បុរស​អាមេរិក​ម្នាក់ ​ត្រូវបាន​ឃុំឃាំង​ក្នុងប្រទេស​វៀតណាម ​បន្ទាប់ពី​ការតវ៉ា​ដោយ​ហិង្សា

មន្ត្រី​ម្នាក់​បាន​និយាយ​កាលពី​ថ្ងៃ​ព្រហស្បតិ៍​ថា ជនជាតិ​អាមេរិក​ម្នាក់​ត្រូវ​បាន​ឃុំខ្លួន​នៅក្នុង​ប្រទេស​វៀតណាម​ពីបទ “​រំខាន​ដល់​សណ្តាប់ធ្នាប់​សាធារណៈ​” បន្ទាប់ពី​គាត់​បាន​ចូលរួម​បាតុកម្មហិង្សា​លើ​សេចក្តីព្រាងច្បាប់​តំបន់​សេដ្ឋកិច្ច​ពិសេស​ដ៏​ចម្រូងចម្រាស​មួយ​។​
​
លោក William Anh Nguyen អាយុ​៣២​ឆ្នាំ​បាន​ចូលរួម​ក្នុងការ​ប្រមូលផ្តុំ​មួយ​នៅក្នុង​ប្រទេស​កុម្មុយនិស្ត​មួយ​នេះ​កាលពី​ថ្ងៃអាទិត្យ​ដែល​ក្រុមអ្នកតវ៉ា​បាន​ចោទប្រកាន់​រដ្ឋាភិបាល​ថា​មាន​ផែនការ​ផ្តល់​ដី​ជួល​រយៈពេល​វែង​នៅក្នុង​តំបន់​នោះ​។​
​
មនុស្ស​ជាង​១០០​នាក់​ត្រូវបាន​ឃុំខ្លួន​នៅ​ខេត្ត Binh Thuan បន្ទាប់ពី​ការធ្វើ​បាតុកម្ម​បាន​រាលដាល​យ៉ាង​ឆាប់រហ័ស​នៅពេល​ក្រុម​កុបករ​បាន​ដុត​រថយន្ត​និង​បំផ្លាញ​ទីតាំង​របស់​រដ្ឋាភិបាល​។​
​
អ្នកនាំពាក្យ​ក្រសួងការបរទេស​លោក​ស្រី Le Thi Thu Hang បាន​ប្រាប់​អ្នកយកព័ត៌មាន​កាលពី​ថ្ងៃ​ព្រហស្បតិ៍​ថា ហ្វូងមនុស្ស​ដ៏​ធំ​ដែល​បាន​ប្រមូល​ផ្តុំគ្នា​នៅ​ទីក្រុង​ហូជីមិញ​រួមទាំង​លោក Nguyen ផងដែរ​នោះ​គឺ​ត្រូវបាន​ចាប់ខ្លួន​កាលពី​ថ្ងៃអាទិត្យ​ហើយ​កំពុង​ត្រូវបាន​ឃុំឃាំង​សម្រាប់​ការធ្វើ​ឲ្យ​រំខាន​ដល់​សណ្តាប់ធ្នាប់​សាធារណៈ​។​
​
លោកស្រី​បាន​បន្ថែមថា “​ដំណើរ​សួរសុខទុក្ខ​របស់​ស្ថាន​កុងស៊ុល​សម្រាប់​បុគ្គល​ម្នាក់នេះ​កំពុងស្ថិត​នៅក្រោម​ការរៀប​ចំ​ហើយ​គ្មាន​ការប្រើប្រាស់​កម្លាំង​ទាក់ទង​នឹង​បុគ្គល​នេះ​ទេ​”​។​
​
ស្របពេល​ជាមួយគ្នា​នោះដែរ ស្ថានទូត​អាមេរិក​នៅ​ទីក្រុង​ហាណូយ​បាន​និយាយថា ខ្លួន​បានដឹង​អំពី​របាយការណ៍​ប្រព័ន្ធ​ផ្សព្វផ្សាយ​ដែលថា ពលរដ្ឋ​អាមេរិក​ត្រូវបាន​ចាប់ខ្លួន​នៅ​វៀតណាម​។​
​
អ្នកនាំពាក្យ​ស្ថានទូត​លោក Pope Thrower បាន​និយាយ​នៅក្នុង​សេចក្តីថ្លែងការណ៍​មួយ​ថា “​នៅពេល​ពលរដ្ឋ​អាមេរិក​ម្នាក់​ត្រូវបាន​ឃុំខ្លួន​នៅក្រៅ​ប្រទេស ក្រសួងការបរទេស​ស​ហ​រដ្ឋ​អាមេរិក​ត្រូវ​ធ្វើការ​ដើម្បី​ផ្តល់ជំនួយ​កុងស៊ុល​ទាំងអស់​ឲ្យ​បាន​សមស្រប​”​។​
​
គួរបញ្ជាក់​ជាថ្មី​ថា បាតុកម្ម​នៅ​ចុង​សប្ដាហ៍​បាន​កើតឡើង​នៅក្នុង​ទីក្រុង​ជាច្រើន​រួមទាំង​ទីក្រុង​ហាណូយ​ផងដែរ​បើទោះបីជា​រដ្ឋាភិបាល​និយាយថា ខ្លួន​នឹង​ពន្យារពេល​ការបោះឆ្នោត​លើ​តំបន់​សេដ្ឋកិច្ច​ពិសេស​ក៏ដោយ​៕ AFP

​

Source: Kampuchea Thmey Daily