ភ្នំពេញ ៖ យុវជនពីរនាក់ បានរងរបួសធ្ងន់ធ្ងរ ដោយម្នាក់បាក់ធ្មេញចំនួនប្រាំគ្រាប់ និងម្នាក់ទៀតបាក់ជើងម្ខាង បន្ទាប់ពីជិះម៉ូតូលឿនពេកមិនប្រយ័ត្ន បុកគូទរថយន្តកុងតឺន័រពីក្រោយពេញទំហឹងដួលប្រកាច់ប្រកិន កាលវេលាម៉ោង៨និង៥០នាទីយប់ថ្ងៃទី១១ ខែមិថុនា ឆ្នាំ២០១៨ តាមបណ្តោយផ្លូវវេងស្រេង ទល់មុខផ្សារត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ។
រថយន្តកុងតឺន័រម៉ាក ISUZUពណ៌សពាក់ស្លាកលេខពោធិ៍សាត់ 3A 0397បើកបរក្នុងទិសដៅពីកើតទៅលិច។ ម៉ូតូរងគ្រោះម៉ាកហុងដាឌ្រីមសេ១២៥ស៊េរី២០១៤ ពណ៌ខ្មៅ ពាក់ស្លាកលេខភ្នំពេញ1CI 8595 ជិះគ្នា២នាក់ បើករបរក្នុងទិសដៅពីកើតទៅលិច ស្របគ្នា។
តាមប្រភពព័ត៌មានពីកន្លែងកើតហេតុបាននិយាយថា នៅមុនពេលកើតហេតុ គេឃើញរថយន្ត កុងតឺន័រមួយគ្រឿង បើកបរ ក្នុងទិសដៅពីកើតទៅលិច ក្នុងល្បឿនលឿនគួរសម។ បន្ទាប់មកស្រាប់តែមាន ម៉ូតូមួយគ្រឿងជិះឌុបគ្នា២នាក់ ក្នុងល្បឿនលឿន ពីក្រោយរថយន្តកុងតឺន័រ លុះបើកមកដល់ចំណុចកើតហេតុ រថយន្តកុងតឺន័របានជាន់ហ្វ្រាំងបន្ថយល្បឿន, ម៉ូតូរងគ្រោះ មិនបានចាប់អារម្មណ៍ថាឡាន ជាន់ហ្វ្រាំង ក៏បានជ្រុលទៅបុកគូទរថយន្តកុងតឺន័រពីក្រោយពេញទំហឹងបណ្តាលអោយជនរងគ្រោះជាអ្នកបើកបរបាក់ធ្មេញអស់ចំនួន៥គ្រាប់ ហើយអ្នករួមដំណើរដួលបោកនឹងថ្នល់បាក់ជើងម្ខាង ត្រូវបានរថយន្ដសង្គ្រោះឯកជនដឹកទៅសង្គ្រោះភ្លាមៗផងដែរ។
ប្រភពបានបន្តទៀតថា ខណៈពេលគ្រោះថ្នាក់ភ្លាមៗ ភាគីខាងរថយន្តកុងតឺន័រ មិនដឹងថា ត្រូវម៉ូតូបុករថយន្តគាត់ឡើយ ហើយបានបើកទៅមុខតាមសម្រួលនៅពេលដែលប្រជាពលរដ្ឋនាំគ្នាជិះម៉ូតូដេញតាមឃាត់ ទើបដឹងថា រថយន្ដមានប៉ះគ្នាជាមួយម៉ូតូ។
ក្រោយមកទើបសមត្ថកិច្ចជំនាញចរាចរក្រុងមកវាស់វែងយករថយន្ដ និងម៉ូតូទៅរក្សាទុករង់ចាំដោះស្រាយគ្នានៅពេលក្រោយ៕
Source: Kampuchea Thmey Daily
0 Comments