សៀមរាប ៖ កាលពីរសៀល ថ្ងៃទី១១ ខែមិថុនា ឆ្នាំ២០១៨ លោកបណ្ឌិត ឃឹម ប៊ុនសុង សមាជិកកណ្ដាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សប្រជាជនកម្ពុជា ខេត្តសៀមរាប បានប្រកាសទទួលស្គាល់ សមាជិកសមាជិកាគណបក្សប្រជាជនកម្ពុជា ឃុំលាងដៃ ស្រុកអង្គរធំ ដែលមកពីអតីតគណបក្សសង្គ្រោះជាតិ គណបក្សហ៊្វុនស៊ិនប៉ិច និងគណបក្សសម្ព័ន្ធដើម្បីប្រជាធិបតេយ្យ សរុបទាំងអស់ចំនួន ៤៩៦ នាក់ ស្រី ២៩០ នាក់។
ក្នុងឱកាសនេះដែរ លោកបណ្ឌិត ប្រធានគណបក្សខេត្ត បានជម្រាបជូនអង្គពិធីពីប្រវត្តិនៃដើមកំណើតរបស់គណបក្ស និងសមិទ្ធផលស្នាដៃធំៗ ជាប្រវត្តិសាស្ត្រក្នុងការអភិវឌ្ឍ របស់គណបក្ស ចំពោះប្រទេសជាតិ ព្រមទាំងសភាពការណ៍នយោបាយ និងធ្វើអោយសេដ្ឋកិច្ចជាតិមានការរីកចម្រើនជាបន្តបន្ទាប់។
ជាមួយគ្នានោះដែរលោក ឃឹម ប៊ុនសុង មានប្រសាសន៍ថា សមាជិកថ្មីទាំងអស់ ត្រូវខិតខំផ្សព្វផ្សាយនិងបញ្ជ្រាបគោលនយោបាយរបស់គណបក្ស ជូនបងប្អូនប្រជាពលរដ្ឋ នៅតាមមូលដ្ឋានកុំអោយស្ដាប់ការឃោសនាបោកប្រាស់របស់គណបក្សមួយចំនួន។
លោកក៏បានបញ្ជាក់ថា ទោះជាគណបក្សប្រជាជនកម្ពុជា បានធ្វើល្អយ៉ាងណាក៏ដោយ តែនៅមានក្រុមជនអគតិផ្កាប់មុខមួយចំនួន បានស្រែកឃោសនាបោកប្រាស់ មិនឲ្យប្រជាពលរដ្ឋ ទៅបោះ ឆ្នោតនាពេលខាងមុខនេះ ដែលជាអំពើខុសច្បាប់រួចទៅហើយ ដូច្នេះសូមបងប្អូនប្រជាពលរដ្ឋឈប់ចាញ់បោកពួកក្រុមនេះបន្តទៀត ដែលជាអ្នកអូសទាញបងប្អូន ឱ្យទៅជាប់ពាក់ព័ន្ធនឹងទោសទណ្ឌជាមួយឲ្យសោះ»។
ទន្ទឹមនឹងនោះដែរ លោកបានថ្លែងអំណរគុណយ៉ាងជ្រាលជ្រៅចំពោះសមាជិក សមាជិកា គណបក្សប្រជាជនកម្ពុជាថ្មីទាំងអស់ ដែលបានមើលឃើញ និងជឿជាក់លើកការដឹកនាំរបស់គណបក្សប្រជាជនកម្ពុជា និងគាំទ្រគណបក្សប្រជាជនកម្ពុជា។ ដើម្បីធានានូវសន្តិភាពនិងនិរន្តរភាពនៃការអភិវឌ្ឍ សូមបងប្អូនបន្តបោះឆ្នោតជូនគណបក្សប្រជាជនកម្ពុជាដែលមានលេខរៀងទី២០ នៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ។
ក្នុងពិធីនេះដែរ លោកប្រធានគណបក្សខេត្ត បានផ្តល់ជូនសមាជិក ទាំង ៤៩៦ នាក់ ក្នុងម្នាក់ៗ ទទួលបានថវិកា ២ ម៉ឺនរៀល ផងដែរ៕
Source: Kampuchea Thmey Daily
0 Comments