លោក Anthony Bourdain ដែលជាមេចុងភៅដ៏ល្បីល្បាញជនជាតិអាមេរិក និងជាអ្នកនិពន្ធដែលបានចែករំលែកនូវចំណាប់អារម្មណ៍ដ៏ខ្លាំងក្លារបស់គាត់ចំពោះអាហារនិងវប្បធម៌របស់ពិភពលោកជាមួយមនុស្សរាប់លាននាក់តាមរយៈកម្មវិធីទូរទស្សន៍ដ៏មានប្រជាប្រិយភាពរបស់គាត់នោះ គឺបានទទួលមរណភាពនៅអាយុ៦១ឆ្នាំ។
បណ្តាញនេះបាននិយាយកាលពីថ្ងៃសុក្រថា លោក Bourdain បានធ្វើអត្តឃាត ខណៈស្ថិតនៅប្រទេសបារាំងដើម្បីថតកម្មវិធីអាហារនិងដំណើរកម្សាន្ត “Parts Unknown” របស់ CNN ។
អាជ្ញាធរបារាំងបាននិយាយថា លោក Bourdain បានស្លាប់ដោយចង.កនៅឯសណ្ឋាគារប្រណីត Chambard ក្នុងភូមិ Kaysersberg នៃតំបន់ Alsace។
ទូរទស្សន៍ CNN បាននិយាយថា សពរបស់លោក Bourdain ត្រូវបានរកឃើញនៅក្នុងបន្ទប់សណ្ឋាគាររបស់គាត់ដោយមិត្តជិតស្និទ្ធរបស់គាត់ឈ្មោះ Eric Ripert ដែលជាមេចុងភៅប្រតិបត្តិរបស់បារាំងនៅភោជនីយដ្ឋានក្រុងញូវយ៉ក Le Bernardin ។
លោក Bourdain បានលើកកម្ពស់ម្ហូបអាហារបែបលោកខាងលិចនិងម្ហូបតាមចិញ្ចើមថ្នល់នៅក្នុងការធ្វើដំណើររបស់គាត់ដោយលើកទឹកចិត្តទស្សនិកជនឲ្យបរិភោគនិងផឹកជាមួយមនុស្សដោយគ្មានការភ័យខ្លាចនិងការរើសអើង។
លោក Bourdain បាននិយាយនៅក្នុងសុន្ទរកថាទទួលពានរង្វាន់ Peabody ឆ្នាំ២០១៤ថា “យើងសូមសួរសំណួរសាមញ្ញៗ : តើអ្វីដែលធ្វើឲ្យអ្នកសប្បាយចិត្ត? តើអ្នកចូលចិត្តញ៉ាំអ្វី? តើអ្នកចូលចិត្តចម្អិនអ្វី? ។ ហើយនៅគ្រប់ទីកន្លែងក្នុងពិភពលោក យើងទៅហើយសួរសំណួរសាមញ្ញៗទាំងនេះ។ យើងមានទំនោរចង់ទទួលបាននូវចម្លើយដ៏គួរឲ្យភ្ញាក់ផ្អើល”។
លោក Bourdain មានភាពរីករាយក្នុងការណែនាំមនុស្សឲ្យមានមុខម្ហូបថ្មី។ នៅក្នុងវគ្គមួយនៃកម្មវិធី “Parts Unknown”, គាត់បានបង្ហាញលោកប្រធានាធិបតី Barack Obama អំពីវិធីបរិភោគគុយទាវវៀតណាមនៅភោជនីយដ្ឋានមួយក្នុងទីក្រុងហាណូយ។
បន្ទាប់ពីចាប់ផ្ដើមពីការលាងចាននៅក្នុងភោជនីយដ្ឋានមួយ លោក Bourdain ដែលមានដើមកំណើតនៅទីក្រុងញូវយ៉កគឺបានកើនឡើងបន្តិចម្ដងៗដើម្បីក្លាយទៅជាចុងភៅមួយរូប។
គាត់បានបន្សល់ទុកកូនស្រីវ័យក្មេងម្នាក់ឈ្មោះ Ariane ពីទំនាក់ទំនងរបស់គាត់ជាមួយអតីតប្រពន្ធឈ្មោះ Ottavia Busia ។
គាត់បានទាក់ទងជាមួយតារាសម្តែងអ៊ីតាលីឈ្មោះ Asia Argento ចាប់តាំងពីឆ្នាំ២០១៧មកនិងបានក្លាយជាអ្នកតស៊ូមតិឥតសំចៃមាត់សម្រាប់ចលនា #MeToo ។
ការស្លាប់របស់ Bourdain បានកើតឡើងក្នុងរយៈពេលត្រឹមតែប៉ុន្មានថ្ងៃប៉ុណ្ណោះបន្ទាប់ពីការធ្វើអត្តឃាតរបស់អ្នកល្បីឈ្មោះជនជាតិអាមេរិកម្នាក់ទៀតគឺអ្នករចនាម៉ូដកាបូប Kate Spade ក្នុងអាយុ៥៥ឆ្នាំ៕ AFP
Source: Kampuchea Thmey Daily
0 Comments