អ្នកប្រដាល់កម្ពុជា ឡៅ ចិត្រា ក្លិបកងពលតូចទ័ពពិសេសឆ័ត្រយោង៩១១ ត្រូវគេផ្គូផ្គងអោយជួបប្រកួតជាមួយអ្នកប្រដាល់ថៃឈ្មោះFa Nemith នាយប់ថ្ងៃសុក្រទី១៥ ខែមិថុនា ឆ្នាំ២០១៨នេះ នៅក្នុងកម្មវិធីប្រដាល់គូបូតារបស់បាយ័ននៅសង្វៀនស្ទឹងមានជ័យ។
Fa Nemith ជាអ្នកប្រដាល់ថៃដែលធ្លាប់មកប្រកួតនៅស្រុកខ្មែរម្តងពីរដងហើយកន្លងមក ។ Fa Nemith និង ឡៅ ចិត្រា នឹងប្រកួតគ្នាក្នុងប្រភេទទម្ងន់៦៣,៥០០គីឡូក្រាម។
អ្នកប្រដាល់ថៃនេះ មានកំនត់ត្រាប្រកួតចំនួន៦៧លើក ឈ្នះ៥៥លើក ចាញ់១១លើក ស្មើ០១លើក ។ អ្នកប្រដាល់ថៃម្នាក់នេះ មានកាយសម្បទារឹងមាំ មានកម្ពស់ប្រហាក់ប្រហែលឡៅ ចិត្រា ដែរ គឺ១,៧០ម៉ែត្រ ។ តែយ៉ាងណា Fa Nemithមិនដឹងថា អាចវាយឈ្នះអ្នកប្រដាល់កម្ពុជាឡៅ ចិត្រា បានឬអត់នោះទេ?។
ឡៅ ចិត្រា ជាអ្នកប្រដាល់ជើងខ្លាំងស្រករក្រោយរបស់កម្ពុជា ដែលធ្លាប់ប្រកួតជាមួយអ្នកប្រដាល់ថៃច្រើននាក់មកហើយនាពេលកន្លងមក ដែលភាគច្រើនឈ្នះសឹងតែទាំងអស់រាល់ពេលជួបជាមួយថៃនោះ។និយាយជារួម ចិត្រា ទាំងបទពិសោធន៍ ទាំងស្នៀតប្រដាល់ ល្បិចកលនិងកាយសម្បទា សុទ្ធតែល្អនិងខ្លាំង ដែលអាចទុកចិត្តបានថា អាចយកឈ្នះលើអ្នកប្រដាល់ថៃFa Nemith បានមិនខាន។
យ៉ាងណា សំរាប់ការជួបអ្នកប្រដាល់ថៃFa Nemith លើកនេះ គេមានជំនឿទុកចិត្តលើឡៅ ចិត្រា ថានឹងអាចយកឈ្នះFa Nemith នេះវិញបានមិនខាន ព្រោះថាអ្នកប្រដាល់ថៃរូបនេះ គេធ្លាប់វាយឈ្នះវេង សុភ័ក្រ មិត្តរួមគ្រូរបស់គេត្រឹមតែពិន្ទុប៉ុណ្ណោះ។
Fa Nemith គេមកប្រកួតលើកមុន វាយឈ្នះថុល មករា អ្នកប្រដាល់ក្លិបឃ្លាំងមឿងកីឡា ដោយពិន្ទុ ហើយមកលើកចុងក្រោយនេះ Fa Nemith ចាញ់ឃុន ឌីម៉ា មុនទឹកទី៥។
ចំពោះ មាស សារ៉ាក់ អ្នកប្រដាល់ក្លិបអាណាចក្រគុនខ្មែរ នឹងជួបប្រកួតជាមួយអ្នកប្រដាល់ថៃNuth Kor.Kesanon ក្នុងប្រភេទទម្ងន់៦០គីឡូក្រាម ។ រវាង មាស សារ៉ាក់និងNuth Kor. មិនធ្លាប់ជួបគ្នាទេកន្លងមក ។ នេះជាលើកទី១របស់អ្នកប្រដាល់ទាំងពីរជួបប្រកួតគ្នា។
សម្រាប់កាលជួបលើកនេះ ពុំដឹងថាមាស សារ៉ាក់អាចយកឈ្នះ Nuth Kor. បានឬអត់នោះទេ? ។ អ្នកប្រដាល់ថៃរូបនេះ គេទើបមកលើកដំបូងប៉ុណ្ណោះ ។ យ៉ាងណា ប៉ះជាមួយសារ៉ាក់ ដែលមានកណ្តាប់ដៃខ្លាំង រហ័សនិងលឿននោះ Nuth Kor. មិនជាស្រួលខ្លួនប៉ុន្មានឡើយ ។
មាស សារ៉ាក់ គេបានត្រៀមខ្លួនយ៉ាងល្អ សម្រាប់ការឡើងប្រកួតជាមួយ Nuth Kor. នេះ ។ យ៉ាងណា សារ៉ាក់អាចថាគេមានការប្រុងប្រយ័ត្នខ្ពស់ ព្រោះថាជាលើកទី១ ដែលគេជួបជាមួយអ្នកប្រដាល់បរទេសនោះ។ ចាំមើល រវាងមាស សារ៉ាក់ និងអ្នកប្រដាល់ថៃ Nuth Kor. តើនរណាជាអ្នកឈ្នះនោះ ?៕
Source: Kampuchea Thmey Daily
0 Comments