន​១០០​ម៉ែត្រ​ក៏​ត្រូវ​ម្ចាស់​គេ​ឃើញ ស្រែក​ចោរៗ​ទើប​ប៉ូលិស​ចាប់​វាយ​ខ្នោះ​តែម្តង​។

បុរស​រូប​នេះ​ ត្រូវ​បាន​ឃាត់​ខ្លួន​កាលពី​ព្រឹក​ថ្ងៃ សុក្រ ១១​កើត ខែជេស្ឋ ឆ្នាំច សំ​រិ​ទ្ធិ​ស័ក ព​.​ស​២៥៦២ ត្រូវ​នឹង​ថ្ងៃទី​២៥ ខែឧសភា ឆ្នាំ​២០១៨ វេលា​ម៉ោង​ប្រហែល ០៩​និង​១០​នាទី តាម​ផ្ទះ​លេខ​៣០ ផ្លូវ​លេខ​១៤៦ ក្រុមទី​៣២ ភូមិ​១១ សង្កាត់​ទឹកល្អក់​ទី​២ ខណ្ឌទួលគោក រាជធានី​ភ្នំពេញ។



ជនសង្ស័យ ឈ្មោះ មាន សម្បត្តិ ហៅ សម្បត្តិ ភេទ​ប្រុស អាយុ​៣៤​ឆ្នាំ ជនជាតិ​ខ្មែរ មុខរបរ ពុំពិតប្រាកដ ស្នាក់​នៅផ្ទះ​គ្មាន​លេខ ផ្លូវលំ ភូមិ​ពាម សង្កាត់​ព្រៃ​ស ខណ្ឌដង្កោ រាជធានី​ភ្នំពេញ។

វត្ថុតាង​ចាប់​យក​មាន ម៉ូតូ​មួយ​គ្រឿង​ម៉ាក Honda Wave X ស៊េរី 2006 ពណ៌​ស្លែរ ពាក់​ស្លាក​លេខ ភ្នំពេញ 1N-7266 ដែល មាន​លេខ​តួ និង​លេខ​ម៉ាស៊ីន​: 0506159 (​ជា​របស់​ជនរងគ្រោះ​ដែល​ជនសង្ស័យ​ធ្វើ​សកម្មភាព​លួច​) បាន​ធ្វើ​ការ ប្រគល់​ឲ្យ​ជនរងគ្រោះ​វិញ តាម​ការ​ស្នើ​សុំ ដោយមាន​ការ​ឯកភាព​ពី​លោក វង្ស ប៊ុន​វិសុទ្ធ ព្រះរាជ​អាជ្ញារង នៃ​អយ្យការ​អម​សាលាដំបូង​រាជធានី​ភ្នំពេញ។

ទូរស័ព្ទ​ដៃ​ចំនួន​០២​គ្រឿង ម៉ាក​TElEGO ពណ៌​ខ្មៅ​មួយគ្រឿង និង​ម៉ាក G260 ពណ៌​ខ្មៅ (​ជា​របស់​ជនសង្ស័យ )។ ជនរងគ្រោះ ឈ្មោះ ឆេន សុ​ភ័​ក្រ ភេទ​ប្រុស អាយុ​២៦​ឆ្នាំ ជនជាតិខ្មែរ មុខរបរ លក់ដូរ ស្នាក់​នៅផ្ទះ​លេខ​៣០ ផ្លូវ​លេខ​១៤៦ ក្រុមទី​៣២ ភូមិ​១១ សង្កាត់​ទឹកល្អក់​ទី​២ ខណ្ឌទួលគោក រាជធានី​ភ្នំពេញ។



មន្ត្រី​ប៉ូលិស​ខណ្ឌទួលគោក​បាន​ឲ្យ​ដឹង​ថា នៅ​ថ្ងៃទី​២៥ ខែឧសភា ឆ្នាំ​២០១៨ វេលា​ម៉ោង​ប្រហែល ៩​និង​០០​នាទី ជនរងគ្រោះ​ឈ្មោះ ឆេន សុ​ភ័​ក្រ ភេទ​ប្រុស អាយុ​២៦​ឆ្នាំ ជនជាតិ​ខ្មែរ បាន ជិះ​ម៉ូតូ​មួយ​គ្រឿង​ម៉ាក Honda Wave X ស៊េរី 2006 ពណ៌​ស្លែរ ពាក់​ស្លាក លេខ ភ្នំពេញ 1N-7266 មក​ចត​ទុក នៅ​ចំហៀង​ខាងជើង​ផ្ទះ លើផ្លូវ លេខ​១៤៦ ក្រុមទី​៣២ ភូមិ​១១ សង្កាត់ ទឹកល្អក់​ទី​២ ខណ្ឌ​ទួល គោក រាជធានី​ភ្នំពេញ រួចហើយ​ជនរងគ្រោះ​បាន​ចូលទៅក្នុង​បន្ទប់ទឹក​មួយ​ភ្លែត ប្រហែល ១០​នាទី​ក្រោយមក ស្រាប់​តែមាន​ជនសង្ស័យ​ឈ្មោះ មាន សម្បត្តិ ហៅ សម្បត្តិ ភេទ​ប្រុស អាយុ​៣៤​ឆ្នាំ ជនជាតិខ្មែរ និង​បក្សពួក​០២​នាក់​ទៀត ១-​ឈ្មោះ ប៊ុន ភេទ​ប្រុស អាយុ​ប្រហែល ៣០​ឆ្នាំ ជនជាតិខ្មែរ និង​ទី​២-​ឈ្មោះ វី ភេទ​ប្រុស អាយុ​ប្រហែល​៣០​ឆ្នាំ ជនជាតិខ្មែរ បាន​ជិះ​ម៉ូតូ​មួយគ្រឿង​ម៉ាក Suzuki Revo ពណ៌​ខ្មៅ មិន​ច្បាស់​ស្លាក​លេខ មក​ធ្វើ សកម្មភាព​លួច​កាច់ក​ម៉ូតូ​របស់​ជនរងគ្រោះ​ដោយ​ឈ្មោះ ប៊ុន និង​ឈ្មោះ វី ជា​អ្នក​ចូល​កាច់ក​ម៉ូតូ​រួចហើយ​ឈ្មោះ មាន សម្បត្តិ ហៅ សម្បត្តិ ជា​អ្នក​អូស​បណ្ដើរ​ម៉ូតូ​ចេញ បាន ប្រហែល​១០០​ម៉​ត្រ ភ្លាមនោះ​ប្រពន្ធ​របស់​ជនរងគ្រោះ​បានឃើញ​ទាន់​ក៏​ស្រែកថា​ចោរៗ ភ្លាម​នោះ​ជនសង្ស័យ​ឈ្មោះ មាន សម្បត្តិ បាន​ផ្ដួល​ម៉ូតូ​ចោល បំរុង​រត់​គេច​ខ្លួន ត្រូវ​បាន​កម្លាំង នគរបាល​ប៉ុស្តិ៍​រដ្ឋបាល​ទឹកល្អក់​ទី​២ ធ្វើការ​ល្បាត​ការពារ​សុវត្ថិភាព ក្នុង​មូលដ្ឋាន​នៅក្បែរនោះ ក៏​ជួយ​អន្តរាគមន៍ ឃាត់ខ្លួន​ជនសង្ស័យ​០១​នាក់​ឈ្មោះ មាន សម្បត្តិ ហៅ សម្បត្តិ និង​ចាប់យក​វត្ថុតាង ម៉ូតូ​របស់​ជនរងគ្រោះ​មកវិញ រួច​បញ្ជូន​ជនសង្ស័យ​ខាងលើ​យក​មក​កាន់​អធិការដ្ឋាន​នគរបាល​ខណ្ឌទួលគោក ចាត់ការ​តាម​នីតិវិធី​ច្បាប់​តែម្ដង ។​ចំណែក​បក្សពួក​០២​នាក់ ឈ្មោះ ប៊ុន និង​ឈ្មោះ វី បាន​ជិះ​ម៉ូតូ​គេចខ្លួនបាត់ ។

បន្ទាប់ពី​ឃាត់ខ្លួន​ជនសង្ស័យ​ឈ្មោះ មាន សម្បត្តិ ហៅ សម្បត្តិ​ប៉ូលិស​ក៏បាន យក​ទឹកនោម​ជនសង្ស័យ​រូបនេះ​មក​ធ្វើ​តេស្ត​ស្វែងរក​សារធាតុ​ញៀន​ក្នុង​ទឹកនោម ជា​លទ្ធផល មាន​ភាព វិជ្ជមាន (​មាន​សារធាតុ​ញៀន )។

បច្ចុប្បន្ន​ជនសង្ស័យ​ឈ្មោះ មាន សម្បត្តិ ហៅ សម្បត្តិ កំពុង​ឃាត់ខ្លួន​ជា​បណ្ដោះអាសន្ន នៅ​អធិការដ្ឋាន នគរបាល​ខណ្ឌទួលគោក ដើម្បី​ធ្វើការ​សាកសួរ​កសាង​សំណុំរឿង នឹង​បញ្ជូន​ជនសង្ស័យ​ទៅ​សាលាដំបូង​រាជធានី​ភ្នំពេញ ចាត់ការ​តាម​នីតិវិធី​ច្បាប់​៕

  

Source: Kampuchea Thmey Daily