កំពង់ឆ្នាំង ៖ យុវជន២នាក់ បានរងរបួសធ្ងន់ និងម្នាក់បានស្លាប់ ពេលដឹកទៅសង្គ្រោះនៅមន្ទីរពេទ្យខេត្តនៅ ក្នុងករណីគ្រោះថ្នាក់ចរាចរណ៍រវាងរថយន្ត និងម៉ូតូ នៅលើផ្លូវក្រាលកៅស៊ូក្នុងខេត្ត ចំណុចផ្លូវបំបែកជា៤ ក្រោយរោងចក្រអឹមវ៉េ ស្ថិតនៅក្នុងភូមិត្រពាំងចឹក្សា សង្កាត់កំពង់ឆ្នាំង ក្រុងកំពង់ឆ្នាំង ដែលហេតុការណ៍នេះ បានកើតឡើងនៅវេលាម៉ោង ០១ និង១០នាទី រសៀលថ្ងៃទី ១១ ខែមិថុនា ឆ្នាំ២០១៨។
សមត្ថកិច្ចនគរបាលចរាចរណ៍ ក្រុងកំពង់ឆ្នាំង បានអោយដឹងថាៈ មុនពេលកើតហេតុ មានរថយន្តមួយគ្រឿងម៉ាកហ៊ីណូ ពណ៌ស ពាក់ស្លាកលេខភ្នំពេញ 3B 4214 បើកបរ ដោយជនពុំស្គាល់ឈ្មោះ បានបើកបរក្នុងទិសដៅ ពីកើតទៅលិច។ ចំណែកម៉ូតូ១គ្រឿងទៀត ម៉ាកវ៉េវពណ៌ខ្មៅពាក់ស្លាកលេខកំពង់ស្ពឺ 1B 4058 បើកបរដោយយុវជនម្នាក់ឈ្មោះ គង់ វីវ៉ា អាយុ២៦ ឆ្នាំ មានទីលំនៅភូមិត្រពាំងបី សង្កាត់កំពង់ឆ្នាំង ក្រុងកំពង់ឆ្នាំង បានដឹកបុរសម្នាក់ទៀតពីក្រោយមានឈ្មោះ នាង ស៊ិនតារា អាយុ ៣០ ឆ្នាំ មានទីលំនៅភូមិកំពង់អូស សង្កាត់ផ្សារឆ្នាំង ក្រុងកំពង់ឆ្នាំង បើកបរក្នុងដំណើរពីត្បូងទៅជើង។ លុះដល់ចំណុចកើតហេតុផ្លូវខ្វែងជា៤ ក៏បានបុកជាមួយរថយន្តពេញទំហឹងតែម្ដង បណ្ដាលឲ្យអ្នកជិះម៉ូតូទាំង២នាក់ រងរបួសជាទម្ងន់ និងបានដឹកទៅសង្គ្រោះនៅមន្ទីរពេទ្យខេត្ត។ ប៉ុន្តែដោយសារតែរបួសធ្ងន់ធ្ងរពេក យុវជនឈ្មោះ គង់ វីវ៉ា ក៏បានស្លាប់នៅក្នុងមន្ទីរពេទ្យខេត្តកំពង់ឆ្នាំង។
ក្រោយពេលកើតហេតុ អ្នកបើកបររថយន្ត បានរត់គេចខ្លួនបាត់។ ដោយឡែកសមត្ថកិច្ច ក៏បានធ្វើការវាស់វែងប្លង់កើតហេតុ និងបានយករថយន្តនិងម៉ូតូទៅរក្សាទុកនៅអធិការនគរបាលក្រុងកំពង់ឆ្នាំង ដើម្បីរង់ចាំការដោះស្រាយតាមនីតិវិធីច្បាប់។ ចំណែកជនរងគ្រោះដែលស្លាប់នៅមន្ទីរពេទ្យខេត្ត ត្រូវបានក្រុមគ្រួសារដឹកយកទៅ ធ្វើបុណ្យតាមប្រពៃណី។ ចំពោះអ្នករងរបួសធ្ងន់ កំពុងស្ថិតក្នុងការសង្គ្រោះបន្ទាន់ពីក្រុមគ្រូពេទ្យខេត្តកំពង់ឆ្នាំង។
សមត្ថកិច្ចបានបញ្ជាក់អោយដឹងថាៈ គ្រោះថ្នាក់ចរាចរណ៍ខាងលើ បណ្តាលមកពីការបើកបរលឿនៗពេក ខ្វះការប្រុងប្រយ័ត្ន រវាងអ្នកបើកបររថយន្ត និងអ្នកបើកម៉ូតូអត់ពាក់មួកសុវត្ថិភាព និងព្រោះតែនៅចំណុចកើតហេតុជាផ្លូវខ្វែងទិសជា៤ បាំងព្រៃនិងផ្ទះប្រជាពលរដ្ឋមើលគ្នាមិនឃើញ ទើបបង្កអោយមានគ្រោះថ្នាក់បែបនេះ៕
Source: Kampuchea Thmey Daily
0 Comments