ភ្នំពេញ ៖ ដើម្បីបង្កលក្ខណៈងាយស្រួលដល់បងប្អូនប្រជាពលរដ្ឋជាអ្នកថ្មើរជើង និងជនពិការ និងដើម្បីជាលើកកម្ពស់សោភណភាព រាជធានីភ្នំពេញ អោយកាន់តែមានភាពស្រស់បំព្រងមួយកម្រិតថែមទៀតនោះ រដ្ឋបាលរាជធានីភ្នំពេញ នឹងរៀបចំការ៉ូឡាថ្មី លើចិញ្ចើមមហាវិថី ព្រះនរោត្តម ចាប់ពីរមណីយដ្ឋានវត្តភ្នំ ដល់វិមានឯករាជ្យ សម្រាប់អ្នកថ្មើរជើងរួមនឹងការរៀបចំតម្រាយផ្លូវសម្រាប់ជនពិការផង។
មន្ត្រីរដ្ឋបាលរាជធានីភ្នំពេញបានអោយដឹងថា ដើម្បីលើកកម្ពស់សោភ័ណភាព និងដើម្បីរៀបចំសណ្ដាប់ធ្នាប់សម្រាប់អ្នកថ្មើរជើងអោយបានល្អប្រសើរ រដ្ឋបាលរាជធានីភ្នំពេញ នឹងរៀបចំការឺឡាថ្មីនៅចិញ្ចើមមហាវិថី ព្រះនរោត្តម ចាប់ពីរមណីយដ្ឋានវត្តភ្នំ ដល់វិមានឯករាជ្យ។ ចំពោះគម្រោងនេះ ក៏នឹង មានការរៀបចំតម្រាយផ្លូវសម្រាប់ជនពិការផង។
លោកសាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានអោយដឹងនៅរសៀលថ្ងៃទី០៩ ខែឧសភានេះថា គម្រោងនៃការរៀបចំសណ្ដាប់ធ្នាប់សម្រាប់អ្នកថ្មើរជើងអោយបានល្អប្រសើរ លើចិញ្ចើមមហាវិថី ព្រះនរោត្តម ចាប់ពីរមណីយដ្ឋានវត្តភ្នំ ដល់វិមានឯករាជ្យនេះ មិនទាន់បានកំណត់ថា ថ្ងៃណានឹងចាប់ផ្តើមអនុវត្តនោះទេ។ តែលោកបានបញ្ជាក់ថា គម្រោងនេះយើងប្រជុំពិភាក្សាជាមួយមន្ត្រីជំនាញសិន អាចនៅសប្តាហ៍ក្រោយ ឬចុងសប្តាហ៍ក្រោយនេះនឹងចាប់ផ្តើមអនុវត្តការងារនេះហើយ៕
Source: Kampuchea Thmey Daily
0 Comments