បាត់ដំបង ៖ ជនសង្ស័យចំនួន៣នាក់ ត្រូវបានកម្លាំងសមត្ថកិច្ច ធ្វើការឃាត់ខ្លួនបានជាបន្តបន្ទាប់ រួមជាមួយនឹងថ្នាំញៀនមួយចំនួនផងដែរ ខណៈដែលពួកគេកំពុងធ្វើសកម្មភាពចែកចាយថ្នាំញៀនជាក់ស្តែង។
នៅក្នុងកិច្ចប្រតិបត្តិការរបស់កម្លាំងសមត្ថកិច្ចមូលដ្ឋាន ក៏ដូចជាកម្លាំងជំនាញ នេះគឺលោកវរសេនីយ៍ទោ ស៊ាន សុណាល់ នាយការិយាល័យ នគរបាលប្រឆាំងគ្រឿងញៀនបានលើកឡើងថា ក្នុងកិច្ចប្រតិបត្តិការលើកទី១ គឺបានប្រព្រឹត្តឡើងកាលពីថ្ងៃទី ១១ ខែមិថុនា ឆ្នាំ២០១៨ វេលាម៉ោង ៣ រសៀល ដោយកម្លាំងអធិការដ្ឋាន បានចុះទៅកាន់ចំណុចក្នុងបរិវេណវត្តផ្តាច់ព្រាត់ ស្ថិតក្នុង ភូមិផ្តាច់ព្រាត់ ឃុំបវេល ស្រុកបវេលខេត្តបាត់ដំបង ដោយបានឃាត់ខ្លួនជនសង្ស័យម្នាក់ឈ្មោះ ហ៊ួន រ៉េត ភេទប្រុស អាយុ៣៥ឆ្នាំ រស់នៅភូមិ ដង្កោក្រម៉ាង ឃុំអំពិលប្រាំដើម ស្រុកបវេល ។
នៅក្នុងកិច្ចប្រតិបត្តិការលើកទី១ នេះ សមត្ថកិច្ចបានដកហូតនូវថ្នាំញៀនប្រភេទម៉ាទឹកកកបានចំនួន ៣ កញ្ចប់ ស្មើនឹង០,៤៧ ក្រាម ថ្នាំញៀនប្រភេទយ៉ាម៉ា ចំនួន ១២,៥០ គ្រាប់និងទូរស័ព្ទដៃ ១ គ្រឿង។ បន្ទាប់ពីទទួលបានចម្លើយសារភាពរួចមក សមត្ថកិច្ថបានសុំគោលការទៅលោកព្រះរាជអាជ្ញា នួន សាន ដោយបានបន្តទៅកាន់ចំណុចភូមិបវេល១ ឃុំបវេល នៅវេលាម៉ោង ៤ និង ៤៨ នាទី ល្ងាច នាថ្ងៃ ដដែល ព្រមទាំងបានឃាត់ខ្លួន មុខសញ្ញាសង្ស័យបានម្នាក់ទៀត ឈ្មោះ ជោតិ វាសនា ភេទប្រុស អាយុ២៨ឆ្នាំ រស់នៅត្រង់ចំណុចខាងលើ ដោយបានដកហូតថ្នាំញៀនប្រភេទម៉ាទឹកកកចំនួន ៩ កញ្ចប់ស្មើ ១,២៦ ក្រាម យ៉ាម៉ាចំនួន ២ គ្រាប់ និងសម្ភារៈសម្រាប់សេពមួយចំនួន។
រីឯករណីទី៣ គឺបានប្រព្រឹត្តឡើងនៅថ្ងៃទី ១២ ខែ ឆ្នាំ ដដែល វេលាម៉ោង ២ និង ១៥ នាទី រសៀល ត្រង់ចំណុចភូមិ កាប់គោថ្មី សង្កាត់អូរចារ ក្រុងបាត់ដំបង ដោយនៅទីនោះកម្លាំងបានឃាត់ខ្លួនជនសង្ស័យម្នាក់បន្ថែមទៀតឈ្មោះ ឆាយ អេងលី ភេទប្រុស អាយុ៦៣ឆ្នាំ រស់នៅត្រង់ចំណុចខាងលើ ព្រមទាំងបានដកហូតនូវថ្នាំញៀនប្រភេទម៉ាទឹកកក បានចំនួន ៤ កញ្ចប់ ស្មើ ១៥,១១ ក្រាម និងទូរស័ព្ទដៃ ១ គ្រឿង។
បច្ចុប្បន្នជនសង្ស័យទាំងអស់ ត្រូវបានកម្លាំងបញ្ជូនទៅកាន់សាលាដំបូងខេត្តហើយ ក្នុងការចាត់វិធានការតាមផ្លូវច្បាប់៕
Source: Kampuchea Thmey Daily
0 Comments