ខ្យល់កន្ត្រាក់ បាក់ប៉ាណូ១ផ្ទាំងធំនៅខាងមុខប៉ុស្តិ៍ប៉ូលិសចតុមុខខណ្ឌដូនពេញ ខូចម៉ូតូ១គ្រឿង

ភ្នំពេញ ៖ ខ្យល់កន្ត្រាក់បោកបក់ខ្លាំង មុនពេលភ្លៀង បានធ្វើឲ្យដែកប៉ាណូផ្សាយពាណិជ្ជកម្មមួយផ្ទាំងធំ បានបាក់ធ្លាក់រាយប៉ាយពេញផ្លូវ ហើយក្នុងហេតុការណ៍នេះ មិនបណ្ដាលឲ្យមានអ្នកគ្រោះថ្នាក់ឡើយ ប៉ុន្តែម៉ូតូសង់កូរ៉េ១គ្រឿង ត្រូវរងការខូចខាតស្ទើរទាំងស្រុង។

ខ្យល់កន្ត្រាក់ ខណៈមេឃរលឹមតិចៗ ធ្វើឲ្យបាក់រលំដើមឈើ និងជាពិសេសបាក់ប៉ាណូមួយផ្ទាំងធំនោះ បានកើតឡើងកាលពីវេលាម៉ោង១៣និង៤០នាទីនៅចំណុចស្ថិតខាងមុខប៉ុស្តិ៍រដ្ឋបាលចតុមុខខណ្ឌដូនពេញ ក្បែររង្វង់មូលសម្តេចសង្ឃរាជជូន ណាតនៅបណ្តោយផ្លូវព្រះស៊ីសុវត្ថិ។

ប្រភពព័ត៌មានពីស្ត្រីម្នាក់ ដែលគាត់ប្រកបរបរលក់នៅក្បែរប៉ាណូមួយផ្ទាំងធំស្ថិតខាងមុខប៉ុស្តិ៍រដ្ឋបាលចតុមុខនោះ បានឲ្យដឹងថា ខណៈដែលគាត់កំពុងតែលក់ដូរ ស្រាប់តែមេឃងងឹតស្លុប ហើយធ្លាក់ខ្យល់កន្ត្រាក់ ស្របពេលមេឃធ្លាក់ភ្លៀងតិចៗផងនោះ បានធ្វើឲ្យដែកប៉ាណូមួយផ្ទាំងធំ នៅលើកន្លែងគាត់លក់ដូរ បាក់ធ្លាក់មកផ្លូវលាន់ក្រាំងតែម្ដង។

ស្ត្រីរូបនោះបានបន្តថា ខណៈដែលឃើញសភាពមិនស្រួលគាត់ក៏ប្រញាប់រត់ចេញទៅជ្រកក្បែរប៉ុស្តិ៍ប៉ូលិស តែក៏ចាត់ទុកជាសំណាងហើយ ដែលរបស់របរលក់ដូររបស់គាត់មិនរងការខូចខាតនោះ។ប៉ុន្តែម៉ូតូម៉ាកC១០០កូរ៉េមួយគ្រឿងមិនដឹងជារបស់អ្នកណានោះទេ បានរងការខូចខាតដោយសារតែដែកប៉ាណូនោះធ្លាក់សង្កត់ចំនោះ។

ប្រភពព័ត៌មានពីកន្លែងកើតហេតុបានឲ្យដឹងដែរថា ខណៈដែលមេឃធ្លាក់ខ្យល់កន្ត្រាក់នោះដែរ ក៏ចាត់ទុកជាសំណាងមួយហើយ ដែលអ្នកដំណើរដែលបើកបរឆ្លងកាក់ក្រោមប៉ាណូមួយផ្ទាំងធំដែលបាក់ធ្លាក់នោះ ចៃដន្យគ្មានអ្នកណាគ្រោះថ្នាក់នោះ។

អាជ្ញាធរមូលដ្ឋានខណ្ឌដូនពេញបានឲ្យដឹងថា ក្នុងហេតុការណ៍ខ្យល់កន្ត្រាក់នោះដែរ សម្រាប់នៅក្នុងមូលដ្ឋានខណ្ឌដូនពេញគឺមានបាក់ដើមឈើ បាក់បង្គោលភ្លើងនៅកន្លែងផ្សេងទៀតរួមទាំងប៉ើងដំបូលផ្ទះរួមទាំងកាដ្ឋានសំណង់នានា ត្រូវប៉ើងធ្លាក់របស់របរផ្សេងៗផងដែរ និងជាពិសេសការបាក់ធ្លាក់ដែកប៉ាណូនោះ សរុបជារួមមិនបណ្តាលឲ្យមានអ្នកគ្រោះថ្នាក់នោះទេ។

អាជ្ញាធរខណ្ឌដូនពេញបញ្ជាក់ទៀតថា ចំពោះបាក់ដើមឈើ និងបាក់ប៉ាណូនេះដែរ កម្លាំងអាជ្ញាធរបានចាត់ចែងរើចេញជាបន្ទាន់ដើម្បីកុំឲ្យមានការកកស្ទះចរាចរណ៍ដល់អ្នកដំណើរផងដែរ៕